مساء الهنا والسعادة على كل اخواتى وأهلى وحبايبى نكمل انهارده بقية الكلام عن النصائح اللى بداءناها امبارح مش هطول فى المقدمة كتير وهبدا على طول فى الموضوع لكم منى ارق واجمل تحياتى
وقفنا فى البوست اللى فات عند الجلوس مع الاهل قبل الزواج ونكمل النصائح دى وهبدا فى البوست ده بالاتى
١-الاعتياد على الجلوس فى البيت :
كتير مننا قبل الزواج بيبقو مقضينها بره البيت. بشكل مستمر لكن بعد الزواج المفروض أن الراجل يتعود أنه يقضى معظم الوقت فى بيته يعنى انتى مش متجوز عشان تسيب زوجتك لوحدها بين أربع حيطان تكلمهم لازم تقضى معاها الوقت وتقعد تتكلم معاها وتشاركها أفكارها واحساسها باستمرار عشان ميحصلش مشاكل ليك بعد كده لست لما هاحس انك طول الوقت ستيبها هتهمل فيك ومش هتهتم بحاجة ومن هنا بتحصل مشاكل كتير ف لازم قبل الجواز تعود نفسك انك تقعد فى البيت عشان بعد الزواج ميحصلش اى خلافات .
٢- اتعلم الصبر :
الزواج مليان تحديات كتير وصعوبات اكتر لازم الراجل يكون عنده صبر وشجاعة لحل المشاكل اللى هتقابلك فى الزواج بلاش عصبية عمال على بطال لازم تكون هادى وصبور المرأة بتحتاج صبر لأن هى بتتكلم بمشاعرها أغلبية الوقت وهى اللى مسيطرة عليها لازم انت تحتويها وتفهمها واصبر عليها بلاش نرفزة دايما حافظ على هدوءك خصوصا فترة الحيض عندها انت متعرفش العذاب والتعب اللى هى بتبقى فيه فى الوقت ده حاول تخفف عنها واتحملها وساير امورك فى المشاكل العصبية عمرها ما كانت بتحب بل بالعكس يتخلى للأمور تزداد سوء
٣-بلاش استعجال فى قرار الجواز:
فيه رجالة كثيرة بتخاف أنها متقلقيش الشريك المناسب ليها وبتهاف انها تكبر ومتكونش اتجوزت وبيتجوزو اى حد يجى قدامهم وخلاص عشان ميبقاش لوحده وخلى بالك ده اكبر خطأ ممكن الراجل يقع فيه هو الاستعجال الصح انك تستنى الوقت المناسب ليك لحد ما تلاقى الشريك المناسب وتكون انت على الأقل لقيت الشغل الكويس اللى يقدر يساعدك فى الأمور المالية عشان بعد كده متحسش بالضغط النفسى عليك .
٤-الاهتمام بالنفس :
مش معنى أن الراجل اتجوز ميهتمش بنفسه وهيئته وصحته لازم تهتم بنفسك بعد الجواز جسديا وفى المنظر كمان خليك مهندم اهتم بنظافتك الشخصية لنفسك اولا قبل ما يكون ليها سيدات كتير بيشتكو من ازواجهم بعد الزواج لعدم اهتمامهم بنظافتهم الشخصية أو الاهتمام بالصحة الجسدية لازم تهتم بمنظرك بهدومك زى ما كنت عازب .
٥-بلاش تحكم رائيك
كل انسان معرض للخطأ بلاش تحكم رائيك عشان انت الراجل وادى فرصة للحوار والمناقشة بينك وبين زوجتك اختلاف الاراء سنة من سنن الحياة مش عشان هى كانت اراءها مختلفة عنك انت تتمسك برائيك انه الصح وأنه لازم هو اللى يمشى ده غلط لازم تلجأ للحوار والمناقشة الراقية لازم توصل معاها لرأئ تتفقو عليه انتو الاتنين .
٦-الحب هو مفتاح الزواج الناجح :
وحبيت اختم النصائح بالنصيحة دى هو أن لازم يفضل الحي ما بينكم ومتخليش حاجة تأثر على الحب ده لان ده اللى هيدوم بينكم حافظ على الحب حتى بعد فترة طويلة للجواز لان ساعتها هيبقى. فيه حاجة تانية وهى العشرة حب زوجتك ولكنك لسه عارفها وجدد حبك ليها باستمرار مهما تغير شكلها أو جسمها حب الروح هو أسمى حب وافتخر دايما أن الجسم والشكل بيتغير واللى بتبقى هى الروح .
بكده اكون خلصت جزء النصائح ما قبل الزواج للرجال فى البوست اللى جى هنتكلم على النصائح للمرأه اتمنى يكون البوست عجبكم ولكم من اطيب وارق التحيات والتقدير والاحترام