طالما فتحت الموضوع وجذبك العنوان يبقي تطول بالك عليا كده وتقرا الموضوع بتأنى علشان تفهم الحوار
كنت بلف جوه المواضيع والتعليقات فى صمت شدنى تعليق عن الحب وسنينه وأيامه السودا والكحلى والبمبى المسخسخ
التعليق كان بيقول عن مشاكل علاقات الحب
_لو فهمنا غلط أو اتفهمنا غلط ده بيوجعنا _
الحقيقه التعليق رغم انه بسيط لكن جوهره يتكتب فيه مراجع من الناحيه العلميه وليس الهبد
طيب احنا ليه بنفهم اللى ادامنا غلط او هو بيفهمنا غلط 🤔🤔🤔
###اولا
ممكن تكون رسالتك له غير واضحه وصريحه وبالتالى هو هيفهمها على حسب تفسيره لها حسب اللى جواه وحسب تجاربه اللى فاتت والعكس
####ثانيا
سقف طموحاتنا وتوقعاتنا العالى اوى فى الشخص اللى بنحبه
يعنى ايه بقي يا جو ؟؟
تعالى ابسطهالك يعنى انت بتكون بتحب حد بقوة وسقف طموحاتك عالى ان حبيبك ده هيفهمك وهيحس بيك من غير حتى ما تتكلم وهووووب تقع عليك طوبه الواقع انه لا اتنيل فهمك ولا حس بيك ده بقي بيخليك تقفل وتتحفز ضده ودماغك تفضل تقلب زى القلاب بتاع المونه كده انه مش على باله وانه وانه وانه وهيلاهوب تلاقي العلاقه اتبعبصت واتفشكلت لانك ماخلقتش له اعذار ولا سمحت لنفسك حتى انك تسمعه وانت صافى من ناحيته بدون ما تحركك اى مشاعر سلبيه
###ثالثا
انت أكيد من خلال تعاملك مع حبيبك فتره بدأت تكون عنه انطباع ما وبدأت تفسر افعاله على حسب انطباعك ده وبالتالى اصبحت ردود افعالك وفق لانطباعك واى تصرف هيعمله حتى لو بسيط هتلاقى خيالك الخصب بيحلل ويفسر ويفشخ التصرف ده لحد ما يخزوق العلاقه
العلاقات جميله والحب مفيش اجمل منه لكن تفسيرنا للحب مختلف ولو تشابه بينا وبين الشريك فى اجزاء أكيد هيختلف فى اجزاء تانيه
انا بحب فى شريكي انه يكملنى مش انه يكون انا وده مربط الفرس كل الاختلاف صحى ومفيد ومثمر جدا لاى علاقه لو الطرفين فاهمين انه الاصل فى الحياه الاختلاف
انا حبيت فى فلان شىء معين واكيد فى حاجات تانيه مش هقبلها فاحنا بعبقريتنا الجهنميه بنكون عايزينه يحبنا زى ما احنا عايزين او انه يكون عايزنا نحبه زى ما هو عاوز
طيب ما احنا الاتنين نحب بعض بطريقتنا وطريقته والنعمه ماهيحصل حاجه والحياه هتبقي ورد على فل وياسمين
#حُبيكوا حبوا ... حبوا بعض زى بدون استئثار حبوا بعض بشويه عقل
#محبتكم فى القلب
