انا هاقولك رايي من باب اني اساعدك تصفي ذهنك وتفكر كويس عشان ترتاح لكن رايي ده مش هو الحل لان مفيش حل غير بايدك انت وانت بس ادري بظروفك وبنفسيات الناس المحيطه بيك ...بص تعالي نرجع شويه مع بعض بالاحداث ونعتبر ان الموقف بتاع استدعاء جوز اختك ومشاركته او تدخله في الموضوع كانه لم يحدث ...واعتبر ان الامور ماشيه عادي زي ما انت وصفتها لغايه قبل ما تكلم جوز اختك وخليه بره الموضوع شويه ...تعالي نفترض ان احنا هانسرع الفيديو شويه وان الاحداث ماشيه زي ماهي كانت ماشيه لغايه لما اتجوزتو...هانقول انك اتجوزت في شقه منفصله مش مع اهلك ولا حتي في نفس البيت...وعدت الايام ونفس طريقه حماتك زي ماهي ومفيش اي حد من الاطراف اللي انت ذكرتها مواقفه اتغيرت بعد جوازكم...وعده وقت ها ها ها ها وربنا كرمك وجبتو بيبي صغنن كدة قمور..((( **** يخلهولك ويتربي في عزك ))) هنا بقي تعالي نوقف تسريع الفيديو ونقف نحلل مع بعض شويه واعتبرني لاسع بس علي قد معرفتي بحاول افضفض معاك...انت بقيت اب ومسئولياتك في البيت ذادت عن مجرد عريس وفسح وزيارات الاهل من الناحيتين...لازم تركيزك في شغلك هايزيد شويه عشان تقدر تسد قدام الضيف الجديد ومستلزماته ومتطلباته والتفكير في مستقبله زي اي حد فينا لما ورط نفسه بحكايه الجواز ديه...حماتك بما انها شخصيه مسيطره علي اسرتها من ناحيه بناتها وجوزها وكمان تخطت الدايره ديه ومستضعفاك من ايام مكنت لسه خاطب بنتها مبطلتش ولا اتهدت الفتره ديه كلها بالعكس ده انتو بعد ما اتجوزتو بقي تفاصيلكم بالتفصيل المفصل اللذي لافصال فيه بقت عندها...وانت كنت بتعدي وبتكتم عشان مش عايز تعمل مشاكل او مش عايز تخرب بيتك...بس في الوقت ده انت بقيت رب اسره ومنظورك للاسره اختلف عن ما كنت لسه خاطب ..ومبقتش مستحمل التدخلات المبرره والغير مبرره بتاعه حماتك ..وحاولت كذا مره مع مراتك انها تبطل تحكيلها عن تفاصيل حياتكم وانكم تبقو مستقلين وانكم تخلو اسرار بيتكم جواكم وبرضو مفيش فايده ولما حاولت تاخد موقف حاد معاها (مراتك) بسبب الموضوع ده اتهمتك بانك عايزها تقاطع اهلها...تخيل بقي لاني مش هاعرف اوصف احسن من عقلك وانت حاطط نفسك مع الشخصيات اللي انتا عارفها ديه في موقف هايجي هايجي..وهاذودلك مشهد تاني علي الاحداث ديه عشان تسرح فيه وتفكر وتتخيل الدنيا هاتكون عامله ازاي...في نفس الاحداث ديه هانفترض افتراض وبعد الف الشر والف لا قدر القدير ان مامتك كانت تعبانه بعد الف الشر وميكتبهاش علي حد ...انت الطبيعي انك تروح تزورها يا سيدي وهانقول زياره مش هانصعد الموضوع ونقول انك هاتطلب من مراتك انها تقضي حتي اليوم عندها لغايه لما تخلص شغلك وانت مروح تعدي تتطمن علي مامتك وتروحو بعد كده...انا عن نفسي متخيل ان حماتك مش هاتخلي مراتك اصلا تروح تزورها لان البيبي مطلع عنيها وانت سايبها لوحده وطول النهار بره وعامل البيت لوكاندا تيجي عايز تاكل وتنام وهي تشوف البيت والنضافه والطبيخ والبيبي كمان ...لا يا حبيبتي خليكي انتي في اللي انتي فيه ويبقي يروح هو يشوف امه براحته(ده كلام حماتك ) (في تخيلي يعني ) وكمل انت تخيل وانا هاعمل فوكس علي صوره معينه في الفيلم الهندي اللي انا بشرحهولك ده واسيبك انت تحل الكلاكيع ديه مع خيالك براحتك..