كل واحد فينا ليه طريقه يعبر بيها عن غضبو في الي بيكسر اي حاجه تيجي قدامو وفي الي بيقول كلام مش واعي للكلام الي بيقولوا وسعتها بيكون بوظ كل حاجه وفي طرق كتير لتعبر عن غضبكو
تعالا أقولك ازاي تعبـّر عن غضبك بشكل سليم. 😇
🔺١- فكر قبل ما تتكلم🤔
راقب سلوكك وعلامات جسدك اللي هتؤدي لحدوث نوبة الغضب، بمعني.. أنا أما آجي أغضب ببدأ مثلًا (أعرق، أهز في رجلي كتير، أكرمش أي ورقة قدامي،... إلخ)
‼️ده فايدته إيه!
كل ده إنذار لحدوث انفجار كبير وهو الغضب.
🔻٢- نقدر نستغل الإنذار ده بإننا نحاول نمنع حدوث الإنفجار ده بشكل مؤذي، فـ هتبدأ تاخد نفس عميق ومع كل نفس تعد رقم لحد ما توصل لعشرة.
يعني تاخد نَفس عميق وتطلعه وتقول ١
نَفس عميق تاني وتطلعه وتقول ٢
وهكذا لحد ١٠
‼️ده فايدته إيه!
أولا تمارين التنفس هتساعدك تهدا شوية، والعَد هيشتت دماغك شوية عن سبب الغضب.
🔺٣- عبر بشكل واضح وصريح باستخدام ضمير المتكلم أنا
يعني مثلا: "أنا متضايق عشان معرضوش عليا أخرج معاهم"
بدل "هما ازاي ينسوا يكلموني"
‼️ده فايدته إيه!
استخدامك لضمير المتكلم «أنا» في التعبير عن مشاعرك «أنا متضايق» ده بيساعدنا مع الوقت نتحكم في تغيير المشاعر دي، في النهاية المشاعر دي مشاعري وأنا اللي مسؤول عنها فـ هي قابلة للتغيير.
لكن التركيز علي فعل الآخر «هما اللي نسيوا، هما اللي مقالوش،...إلخ» ده بيبعدك عن فرصة تغيير مشاعرك اللي هي مسؤوليتك.
🔻٤- تقدر تمارس الرياضة أو مهارات الإسترخاء زي اليوجا مثلا او تتمشي فـ أماكن مفتوحه كل ده بيساهم في تقليل التوتر.
🔺٥- ممكن تجيب نوتة وتسجل فيها درجه الشعور بالغضب أثناء النوبة أو أثناء وجود مُحفز الغضب ودرجة الغضب بعد انتهاء النوبة.
‼️ده فايدته إيه!
هيساعدك تاخد بالك من التطور اللي بتحققه، ويشجعك تكمل بنفس الأسلوب بعيدًا عن الزعيق والسب واللعن اللي ممكن يحصل.
🔻٦- لو عملت كل ده وموصلتش لحل، تقدر تطلب المساعدة من مُختص وهو هيساعدك.
أخيرًا/
مش هتقدر توصل لأي حل أو نتيجة إلا لو انت فعلًا عايز تسيطر علي غضبك، ومش عاجبك التأثير السلبي والمُدمر اللي بيعمله الغضب علي الشخص الغاضب والمغضوب عليه.
