دى حاجه جديده جات فى دماغى حبيت اعملها وطبعا قصة الافاتار انا بكتب فيها وقريب هكملها لان الاحداث الى بتحصل دلوقتي غيرت كتير فى تفكير الواحد وفيه افكار جت فى دماغى وطبعا بعد ما كتبت جزئين فى القصة التليفون باظ وجبت واحد جديد وندمت جامد انى مش نزلتهم انا بعتذر ليكم ز ياريت الفكرة الجديده تعجبكم وبتمنى ان ادارة المنتدى تشجع الفكرة... يلا بينا
( القصص الى هكتبها هتكون عبارة عن ان كل جزء قصة مختلفة لجاسوس او جهاز مخابرات مختلف وفيه قصص هتكون طويلة كجزء هخليها على جزئين وكل القصص حقيقية ميه فى الميه)
انا : بسالو الرئيس فلادمير بوتين رئيس روسيا مين هو مثلك الاعلى مين هو قدوتك فى الحياة فرد بجملة واحده ( الجاسوس زورجا ريخاردو زورجا) مين هو زورجا وليه بوتين بيعتبره مثله الأعلى هقلك
قبل اسبوع كامل من غزو المانيا للأتحاد السوفيتى فى الحرب العالمية الثانية واحد من اهم جواسيس المخابرات السوفيتية وصلهم معلومة بان خلاص الجيش الالمانى صدرتله الأوامر بغزو الأراضى السوفيتية وطبعا بسرعة البرق كان فيه تقرير من المخابرات السوفيتية على مكتب الرفيق ستالين زعيم الاتحاد السوفيتي بس المفاجأة ان ستالين مصدقش المعلومة مش بس كده ده شتم الجاسوس الى بعت المعلومة ستالين كان خشيم وقال بالنص ( هذا الوغد ينشئ المصانع و المواخير فى اليابان ويدعى ان المانيا ستغزو الاتحاد السوفيتي) طبعاً موقف ستالين كان مفهوم لانه كان ماضى معاهدة عدم اعتداء مع هتلى لاكن فى عالم السياسة و الحروب تصرف ستالين ده مستوى عالى جدا من الغباء لان مفيش صاحب بيتصاحب معروفة
القارئ : طيب هل فيه دليل على الكلام ده
الكاتب : طبعاً فيه... كلام الجاسوس طلع صح وبداء الغزو الالمانى المشهور بعملية ( باربالوسا) يوم 22 يونيو سنة 1941 يعني بعد اسبووع كامل من تحذير الجاسوس ده تخيل بقى لو كان ستالين سمع كلامه واستعد للجيش الالماني خلال الاسبوع ده
القارئ : كانت الخساير السوفيتية هتقل كتير... ده غير ان مسار الجرب كلها كان ممكن يتغير من بدايته
الكاتب : شاطر عزيزى القارئ شاطر
الغريب ان نفس المعلومة الى نقلها الجاسوس ده الى هقلك اسمه وقصته دلوقتي.. نقلها بعد منه جواسيس تانيين بردو تابعين الاتحاد السوفيتي منهم ضابط فى المخابرات الالمانيه نفسها جان بيتجسس لحساب السوفيت... فا هنجبلك مين تانى عشان تصدق ان هتلر بيدحك عليك لاكن بردو ستالين مصدقش وهناء ملاحظتين مهمين
الاولى : ان أحياناً دكتاتوريتك وغرورك كزعيم واحساسك بان محدش بيفهم غيرك ممكن توديك فى داهيه مش بس انت ده غالبا هتودى بلدك كلها وراء الشمس
الملاحظة التانية وهى ان الجاسوس ده قدر يخترق جهاز المخابرات الالماني فى عز قوته وجبروته وقدر يوصل لمعلومة غزو الاتحاد السوفيتي مش قبلها بيوم ولا يومين ولا قبلها بكام ساعة ده قبلها باسبوع كامل حتى قبل ما ظابط المخابرات الالماني نفسه الى بيتجسس لحساب السوفيت قدر يوصلها وده معناه انه كان مطلع على صناعة القرار الالماني حتى قبل التنفيذ لذالك مش غريب تعرف ان الجاسوس الى هحكيلك حكايته النهارده هو المثل الأعلى الرئيس الروسى فلادمير بوتين ( ريخارد زورجا)
اتولد فى أذربيجان واتنفذ فيه حكم الاعدام فى اليابان يوم 7 نوفمبر سنة 1947 بعد ما ستالين باعه وقال معرفوش ولا ليه علاقة بالاتحاد السوفيتي رغم ان كان ممكن يبدله باسرئ يابانيين او بقوات المحور لاكن ستالين كان يبيع ابوه ولا يفرق معاه عادى لاكن ورغم اعدام زورجا قدر يحفر اسمه فى تاريخ الجاسوسية للابد للدرجة الى تخلى الرئيس الروسى فلادمير بوتين يعتبره مثله الاعلى وقدوته...
