مين قال إن الخيانه بس إن الشريك يفكر في حد تاني أو يقيم علاقة جسدية مع غيري؟ هو في خيانات غير دي؟ 😱
أيوة بالظبط كده في ٨ أشكال للخيانة غير الشكلين دول:
↩️ الخيانة المالية
إنك تقعد تصرف من غير حدود وتورط شريكك ف ديون واقساط ملهاش لازمة، ده بيعتبر خيانة لأنه بيهدد الأمان المادي في العلاقة.
↩️ الخيانة العاطفية
إنك تمنع عاطفتك عن شريكك، تحرمه من وجودك، تبطل تستجيب لمحاولاته العاطفية تجاهك، تبطل تشاركه اخبارك واسرارك.
↩️ مشاركة أسرار شريكك من غير إذنه
لو هو مثلا بيمر بأزمة معينة ومش حابب حد يعرف، ساعتها مش من حقي أبدًا إني أشارك ده، عدم الاحترام لرغبته خيانه للثقة.
↩️ اخفاء المعلومات
لو حد مصاب بمرض معين، مهم الطرف التاني يعرف ويختار يكمل ولا لأ، لو في مشاكل عائلية، او حاجات متعلقة بالأولاد ليها تأثير علي شريكي ف مش من حقي إني أخفي المعلومات دي.
↩️ الأنانية
انك تفكر في احتياجاتك ورغباتك انت بس في العلاقة دي خيانه
انك متهتمش لرغبات ومتطلبات الطرف التاني وموافقته والاتفاق معاه علي اللي يخدم علاقتنا ويكون في صالحها ده قمة الأنانية والخيانه.
↩️ الحب المشروط
انا مش هحبك ولا هكون جمبك ولا هرضي عنك إلا أما تنفذلي رغباتي، دي خيانه للقبول اللي انا بحتاجه منك.
↩️ عدم الدعم لشريكك
سواء علي الحلوة أو المُرة، لو واقف تتفرج من غير ما تقدم اي نوع من أنواع الدعم دي خيانه لتصديقه لوجودك.
↩️ الإستغلال
استغلال نقط ضعف شريكك دي قلة أدب مش خيانة بس!
نفترض مثلا أنا عارفه إنه عنده خوف من انه يخسرك، ف كل اما تبقي محتاج حاجه وهو مش راضي يعملهالك تهدده انك تسيبه وتمشي! او لو هو ف ازمة مادية، ف أما يعارضك تمنع عنه الفلوس وهكذا..
📌 العلاقات الصحية محتاجه وقت ومجهود عشان تتبني صح، عشان نقدر نستثمر فيها وتعيش معانا.
وفي حالة ان العلاقة انتهت صلاحيتها (بقت سامة) محتاجين ندور ونعرف الاسباب عشان نعالج ونصلح، او نعرف الاسباب عشان نبعد بضمير مرتاح ونوقف دايرة الأذي.
