الرجاله اللي خارجين من تحت إيد أم مسيطرة متلاعبه صعب جدا عليهم- إلا من رحم ربي- إنهم يقدروا يكتشفوا اللي اتعمل فيهم
صعب يعترفوا بينهم وبين نفسهم إن أمهاتهم تلاعبوا بيهم
ده مؤلم جدا ومجتمعنا بيخلي الراجل يدفن المشاعر دي ويكمل وكأن مفيش حاجه حاصله واهي أيام وبتعدي!
فلو شاف أو حس من جواه حتى إنه في حاجه غلط مش هيقدر يربط بين التلاعب وبين الحيل اللي بتعملها مامته عشان تسيطر عليه - ده بيحتاج شغل كتير عشان يكتشف ده-
ولأن مامته بتفهمه إن الست القوية الواضحة دي مش "أنثى" وانها هتبقا راجل قصاده في البيت فهو بيخاف يتجوزها لأنه عاوز أنثى- بتعريف مامته-
ولأن الست الواضحه بنت الناس عمرها ما هتبين أنوثتها لراجل إلا بعد الجواز فهو هيروح -للملاوعه- المُستكينه دي اللي انوثتها واضحه عليها في التعامل معاه بتعرف ازاي تتلاعب بأنوثتها وبتعرف ازاي تخلي عنده "رغبه" قبل الجواز وبيتخيل إنه أخد الأنثى الكامله
وييجي بعد الجواز منها يحس بمشاعر غلط ومش مرتاح معاها ومش طايقها..هو حاسس إن في حاجه غلط بس هي عارفه تعمل إيه بالظبط عشان تغلوش على أفكاره ومشاعره
يقولك غلبانه وهاديه بس في حاجه غلط! -الحقيقة إنها لا غلبانه ولا هادية يافندم هي مُتلاعبه-
حد قالي مره "أنا بحس إنها كانت زي الحية اللي بتلف حوالين رقبتي" بس مش قادر امسك عليها حاجه!
لكن الواضحه المستقيمة اللي عاوزه حياة فعلا يكون هو القائد فيها مش هتقدر تصمد -قبل الجواز- قدام الملاوعه لأن عفّتها تأبى الطرق الملتويه دي في جلب الرجل
والراجل اللي بينجذب بالطرق دي أصلا بينزل من نظرها جداً
وبعد الجواز مش هترضى غير بالمشاركه والوضوح وقيادة الرجل للبيت عشان تقدر تدّي علاقه جنسية مُشبعه ومليانه مشاعر فعلا مش تلاعب وتمثيل
فمش هتستخدم الجنس كسلاح عشان تسيطر عليه
هتجرب -غالباً- تقود بداله شويه وتقول يمكن ده حل ويمكن المركب تتعدل
وبعدها لما تفقد الأمل هتسيب المركب كلها وتمشي وتفقد الثقه في ان في رجاله أصلا تقدر تقود علاقة..
الأم المسيطره بتلعب دور كبير جداً في حياة الرجاله ومعظمهم صعب عليهم يقدروا يكتشفوا ده فبيقعوا في الفخ تاني مع ست بنفس الشكل..
الراجل اللي ربته ست سويّه هيقدر يشوف ده واضح وهينفر من التلاعب ويشوف الابتزاز العاطفي والنفسي اللي وراه وكل ال insecurities اللي بتظهره ليه الست المتلاعبه
لكن اللي ربته ست بتستخدم الألعاب العقلية والحيل النفسيه بيبقا جواه صراع مش فاهم فين الصح وفين الغلط.. (بس لو مشي ورا إحساسه هيوصل للصح)
جواه بيقول: أنا منجذب للواضحه ومرتاح وحاسس هنا باطمئنان بس خايف تسيطر عليا -ماما زرعت في دماغه إن دي المسيطرة- مع إن الواضحه دي اللي عمرها ما هتسيطر عليه وهتحب تسيبله مساحته لأنها غالبا بتكون ذكيه ومثقفه وعندها حياه مليانه مواهب وحاجات تعملها فمش هتبقا لازقه فيه
وقلقان من المتلاعبه بس هي مستكينه -هادية وغلبانه كده- وبتعرف تتعامل معايا وفي الحقيقة دي اللي مسيطرة عليه حرفياً وبتلعب بنفسيته لعب وممشياه بمزاجها ومخليه مشاعره متلخبطه
مأساة التربية لما الأم تكون سيطرت على حياة ابنها نفسياً وعاطفياً وبقا في قبضة إيدها ميقدرش يروح يمين ولا شمال -وطبعاً لازم استخدام مصطلح "البر" هنا والتلاعب بمعناه عشان تبقا إبن بار بتسمع كلام ماما
نفس الاستخدام المغلوط لمصطلح الذكاء العاطفي للمتلاعبه اللي بتقولك أنا ذكيه وشاطره واعرف اخليه يعمل اللي على مزاجي منغير مناهدة ووجع دماغ -باستخدام الحيل الجنسية طبعاً-
قليل أوي من الرجالة اللي بيقدروا يتعافوا من الأذى النفسي ده وينتفضوا ويفوقوا لنفسهم ويحافظوا على الشعرة اللي بين بر الوالدين والسيطرة على حياته
لأنها شعرة رفيعة أوي محتاجه حكمة وقوة وذكاء ورحمه بنفسه وبأهله عشان يحمي حدوده المنتهكه..
وعشان لا يخسرهم ولا يخسر نفسه وحياته
طلبتوا رأيي واديني قولته بما يرضي ****
وجع الدماغ هيبدأ بقا في التعليقات ... **** يسامحكوا كنت عاوزه اقعد يومين منغير إثارة جدل 😄
