1- الفول عالعربية بيتاكل بالزيت الحار .. الزيت الحلو ده تأكله في أرابياتا أو في بيتكم.
2- الأكل ده بيتاكل تغميس بالعيش "ودن قطة".3- العيش ممكن ينزلك مبلول شوية... دي مية سلطة عادي
4- ماتطلبش تغير العيش عشان مبلول... و لازم تعرف أن ده الأكثر جاهزية للاستعمال في الوقت الراهن.
5- البيض هنا شئ جميل .. كل و اتمتع.
6- ماتحرمش نفسك طالما جيت ... كل السلطة ... هاتموت هاتموت من البيض و الفول عادي.
7- الأطباق بتتغسل على فكرة.
8- ملكش أي دعوة الأطباق بتتغسل فين وإزاي ....
9- بلاش تسأل صاحب العربيه إيه الغامق اللي في الإزازة اللي هناك ده... سؤال بارد!!
10- مفيش حاجة على عربية الفول اسمها "فرايز" !
11- قول بطاطس – عاوز تبقى شبح قول صوابع – لو شيبسي قول شيبس.
12- حتى لو إنتي بنت ده لا يعطيكي الحق إنك تقولي "فرايز" دي خالص.
13- أي حاجة حط عليها شطة ... بس شطة كتير.
14- قال "فرايز" قال !!
15- ماتستبعدش إن ده يكون جرنال النهاردة سلي نفسك.
16- البتنجان بيخلص الساعة عشرة الصبح ... لو بتحبه انزل بدري.
17- "فرايز" يا ناقصة ؟
18- جو إنك تفضل في العربية وتنزل الإزاز و تطلب جوه العربية ده مش سليم ... التجربة تكتمل عالعربية نفسها
19- احترم أي بنت بتأكل من عربية الفول.
20- الكانز دا في الرحله ... انت فاكر سفن أب هتزود فرصتك في النجاه ؟ أبدًا ...و لا هتعمل حاجة.
21- البصل حلو ... منه بصل و منه مطهر.
22- كل المنتجات تستحق التجربة لو فيه جبنة و طعمية توكل على **** و الجرجير حكاية.
23- من حقك تحبس بعد الاكلة دي لو مستأذن من الشغل خليك واضح. قولهم هافطر واحبس وأجي.
24- الزحمة اللي عالعربية دي وهمية زي زحمة صلاح سالم اتجاه السيدة عائشة دقيقتين و بيفك
25- لو خفت ماتكلش – لو كلت ماتخفش.
26- ماتتفرجش على أي بنت و هي بتاكل من عربية الفول. بس بينك و بين نفسك احترمها. البنت دوغري و مابتمثلش و صديقة رائعة.
27- حباية الانتينال ( المطهر ) مش مجدعة – التجربة بحلوها و مرها.
28- لا يكلف **** نفسا الا وسعها لها ما كسبت و عليها ماكتسبت
29- جرب تاكل مرة من علي العربية و مش هتندم .
30- كل نفس ذائقة الموت فا متقولش عربية الفول السبب.
بس الفول راجل جدع💪 ومستحملنا يابتاعت الفرايز 😉
انا جعت ورايح اكل فول وبصل وميه سلطه 😂
ابداااع اخوونا معاذ 😂❤️ @ناروتو شيبودن
ونتو بتاكلوا فين بقا 😉🩶
