مريم بنتى قاعدة بتقرا مجلة ميكي وانا قاعد بشتغل ودار الحوار بينا كما يلي:
_بابي هو ايه الفرق بين مدينة البط ومدينة الوز
_مدينة البط يا حبيبتى عندهم زي القاهرة عندنا هي العاصمة ومدينة الوز زي محافظة الجيزة
قعدت تقرا شويه ورجعت سئلت تاني
_بابي هي زيزي بتحب محظوظ والا بطوط
_محظوظ بالنسبة لزيزي يا حبيبتي زي رشدي اباظة عندنا اي بنت تتمناه عشان شهرته بس بطوط بالنسبالها زي اسماعيل ياسين طيب وعشري وماشي جمب الحيط
_بس يا بابي انا بحس ان بطوط عبيط كده وببتصرف بعبط
—ما تظلميش بطوط يا مريم وتحكمي عليه زي بقية البط بطوط عاني كتير ف حياته وشال مسئوليه ولاده اخوه لولو وتوتو وسوسو وهما لسه ف البيضه مفقسوش واتبهدل عشان يخليهم يدخلوا مدرسة الكشافة اسكول وكفايه عليه انه ببحب حب من غير امل لا عارف يرتبط بزيزي ولا عارف حتي يقرا فاتحة يا بنتى ما انتى شايفة حالة عمك بطوط كل فلوسه رايحة علي ولاد اخوه وهدايا لزيزي ومش عارف حتي يجيب له شورت يستر بيه زلمكته
_طب ليه يا بابي ما بيروحش لعمه دهب ويطلب منه فلوس ويشغله عنده
_هو انتى مش عارفة جدك دهب جلده وايحه والجنيه يطلع من جيبه يسب 100مله حسبي **** ونعم الوكيل فيك يا دهب يا بن الجده وزه
-بابي اسمها الجده بطه
_لا يا حبيبتي الجده بطه تبقي خالة عمك بطوط
_طب ليه يا بابي زيزي
انا مقاطعا لكلام مريم بقولك ايه يا روما دعى الملك للمالك هما عيلة مع بعض وادري بمشاكلهم وازاي يحلوها والداخل بين البط خارج ملط
