انا مقتنع تماما ان البدايات دايما حلوة
بداية اى حاجة قصة حب او صداقة او زمالة عمل او جواز او ممارسة جنس وبعد كده بيحصل فقدان للشغف والحنين واللهفة بسبب الروتين والملل وضغوط الحياة وغلاء الاسعار وبالتالى الاهتمام بيقل والسعى وراء توفير حياة كريمة فيها ادنى متطلبات المعيشة بيكون هو الشغل الشاغل لاى زوج فى الزمن ده وكمان بشوف ان قليل من الود والمحبة والاهتمام يكفى فى ظل الهموم اللى بيعيشها اى زوج حاليا بسبب الغلاء الفاحش اللى بيخليه يفكر كل يوم هيعيش ازاى والدلع والحنية والمودة للاسف بقت عايزة بال مرتاح ونفس صافية ودماغ رايقة وواضح ان الحاجات دى كلها مش متوفرة عند جوزك حاليا
انا بشوف ان الموضوع محتاج منك 3 حاجات
1- النقاش الزوجى يعنى لازم يكون فيه حالة حوار ومساحة للتفاهم بينك وبين جوزك بشكل يخليكى تعدى اى مشكلة بتقابلك لان حالة الصمت الزوجى اللى بيعيشها كتير من الازواج بتعمل كبت يولد الانفجار اللى هو كل يوم نصحى ناكل ونشرب والعيال تروح المدارس وكل طرف ماسك تليفونه وملوش علاقة بالتانى وينتهى اليوم على كده واليوم اللى بعده والاسبوع اللى وراه وشهر ورا سنة على نفس الحال علشان كده بنصحك تتكلمى مع جوزك بهدوء فى جلسة روقان وتسمعيه ويسمعك وتوصلى لحل معاه
2- انتى محتاجة تجديد فى حياتك انتى وجوزك بعيدا عن الروتين اليومى والحياة التقليدية يعنى خروجة فى مكان كل فترة اسبوعين او شهر حتى حسب الحالة المادية او فسحة فى مكان تانى غير اللى عايشين فيه لمدة اسبوع مثلا وليكن فى الصيف والموضوع ده محتاج ميزانية اتمنى انك تقدرى توفريها واعتبرى نفسك ساعتها فى شهر عسل جديد لمدة اسبوع ترجعى فيه علاقتك بجوزك تانى بشكل يسعدك ويسعده
3- اهتمامك بنفسك من ناحية اللبس والشياكة فى البيت لازم يزيد شوية حتى لو انتى مش مقصرة فى الموضوع ده كمان طريقتك اللطيفة ولسانك الحلو فى التعامل مع جوزك ضرورى بشكل يليق بيكى كانثى جواها مشاعر واحاسيس
اخيرا اتمنالك حياة زوجية سعيدة وان امورك الزوجية تستقر قريب جدا