عايزك تبص علي نفسيتك سعتها عامله ازاي مع انسانه انت ارتبطت بيها واستحملت علشان خاطرها تجاوزات مامتها ( وسلبيه ابوها في نفس الوقت) بقي مطلوب منك انك عشان ترضيها لازم مامتها تبقي راضيه عنك ومن كلامك انت انا شايف ان مامتها عايزه بطريقه حتي لو لا اراديه انها تخليك نفس الشخصيه بتاعه حماك في بيتها ان مراتك هي اللي تبقي مسيطره علي البيت وانت زي حماك بالظبط اللي من كل كلامك انت مذكرتهوش غير لما رحتو تحلو ووصفت انكم اتقابلتم مقابله مش لطيفه...يعني هو اصلا مكنش مؤثر في الاحداث اللي انت وصفتها وكمان كان وشه مقلوب لما رحتو تحلو الموضوع ..يعني بيسمع الكلام وشاطر...وانك تراضي او ان مامتها تكون راضيه عنك ده معناه انك تعمل مشاكل مع اهلك وتبقي جاحد او جاف معاهم لان ده اللي انا فهمتو لما انت قلت ان حماتك بتتهمك انك ضعيف مع اهلك...ركز في القصه ديه واسرح وتخيل وفكر وكده ولا كده محدش فينا هنا انا ولا اي حد من اخواتك هنا هايعرف يساعدك مساعده ملموسه ..كلنا بنحاول ننقلك تجارب مشابهه افكار اي حاجه نساعد بعض بيها تساعدك انك تصفي ذهنك وانت تاخد قرارك...بص هو كل اللي انا قلتهولك ده واخد سكه الافتراضات التشاؤميه .. في اراء تاني هاتقولك بمرور الوقت الدنيا هاتهدي شويه وممكن النفوس تهدي وتصلح العلاقات وبعد الجواز وخاصتا لما يجي بيبي اكيد هايحصل تغيير...اراء تحترم وانا قلتلك ان اي راي من اي حد هو محاوله لمساعدتك في التفكير بطريقه اوسع من انك تفكر لوحدك ..ختاما بقي عايز اقلك عل كام حاجه تساعدك انت وبتفكر ...اللي قبلينا قالو ان اهم حاجه في الجواز هدوان السر ...بمعني اخر الراحه النفسيه بين كافه الاطراف المرتبطه...لان صفحه الجواز ديه مش صفحه بتكتبها ويمر عليها الزمن وتفضل صفحتك الخاصه انت ومراتك لا....دي بدايه موسوعه كامله شامله في علاقات كتير متداخله ومتشابكه ومعقده ولكل علاقه فيها ميت حكايه وروايه وتتكتب في صفحات..الجواز مش انت ومراتك..الجواز لما ابوك يتعب تلاقي حماك قبل عمك واقف جنبه وواقف في ضهره عشان انت جوز بنته . الجواز لما حماتك تبقي عامله عزومه تبقي والدتك هي اللي بتدعي الناس وبتعمل في البيت اكتر من اللي حماتك بتعملو ..الجواز لما وحده من اخوات مراتك تتجوز تلاقي ابوك مفحوت مع ابوها لف ودوران في عفشتها وامك مع حماتك داخو عشان يحضرو جهازها..وغيرو وغيرو وغيرو كتير قوي مينفعش يتكتب ...عشان كدة اختذلوها في كلمتين (هدوان السر)..مش معني انها اول حد في حياتك او انها اول خطوبه انها المختاره...ررربنا بيحطنا في تجارب علشان نتعلم ونفهم وبياهلنا للحمل والمسئوليه اللي داخلين عليها ...بعد ما تقرا ده كله تسامحني علي الحاجات ديه :
اني طولت عليك
اني سودتهالك بهباب اسودمكحل مطين ويكأني حماتك زقاني عشان افشكلهالك
بس صدقني دي محاوله لاستدعاء مواقف وارد انها تحصل والفيصل فيها شخصيتك وطريقه المواجهه والمعالجه مع كمان الشخصيات محل الموضوع اللي انتي ادري بيهم من اي حد وهاتعرف من معاشرتك ليهم تستشف هاتكون تصرفاتهم وطرقه مواجهتهم ومعالجتهم للمواقف اللي انا صدعتكم بيها...
بعتذر للمشرفين عن الاطاله بجد لاني عارف بطريقه غير يقينه انهم اكيد بيراجعو الردود ديه قبل النشر .
بعتئر لاي حد من اللي استحمل وقرا كلامي ده عن الاطاله بجد انا اسف .
اما بخصوصك انت بقي فانت اللي طلبت شيل بقي يا معلم واقرا واستحمل.
خلي ررربنا قدامك وانت بتفكر وشوف هو طالب منك تعامل اهل بيتك ازاي اذا كانت مراتك ولا والديك ولا اخواتك ولا اخواتها....وشوف لو جمعت الاشخاص ديه مع بعض بارتباطك بنتهم هاتقدر تحقق وصيه ررربنا ليك ولا لا..
دمتم بخير مادام وجهه علينا رحيم.