سبب صحي
مبدأيا كده وحشتوني جدا عارفة اني غيبت كتير بس مكنش في ايدي و**** بس الصحة كانت في النازل وهتعرفوا ازاي
مبدأيا الموضوع دا مش موضوع كئيب ولا اي حاجة انا بس حابة افضفض معاكم مش اكتر لان الفترة الجاية عارفة انها هتبقا فترة صعبة عليا جدا ، فكنت حابة افصل شوية او اقول شوية من الحاجات الانا حاساها
بعتذر لو هتحسوا اني مفيش حيوية في الموضوع او اني همظانة كده بس بجد الفترة دي تقيلة عليا
من كام شهر كده حسيت بوجع غبي في بطني ماخدتش في بالي وقولت عادي وخدت دوا كان عندي والوجع راح والدنيا مشيت
والوجع فضل كل شوية يروح ويجي وعادي اي حد بيحصله كده بطنه بتوجعه بس الموضوع ابتدي يبقا بشكل مستمر وكتير ومبقاش في ادوية بتنفع معاه اوي يعني بقيت الادوية يدوب بتخليه يبقا اخف لكن مش بتخليه يروح
لدرجة اني اوقات كتير كنت بفضل امسك بطني واتلوي من الوجع الفيها كان احساس صعب
وبسبب اهمالي لاي حاجة صحية مفكرتش اروح امشف لاني بكره الدكاترة جدا وناس منكم عارفه كده
شوية بشوية ابتدي تحصل حاجات في البريود مكنتش بتتأخر بس كان الدم بيبقا غريب وبقا في افرازات انا مش متعودة عليها دا غير ان المنطقة دي رحتها ابتدت تبقا مش كويسة مع اني بحافظ علي النظافة الشخصية وخصوصا الاماكن دي
وشوية بشوية ابتدي يكون في تعب في جسمي وهذلان
لحد ما فمرة وانا نايمة صحيت علي نزيف غرق لبسي وغرق السرير بصراحة انا وقتها مش خوفت بس اتهزيت فوقتها انا كان لازم اكشف واعرف في اي
روحت فعلا اكشف وقولت للدكتورة علي كل الحصل بصيتلي بصة كده الهو قلق من حاجة في دماغه وقالتلي علي تحاليل واشعة وسونار هي عملته وحاجات كده عملتها وروحتلها
لقيتها بتقولي انتي عندك ورم خبيث في الرحم
انا مش خوفت انا فجأة لقيت جسمي كله رخي وحسيت وقتها ان هيغمي عليا وفي الاخر يعني الخلاصة من حوار الدكتورة اني هعمل عملية ازالة رحم
انا مخوفتش ولا زعلت من المرض بالعكس انا مكنتش حاسه بحاجة اني عيانة الانا زعلت عليه ان انا كان نفسي ان يكون عندي بنت كده صغير كان نفسي اخلف بالمعني الاصح بس بسبب الظروف دي للأسف اكتر حاجة نفسي فيها عمري ما هعرف اعملها
احساس صعب جدا فكرة انك نفسك فحاجة عارف انها مستحيل تحصلك وحشة اوي مؤلمة
مكنش هيكون عندي مشكلة لو جالي كانسر فأي حاجة حتي لو عارفه ان نهايته هتكون موت كده كده انا مش حلمي اني اعيش انا حلمي اني اخلف وبكده يكون تم القضاء علي حلمي بنجاح
انا بجد مشاعري الفترة دي بايظة والفترة الجاية لما هعمل العملية هتكون اصعب بكتير