مشكله اجتماعييه الطلاق وشيطنة الآخر

[مصطفى مصطفى]

بعد الطلاق ممكن أحد الأطراف أو كلاهما يبدأ يشيطنة الآخر ..
يتكلم عنه فى كل مكان
ميفوتش قعده ولا فرصه الا أما يجيب سيرته بكل …خير😆
يفضل يقول هو عمل وسوى
هو السبب
هو اللى أذانى
ده كان ابوالغضب وبيكشر لى عن أنيابه كل يوم
دى كانت ولا أمنا الغوله وبتطلعلى فى الحلم
ويفضل كل طرف على هذا المنوال لحد ما صورتهم همه الاتنين تتشوه فى عيون الناس وفى عيون ولادهم طبعا..

اللى بيحصل ده بيكون بسبب التالى:
- مشاعر ألم لم يتم التعامل معاها بشكل صحيح

-اتحولت مشاعر الألم لمشاعر غضب فبقت تاكل كل حاجه حلوه فى طريقها

-الغضب غطى على مشاعر التسامح والغفران
-كل طرف عاوز يبرأ نفسه من نظرة الناس ليه أو اتهاماتهم أو تساؤلات ولادهم

طب ايه الحل يا وزير؟
-أول حاجة لازم نفهمها اننا نحترم مشاعر الألم ..وان مشاعركو مقدره جدا
لكن ده مش معناه انكو تشيطن الآخر وتطلعه وحش بأنياب

-إنت مش متهم ولا مطلوب منك تبرر موقفك لأى حد
ولو حد مناخيره طويلة بزياده وعاوز يعرف كل حاجة اقطع عليه الطريق وقول جملة واحده فقط:
"دى أم ولادى/أبو ولادى ومهما حصل مقدرش اخوض فى تفاصيل حساسه عنه.

-فيه حاجات ممكن تتحكى وحاجات مينفعش تتحكى..
لو تعبانين ومش قادرين وعاوزين تفضفضو لازم تعملو ده بشكل واعى على قد ما تقدرو
يعنى تحدد الأول هتحكى مع مين
وهتقولو ايه
الأسرار والخصوصيات اللى حصلت بينكوا وتفاصيلها وبالأخص تفاصيل العلاقة الخاصة مينفعش اطلاقا انك تحكيها لأى حد .

-شريكك السابق أكيد عشت معاه ذكريات حلوه حتى لو يوم أو يومين فحاولو تبقو منصفين
تقولو اللى ليك واللى عليك
أيوه ممكن تكون اتعرضتو لأذى لكن افتكرو كمان ان كان فيه أيام حلوة.

-مش شرط يكون فيه جانى ومجنى عليه
هو عليه جزء من الغلط وانت كمان ممكن تكون غلطت
عادى احنا بشر مش ملايكة.

-مش معنى انكوا انفصلتوا انكوا تبقوا أعداء
هيفضل أبو ولادك أو أم ولادك
ولو مفيش بينكوا ولاد هيفضل برضه تجربه مريت بيها لازم تحترموها

-حاولو تدربو نفسكو على التسامح ولو مش قادرين ادو نفسكو الوقت لحد ما مشاعر الغضب تقل بالتدريج والتسامح هييجى بعدها بشويش..
انتو بتسامحو عشانكو مش عشانه بس.

-الامتنان للشخص وللتجربة عموما هيساعدك جدا فى التسامح والغفران
والامتنان بنمارسه عشان نشوف ايه الايجابيات اللى طلعنا بيها من التجربة دى ونتعلم منها.

وفى النهاية ..
كل شخص اتعاملت معاه فى الحياة جاى عشان يوصلك رسالة معينه ..ويكمل معاك أو يمشى..
شريكك السابق رسالة **** بعتهالك وبعتهوليك عشان تتعلم منها أو منو حاجة عن نفسك
عن العلاقات
عن الحياة عموما..
رسالة ممكن تكون طولت شويه
مش مهم..
المهم انت اتعلمت منها إيه

اضغط لقراءة المزيد...

 

[الـ مجتاو]

منشور كويس و دعوه لتصحيح مفاهيم مغلوطه 🤝

 

[mor2010]

👌 👏

 

[ميدو ابن عز]

عارف يا مصطفى عندي اخويا الكبير مره التجربه صعبه قوي ولحد دلوقتي ما استغناش عن ولاده رغم انهم كانوا قاسيين عليه في النهايه ومنكرش برده انه عنده اخطاء كتير ولو عايز تقول الخطا مشترك ما بينهم هم الاثنين بس انا بحمل النسبه الاكبر لاخويا من حيث دوره كراجل يقود العلاقه وللاسف هو قائد محترم بس كان ينقصه السيطره على غضبه عمري ما شفت انسان زيه بالشكل ده وجهه نظره عمرها ما اتبدلت مهما كانت الاوضاع الخلاصه ولا عيدني في النهايه ما بينهم ان هو ملتزم التزام مادي ونفسي ومعنوي اتجاه اولاده وام اولاده رغم الضغط الشديد والبلدي اللي حاولوا يعملوه علشان يضغطوا عليه بس هو مستمر في اللي بيعمله وعن قناعه اللي عايز اقوله انه اللي بيعمله اخويا ده مع اهله دي صوره من صور الحب لاولاده وحب لقصه حب ممكن تقول ماتت بس محافظ على اللي فاضل منها عشان خاطر العيال حقيقي كل ما اشوف اللي هو بيعمله بيبقى عندي فخر بيه كنت اتمنى ان هي ما توصلش لكده
راقي دايما يا مصطفى في كلامك وموضوعاتك

 

[مصطفى مصطفى]

عارف يا مصطفى عندي اخويا الكبير مره التجربه صعبه قوي ولحد دلوقتي ما استغناش عن ولاده رغم انهم كانوا قاسيين عليه في النهايه ومنكرش برده انه عنده اخطاء كتير ولو عايز تقول الخطا مشترك ما بينهم هم الاثنين بس انا بحمل النسبه الاكبر لاخويا من حيث دوره كراجل يقود العلاقه وللاسف هو قائد محترم بس كان ينقصه السيطره على غضبه عمري ما شفت انسان زيه بالشكل ده وجهه نظره عمرها ما اتبدلت مهما كانت الاوضاع الخلاصه ولا عيدني في النهايه ما بينهم ان هو ملتزم التزام مادي ونفسي ومعنوي اتجاه اولاده وام اولاده رغم الضغط الشديد والبلدي اللي حاولوا يعملوه علشان يضغطوا عليه بس هو مستمر في اللي بيعمله وعن قناعه اللي عايز اقوله انه اللي بيعمله اخويا ده مع اهله دي صوره من صور الحب لاولاده وحب لقصه حب ممكن تقول ماتت بس محافظ على اللي فاضل منها عشان خاطر العيال حقيقي كل ما اشوف اللي هو بيعمله بيبقى عندي فخر بيه كنت اتمنى ان هي ما توصلش لكده
راقي دايما يا مصطفى في كلامك وموضوعاتك

حبيبي تسلم وشرف ليا تواجدك في موضوعي
وربنا يعوض اخوك با الاحسن واتعلم من اخطائو عشان تحافظ على الاسره