نصيحه لكل زوج عاوز يعيش حياة زوجيه سعيده
عشان تعيش مرتاح في بيتك ... ما مفيش غير طريق واحد ... انك تحاول تسعد مراتك ... وبالتالي هي كمان هتحاول تسعدك
وعشان ما تقولش إن البوست ده بيقول كلام نظري وبس ...
انا هاقولك على شويه تصرفات بسيطه جدا ... لا هاتكلفك وقت ولا مجهود
لكن لو عملتها صدقني حياتك هاتتغير ... وبجد هاتدعيلي ...
- جرب في وسط يوم شغلك تتصل بالمدام نص دقيقه ... قولها " انا بطمن عليكي عشان وحشتيني" ، واقفل بدون ما تطلب منها اي حاجه او تسالها طابخه ايه
- لو معزومين عند حد او قاعدين في مكان عام او ماشيين في الشارع ... حاول تمسك ايدها طول الوقت ، (افتكر ان الايد دي هي نفس الايد اللي كنت بتتمنى تلمسها ولو لحظه السلام ... قبل ما تبقى مراتك )
- وانت مروح من شغلك هاتلها اي حاجه حلوه ... شكولاته ... فاكهه ... ان ش**** كيس شيبسي ... بس خليها تحس انك كنت فاكرها
- حاول تناديها طول الوقت باسم دلع بتحبه ... وبوسها واحضنها بمناسبه وبدون مناسبه
- حاول وانتو قاعدين تتغدوا تأكلها في بوقها ... وافضل متابعها وهي بتاكل وباصصلها طول الوقت
- لو مراتك ربة منزل ... لازم تديها مصروف جيب ... مالوش اي علاقه بصاريف البيت ... قلها ده ليكي انتي عشان لو نفسك في حاجه تجيبيها
- ولو مراتك بتشتغل ... حاول ما تخليهاش تصرف في البيت ... ويبقى مرتبها لنفسها ... واوعي تسالها حتى صرفته ازاي .... وصدقني **** هيكرمك وهيوسع رزقك
- انا عارفه انك بترجع من شغلك مش شايف قدامك ... و**** فاهم ... بس معلش ... اتك على نفسك واتكلم معاها ... اسالها عملت ايه ... واسمع بكل اهتمام
- في وقت المشاكل والخناق ... اياك تسمحلها تسيب البيت ... لو لازم حد يمشي ... فحضرتك اللي تمشي ... وقولها ده بيتك انتي مش بيتي ... حسسها بالامان
- 50% من الخناقات ممكن تخلص بطبطبه وحضن ... وكلمه حلوه تتقال من القلب
- اياك تمدح اي واحده غيرها ... سواء جمالها او اخلاقها او علمها او حتى تدينها ... مراتك لازم تحس انها اروع ست في عينيك
- بطل تنتقضها طول الوقت ...واوعى تحقر من رأيها ... ولا تتفه من اهتماماتها... بالعكس حاول تشاركها اهتماماتها ... وتشجعها على اد ما تقدر ... ولو حتى بكلمه اعجاب
في النهايه لو مراتك حسيت انك شايفها اجمل ست في الدنيا ... وانك امانها وقت الخلافات... وحضنها وقت الزعل ... صدقني هاتشوفك اعظم راجل في الكون ... هاتعمل المستحيل عشان تنال حبك وتحتفظ بيك ملك متوج على قلبها
وعذرا على الاطاله
