باح الخير أو مساء الخير حسب التوقيت الي بتقرا في الموضوع
آسف أولا لغيابي الطويل عن المنتدى لفتره طويله لظروف خاصه
لكن زي ما اتعودت إني بعد اي فتره غياب برجع واستقر تاني وسطكم هنا يا اصدقائي
الفتره الاخيره اثناء غيابي كنت بدخل طبعاً علي السوشيا ميديا وأتابع أماكن كتير علي النت أغلبها كانت تويتر طبعاً لحبي للأبلكيشن ده من زمان
بس لفت انتباهي ظاهره هيا موجوده من زمان لكن انتشرت بتوحش غير طبيعي بجد وبقت علني بدون اي خجل أو خوف لدرجه أنا نفسي بقيت اخاف كراجل ما بالك بالبنت أو الستات
الظاهره هيا تصوير البنات لنفسها فيديوهات جنسيه غريبة وبشعه وبظهور كامل لوشها وتفاصيل جسمها مع كلام جنسي يخوف ويرعب واغلبهم سنهم صغير جداً
طيب أنتي مفكرتيش مليون مره مصير الفيديو ده ايه حتي لو أنتي واثقه في الشخص ده مليون في الميه
حتي يا ستي لو الشخص ده جوزك وبتصورهوله علي سبيل أنه مسافر وبتمتعو بعض
مفكرتيش أن جهازه ممكن يتهكر يتسرق يضيع وفيديوهاتك دي تتنشر من اي شخص معدوم الضمير
أنا مش جاي أحاسب الشخص معدوم الضمير الي نشر الفيديو والصور لأن الشخص ده اتكلمنا عنه كتير أنه وحش وابن ستين في تسعين
أنا بكلم البنت او المدام نفسها
هانت عليكي نفسك ازااااااااي تحطي نفسك في الموقف ده
وبلاش مبررات لأن مفيش مبرر واحد يخليكي تعرضي جسمك للناس بالمنظر ده او حتي تعرضيه لشخص مهما كانت ثقتك في لأن النت النهاردة بسهوله يقدر يخترق أي حاجه في أي مكان بطرق بقيت سهله علي اي حد
اني متخيله أنتي عملتي في نفسك ايه
طيب بلاش نفسك بدل ما انتي مرخصاها
متخيله منظر اخوكي وسط أصحابه
ابوكي وسط جيرانه وأصحابه علي القهوه
أمك قصاد اهلك وخالاتك وعماتك
أولادك وسط اصحابهم
انتي متخيله دمرتي كام شخص بسبب فعل عملتيه بسبب شهوه ملعونه
أنا نادراً ما بشوف فيديو مثلاً لراجل بوشه حتي لو متاخد اسكرين من فيديو بينه وبين واحده
بيكون اغلبهم مأمن نفسه أن شخصيته متظهرش لأي ظرف كان
هل هو عنده عقل وانتي لا
مفيش ثانيه واحده بس تفكري في الكارثة الي بتحطي نفسك فيها
ياستي طيب حتي غطي وشك زي بتوع الابلكيشنات الي بفلوس وبتقول ابعت قلب وشامبانيا تخيلي دي عاهره بتبيع جسمها مقابل فلوس بس اذكي من حضرتك يا هانم
بجد الموضوع بقي كارثي
طبعاً عارف أن كلامي مالوش اي قيمه
بس لعل وعسى واحده بس تقرأ وتقدر تستوعب حجم الكارثة الي ممكن تحط نفسها وأهلها فيها وتاخد بالها قبل حدوث الكارثة ونرجع نقول ياريت الي جرا ما كان
آسف للأطاله بس الموضوع كان لازم اتناقش معاكم في واتمنى أسمع رأيكم ونصايحكم
دمتم أخواتي بخير
Ahmed zidan