يتبع.....
ده كان زى برومو لفكرة مجموعة القصص الى عايز انزلها لو عجبتكم ياريت تقولو رايكم عشان اكمل وكمان عايز اعرف الادارة موافقة على ده ولا لا عشان مجهودى وتعبى مش يروح على الفاضي واخيرا شكرا للى وصل لحد هنا شكرا جدا ❤
لتفوز يجب ان تعرف إلى اى جانب انت يحكم العالم بالأسرار
جاسوس بوتين المفضل( الفصل الثاني و الاخير)
زورجا اتولد لاب المانى وام روسية وخلى بالك من ابوه وامه دول عشان هما مفتاح القصة كلها ومفتاح شغله فى التجسس بشكل عام
بعد ما تم زورجا ثلاث سنوات ابوه وامه خدوه وعاشو فى العاصمة الالمانية برلين بلد ابوه مفهاش حاجه وبالتالى زورجا عاش وكبر فى المانيا يعني مواطن المانى محدش يقدر يشك فيه خصوصا انه انضم للجيش الالماني بعد ما تم 18 سنة و اتصاب ثلاث مرات فزورجا بالنسبة لالمانيا بطل مفيش احسن من كده لدرجة انه بعد شويه انضم للحزب النازى لك ان تتخيل انه كام عضو فى الحزب النازى وفى نفس الوقت واحد من اهم الجواسيس السوفيت وهحكيلك التفاصيل دى دلوقتي عشان تعرف ليه بوتين اختاره من بين كل النااس عشان يكون مثله الاعلى فى الحياة
المهم زورجا لما اتصاب للمرة الثالثة فى الحرب حالته الجسمانية مبقتش تسمح للحرب فاضر انه يدور على حاجه تانية يعملها فدرس اقتصاد و علوم سياسية لحد ما خد درجة الدكتوراة فى العلوم السياسية من جامعة هامبورج... لحد هنا الراجل المانى صرف لاكن خلال فترة دراسته للعلوم السياسية تأثر بالفكر المركسي او الشيوعى و اتحول لواحد من اشد المؤمنين بيه و المدافعين عنه ولان امه روسية فى الاساس فده طمن المخابرات السوفيتية لدرجة انها جندته وبعد فترة تدريب محترمة فى مدارس المخابرات السوفيتية كلفوه بتأسيس شبكة تجسس فى شنغهاى فى الصين ورغم انها مهمة صعبة لاكنه قدر يأسس الشبكة ونجح نجاح عظيم جداً فثقة المخابرات السوفيتية زادت اكتر فى زورجا فكانت الخطة التانية انهم كلفوه بتأسيس شبكة تجسس فى اليابان وتحديدا فى طوكيو
طب ليه اليابان
وليه طوكيو
لان اليابان كانت تحتل اقليم منشوريا فى الصين و بالتالى فى قوات يابانية موجوده ومتمركزة فى الصين تقدر فى اى وقت تغزو روسيا فكانت المخابرات السوفيتية عايزة تزرع حد فى قلب اليابان عشان تعرف اليابانيين نويين على ايه بالظبط فبعتو مين
الجاسوس ( ريخارد زورجا) طب زورجا هيدخل اليابان ازاى وهو سوفيتى
ما اليابان و الاتحاد السوفيتي مبيحبوش بعض كانو بيحاربو بعض فى الحرب العالمية التانية فاكيد لو دخل كانه سوفيتى المخابرات اليابانية هتشك فيه قلك بسيطه
زورجا اصلا المانى هو ابوه مش المانى يبقى ابوه كمان المانى ده غير انه عاش حياته كلها فى المانيا ودرس فى واحده من اهم جامعات المانيا عايزين ايه تانى ده مش بس كده دا احنا كمان هنسهله انه يشتغل صحفى فى جرنال المانى عشان يدخل اليابان باعتباره صحفى وكونه صحفى ده هيسهله انه يدخل لصفوة المجتمع الياباني ده غير انه يقدر يتكلم فى اى موضوع ويسال اى سؤال بدون ماحد يشك فيه. ه راجل صحفى وجمع المعلومات من صميم شغله لاكن زورجا يجود من عنده كده ويضيف حاجه محدش توقعها... وهى انه يروح بنفسه كده للحزب النازى
صباح الخير
صباح النور
انا عايز انضم للحزب
طبعاً الحركة خطر جداً
القارئ : ليه يعني
الكاتب : لان عشان تنضم للحزب النازى ده معناه ان الجستابو او البوليس السرى الالماني هيعمل عنك تحريات و تحريات الجيستابو مبتهزرش هيعرفو عنك الى انت متعرفوش عن نفسك
لاكن زورجا كان حسبها كويس هو فعلاً لسة معملش حاجه تدينه ونشاط التخابر الوحيد الى مارسه كان خارج الاراضى الالمانية و راجل دكتور جامعى وصحفى ورايح بنفسه يطلب عضوية الحزب النازى فكانت النتيجة انه اتوافق عليه
