2019
احنا وصلنا انهادر 2024 بس تفتكر احنا فعلا طلعنا من 2019 اصلا
يعني واحدة واحدة كده مع بعض دلوقت يمعلم احنا بمرور سنين بتحصلنا حاجات جديدة حاجات تفرحنا وتزعلنا هي دي الحياة الطبيعية لكن لو بصينا علي سنة 2019 لحد سنة 2023 هنلاقي ان مفيش حاجة بتحصلنا
يعني من وقت كورونا واحنا مفيش جديد بقينا بنعيش ومستنين اليوم بتاعنا يخلص بقينا بنشوف حاجات جديدة حوالينا بس مش حسينها حتي الان
الحاجة الوحيد البنحسها من 2019 هو الملل والغباء وبنقف عند نقطة احنا فعلا كملنا ولا مكملناش خلاص هل فعلا احنا طلعنا من السنة دي ولا السنة دي كانت زي الثقب الاسود البيقع فيه مش بيخرج خلاص
دا غير طبعا ان السنة دي ناس كتير شافت انها هي دي السنة الفاصلة بين العالم القديم والعالم الجديد وشايفين ان اقبلها احنا كنا حاجة وبعدها بقينا حاجة مش مفهومة ، وناس تانية شايفه ان كل دا بسبب صرخة حوت وكذا واحد ليه وجهة نظر
بس انا وجهة نظري ان دي تروما والبيحصلنا دلوقت هو ما بعد الصدمة ، اتصدمنا مرة واحدة اننا لقينا كل بيت من بيوتنا كلنا فيه حد بيموت واحنا مش عارفين نعمل اي ، في علاج بس محجوب عننا فمش عارفين نتصرف وهنا ، مع احتمالية حرب عالمية تالته هتبتدي من ليبيا مصايب كتير حصلت في السنة دي واحنا قبلها كانت حياتنا هادية مرة واحدة احداث كتير مرة واحدة في نفس السنة واحنا مش مدركين شئ
يعني احنا ببساطة عاملين زي الجندي الدخل حرب مرة واحدة وشاف احداث كتير حواليه ولما الحرب خلصت فضل مذهول من الشافه وبقيت ايامه كلها استغراب من اي حاجة حواليه ومخه وقف عند نقطة الحرب الحصلت
ولا انت اي رأيك
تفتكر فعلا احنا كملنا بعد 2019 ولا وقفنا هناك ومكملناش ؟
واحنا بجد الاحنا حاسنه هو اضطراب ما بعد الصدمة وتروما ولا دي مبالغة ؟
