خلال فترتى معاكم هنا شوفت شباب كتير بيحاولوا يتعرفوا فى المنتدى على بنات أو سيدات
طبعا ده حقهم ومحدش يقدر يجادلهم فيه
لكن فعلا لقيت نماذج بتضحكنى من طريقتهم فى التعارف اللى هى تطفش أى بنت أو ست من الطريقة دى
هنبتدى بنموذج الحكاك
اللى هو يفتح أسماء الأعضاء وأى إسم يشتبه فى كونه حريمى يقوم باعت له كلمتين وطبعا دول بيعانى منهم مش بس الآنسات والسيدات لكن أى واحد إسمه علاء لإن بالإنجليزى بيتكتب ألاء
فيه منهم اللى بيكتفى بكلمة ممكن نتعرف وفيه منهم بقى النموذج اللى شايف نفسه الواد الناصح اللى مافيش زيه
الناصح ده بقى بيقوم كاتب لكل إسم يشتبه فى كونه إسم أنثى كلام من نوعية أنا شدتنى صورتك مش عارف ليه وحاسس إننا ممكن نكون أصدقاء وناقص يقولها عنيكى فيها حزن غريب
يابنى دى مش صورتها ... دى صورة من النت
وبعدين إنت كاتب الكلام ده عالملف الشخصى لأربعين واحدة غيرها وأكيد هى قريته وهتقول عليك عبيط ومش هيرد عليك غير واحد زيك بالظبط عامل نفسه بنت وهيشتغلك وبعد يومين تلاتة هتلاقيك مخلص القرشين اللى معاك على شحن للأخ اللى انت فاكره بنت
إهدى شوية يا صديقى واعرف إن المنتدى هنا فيه حاجات كتير غير التعارف
بكرة بقى أكتبلكم عن النموذج التانى اللى شوفته هنا وهو المتعرف الخبوء
ومحدش يسألنى يعنى إيه خبوء علشان أنا مش عارف بس لقيتها كلمة مناسبة للوصف
😂 😂 😂 😂 😂 😂 😂 😂 😂 😂