برنامج انا اريد وانت تريد. وهروح ماتش ريال مدريد

[Alessandro Massimo]

أنا أريد و إنت تريد .....و أنا هروح ماتش الاهلي و ريال مدريد

في حمام السباحة تم سؤال الفريق إسبوع قبل معسكر المجر: مين مش هيقدر يحضر تمرين بالليل لسبب قهري؟

الإجابات كانت آه أصل لازم أروح لدكتور الأسنان ....أصل لازم اشتري مش عارف إيه عشان السفر ......أصل هاعمل كشف على عيني

المدرب: جو جاي تمرين بالليل؟

انا: لأ

المدرب: ليه؟

انا: رايح ماتش الاهلي و ريال مدريد في الإستاد (ذهول و سكوت في وسط الفريق)

المدرب: نعم يا حبيبي؟

انا: اه، ما إنت فاهم لازم أروح...ده ماتش القرن

المدرب: وحياة أمي يا جو لو عرفت انك ما جيتش عشان رحت الماتش، و**** ما إنت مسافر المجر

انا: ماشي

.............................................................

٤ اغسطس ٢٠٠١....... بالعربية البوكس بتاعت قريبي .....و بتاع 12 واحد فيها من صحابه .......و معليين المزيكا على اخرها في شارع النصر .....مش أي مزيكا ........شريط عمرو دياب الجديد: أكثر واحد ....طبعا الاغنية اللي كنا مشغلينها كانت الصاروخ في سماء الاغنية العربية حبيبي ولا علي باله لإن غالباً دي كانت أول مرة نسمع مزيكا مصرية هاوس بالطريقة دي .....و طبعاً الفيديو كليب كان جديد على المصريين ....متصور في ديسكو بره مصر و بتاع .....و بعدين المصريين فضلوا محتارين: هو عمرو دياب هيختار اللي شعرها أصفر ولا اللي شعرها اسود

المهم

المزيكا بتخبط .....و احنا بنطنطت باعلام النادي الاهلي على العربية ....نشوة ما بعدها نشوى مصطفي ...انتوا متخيلين يعني إيه كلها كام ساعة و هتتفرج على زيدان و فيجو و روبرتو كارلوس و راؤول و سولاري اللي كان لاعيبي المفضل وقتها و عامل الايميل بتاعي على إسمه؟

حتة جوية كنت حاسس إن هتكون إشتغالة و هيلعبوا الفريق الثاني

كان أول ماتش لمانويل جوزيه .......الاهلي عامل توليفة ما بين الحرس القديم......و كتيبة منتخب الشباب بتوع برونزية الارجنتين.....عيال حريفة و سريعة و جريئة .....الاهلي لابس تيشرتات حمراء معفنة عليها علامة مكدونالدز افشخ رمز للمرحلة أيام ما كان البيج ماك كومبو ب-١٠ جنيه و الآيس كريم الفانيليا بجنيه

فريق ريال مدريد دخل يتمشي في الملعب قبل الماتش .....و**** اللذي لا إله إلا هو أنا قلبي اتخطف .......أكن ملائكة نازلة ....فضلوا يلمسوا ايديهم على أرض ملعب إستاد القاهرة الرديئة .....أكنهم بيحطوا بركتهم عليها

الماتش بدأ.....فريق مدريد نقل كام كرة على الارض بمعلمة ....ال-١٠٠ ألف بدؤا يسقفوا من الجمال و الرقي .....فريق الاهلي كان مش على بعضه.....خضه ما بعدها خضة....كان وائل جمعة لسه جاي عمال متلعبك كده ....و الكرة مش سالكة مع أي لاعب .....تحس فريق مدريد بيلعب ضد ***** ......و بعدين ريال مدريد زود العيار شوية بقي و بدأنا نشوف حاجات غريبة

فيجو يلم في وسط الملعب و يلعب بينية لراؤول ....هوب يستلم و يشوط في الشبكة من بره ....عادي

بعدها بكام دقيقة أول حاجة تحصل توريك الهبل اللي كنت بتشوفه من مدريد على التلفزيون في ليالي ابطال أوروبا على القناة الثانية قدام عينيك على أرض مصر و فين في إستاد القاهرة

روبرتو كارلوس يستلم الكرة زي ما بيستلمها في اليابانية .........و يشوط قنبلة صاروخ أرض جو ......الحضري يصد بالبوكس ببطولية.....أنا فاكر كويس الناس في الإستاد كانت بتضحك ....هنتنكح النهاردة

سيل متوالي من هجمات لريال مدريد .....و افتكر برضه كرة فشيخة لراؤول يلعبها لكارلوس على حدود المنطقة من لمسة واحدة لزيدان .....و زيدان يعمل حاجة زيدان وسط الضغط بتاع دفاع الاهلي...يلمس الكرة بكعبه برقة لكارلوس ثاني ....عشان بيمينه يشمع الكرة في العارضة......ضحك الجماهير مستمر 😀

الشوط الاول ده الاهلي ما عملش حاجة غير إن أبو **** رقص جيريمي في وسط الملعب 😀 ....و خالد بيبو خد كرة كده فيرست تايم في السماء

بس مش مهم...هو احنا جاين نتفرج على الاهلي يعني؟ و إيه يعني لما الاهلي يخسر من أعظم نادي في تاريخ العالم ....نادي الجلكتيكوس.....نادي زيدان و بوشكاش و دي ستيفانو ؟ لازم كجمهور تقول لنفسك الحاجات دي عشان تصبر نفسك

الشوط الثاني بدأ بقي ....و ما تفهمش مانويل جوزيه عمل إيه في اللعيبة ....حقنهم منشطات ولا إيه ما تفهمش .....و مش مقتنع إن ريال مدريد كانوا خايفين على رجليهم زيادة ....لإن حصل حاجات الشوط الثاني ملهاش علاقة بإنك خايف على رجليك ....كان فيه سبعات و ثمانيات و ترقيصات مش مفهومة لأباطرة الدفاع زي فرناندو هيرو من الكابتن أبو **** و كابتن وائل رياض و كابتن علاء إبراهيم 😀

الشوط الثاني أول فرصة كده كانت لعلاء إبراهيم أي كلام ...بس نصف فرصة قدام ريال مدريد بمثابة فرصة كاملة قدام أي حد ثاني ...حتي حمادة إمام قال على التليفزيون إهتم بيها شوية يا علاء

بعدها علي طول: إنفراد لحسام غالي .....ثانية وحدة....و**** العظيم أنا جسمي كان بيرعش من الصدمة إن فكرة أصلاً إن الاهلي يهز شبكة ريال مدريد دي تحصل ...فكرة سخيفة و خيالية .....الجمهور كله وقف على حيله و صوته علي .....و الفكرة ال-5 أو ٦ ثواني دول الساعة و الكون كله وقف ....أكنك في حلم .....و الحلم أفور كمان إن حسام غالي رقص الجون ....و الجون فاضي 😀 ....جون ريال مدريد فاضي

لابسين تيشيرت مكدونالدز و جون مدريد فاضي .....و حسام يباصي لصنداي .......و الجون فاضي ....و جوووون \

صريخ هيستيري في الاستاد ......محدش فاهم حاجة ....انتصرنا في معركة الكرامة ....المصري يقدر ....و بيبان وقت الشدائد 😀 .....جبنا جون في ريال مدريد ....صنداي من كثر ما هو نفسه مش مصدق اتعلم جمباز من تاثير الهدف على مخه و فضل يعمل شقلباظ زي المجنون

الفكرة مش اننا بس جبنا جون في مدريد ....الفكرة إن الاهلي فشخ مدريد بعدها 😀 .....و**** العظيم خالد بيبو يوميها أثارني جنسيا من اللي كان بيعمله ....إنفراد بدل ما يشوط الكرة زي الناس ...لأ بيبو عمل بيبو و لاعب الكرة بمعلمة لوب فشييخ جت في العارضة

بعدها علاء إبراهيم فرش هييرو على الارض 😀 ....مشهد سريالي و**** أنا بضحك و أنا بكتب ......و ينفرد و يشوط صاروخ في العارضة

و كرة ثانية يفرش هيلجيرا 😀 .....و يلعب الكرة لعلقي المفضل خالد بيبو .....و بدل ما يشوط جامد ....يزحلق الكرة من على بطن رجله في المقص البعيد....أنا كنت في درجة أولى .....الكرة من الزاوية دي كان شكلها ممتع بشكل غير طبيعي بس خرجت بره ....بيبو فضل يجري لوره بإبتسامة بلهاء كده بعد ما ضيع الكرة .....و عينيه نيمانه و غير مكترث ....بعشقه

و طبعاً الوان تو ما بين بيبو و الصاروخ الصاعد الارجنتيني وائل رياض يضرب به الدفاع و يوصل شيتوس إنفراد كامل بس برضه يشوط الكرة في رجل الحارس برعونة شديدة

مدريد عملا شوية تغييرات عشان النتيجة تتغير ....نزلوا ستيف مكنمنمان و بتاع قال يعني هيعمل الفرق....بس الشهادة لله الشوط الثاني أشبع رغبتي الشخصية لما الكرة وصلت لسولاري اللي كنت مهووس به على حدود منطقة الجزاء ....و يشوط صاروخ في المقص ......و الحضري تصدي تصدي إعجازي بكل معني الكلمة و يحمي تفوق الاهلي التاريخي على بطل القرن الأوروبي في مفاجأة مدوية لحد النهاردة مش مصدقها

لو الماتش ده إتعاد ١٠٠ مرة لا يمكن الاهلي يكسب ......بس الطبيعة اشتغلت عشان تخلي ***** مصر يوميها يشهدوا إليوم التاريخي ده ....و تترسم الابتسامة على وشوشهم ....انهم يشوفوا أساطير طفولتهم العالمية بتخسر قدام عنيهم من فريقهم المحلي المفضل ....أظن دي أجمل حاجة ممكن تحصلك كا ***

....................................................................

٥ أغسطس....١٠ صباحاً في التراك

المدرب: ريال مدريد ها؟

أنا: اه

من قبل ما خلص الآه .......كان فيه بوكس نازل في صدري

المدرب: يلا اجري ١٠ لفات و ابقي قابلني عند البيسين

و الباقي هيتساب لخيال حضراتكم على اللي حصل في إليوم دا 😀

لكن إعتبرت نفسي يوميها شهيد الكرة المصرية .....شهيد الاهلي ....شهيد ريال مدريد

و في الاخر سافرت معسكر المجر مع مدربي و حبيبي اللي بموت فيه لغاية النهاردة و قضينا أجمل إسبوعين هناك


ذكريات

اضغط لقراءة المزيد...