الكاتب : مالك عزيزى القارئ
القارئ : وايه يعني لازمة العضوية
الكاتب : لا لا تفرق كتير... المخابرات اليابانية هى كمان مبتهزرش وهيعمله عنه تحريات بمجرد ما يدخل اليابان فاليابان الى هى حليفة لالمانيا تلاقى الراجل عضو فى الحزب النازى الالماني و بالتالى خضع لتحريات البوليس السرى الالماني فده هيطمن المخابرات اليابانية من نحيته الراجل نضيف
حتى لو هيعمله عنه تحريات فمش هتبقى بنفس القوة الى كان ممكن يخضعلها لو كان مش عضو فى الحزب النازى
القارئ : طيب هل تصوره ده كان صح
الكاتب : الإجابة لابعد مما تتخيل لدرجة انه كان صديق شخصى للسفير الالماني فى اليابان والى اهم من السفير نفسه هو الملحق العسكرى الالماني فى اليابان وده الى بلغه بمعاد الغزو الالماني للاتحاد السوفيتي قبلها باسبوع و الملحق العسكرى الالماني هنا مكانش جاسوس ولا كان يعرف اصلا ان زورجا جاسوس سوفيتى لاكن كان شايف قدامه مواطن المانى بدرجة استاذ جامعى وصحفى وصديق شخصى للسفير الالماني فى اليابان فكان بيتكلم معاه فى سبيل الدردشة خصوصا انهم كانو اصحاب بحكم وجود زورجا المستمر فى السفارة الالمانيه فى اليابان طيب دى كانت علاقات زورجا على المستوى الالماني
ايه المعلومات الى جابها على المستوى اليابانى : هقولك زورجا الوحيد الى بلغ الاتحاد السوفيتي بهجوم ( بيرل هربر) قبل ما يحصل 9 ديسمبر سنة 1941 لاكن بردو ستالين مهتمش ( مش عارف ستالين لما مكان مش مهتم ولا بيصدق معلومات جواسيسه كان باعتهم يتجسسو ليه خلاص يعم رجعهم يعيشو فى بيوتهم اهو على الاقل توفر مصارفهم... لاكن لا يفضلو هناك ويبعتو المعلومات وانا ارميها فى الزبالة بعد كده عادى اهو كيفى كده) لاكن خد بالك ان في هنا تفسير تانى لمعلومة " بيرل هاربر " وهو ان ستالين رغم معرفته بيها قبل الهجوم إلا انه رفض يبلغ الأمريكان علشان الهجوم يحصل وتضر امريكا تدخل الحرب العالمية التانية كحليف للاتحاد السوفيتي و بريطانيا ضد دول المحور الى هما " المانيا " إيطاليا "اليابان"
وهجوم " بيرل هاربر " للى ميعرفش هو الهجوم الى نفذته اليابان على ميناء " بيرل هاربر " وهو ميناء عسكرى قاعدة عسكريّة يعنى ويعتبر دلوقتي المقر الرئيسي لاسطول الولايات المتحدة فى المحيط الهادى.. المهم ان اليابان قصفت الميناء ده قصف شديد جدا لدرجة انه مات فيه حوالى 2400 بنى ادم مابين جنود وضباط ده غير تدمير 188 طائرة حربية و فقدت 21 سفينة حربية مابين تحطم وغرق.. بعد الهجوم ده امريكا دخلت الحرب العالمية التانية ونفذت هجوم القنابل الذرية على هورشيما وناغازاكي....
نكمل بقى : التفسير ( هقوله تانى على **** يطمر) ان ستالين مبلغش امريكا بالهجوم ده عشان امريكا تدخل الحرب غصب عنها ( انا عارف انك قبل ما اقول موضوع بيرل هاربر كنت مش فاهم حاجه عشان كده انا شرحت الموضوع اظن دلوقتي فهمت تفسير ان ليه ستالين مبلغش امريكا بالهجوم مع انه كان عارف قبل ما يحصل)
وهنا السؤال ليك عزيزى القارئ او عزيزتي القارئة ( تجاوب على السؤال فى الكومنت انت او هى وإلا ورحمة جدتى حتشبسوت ه*********و****** بس كده) تفتكر ستالين عمل كده فعلاً عشان امريكا تدخل الحرب ولا مهتمش بالمعلومة بسبب غروره مش اكتر قولنا فى التعليقات
المهم هنا زورجا قدر يوصل لمعلومتين محدش غيره قدر يوصلهم ومعلومتين كانو قادرين يغيرو مسار الحرب العالمية و بالتالى يغيرو التاريخ
لو ستالين صدق ان المانيا هتهاجمه كان نفذ هجوم مضاد او ضربة استباقية وتنتهى الحرب العالمية التانية حتى قبل ما تبدا
اما المعلومة التانية الخاصة بهجوم بيرل هربر
فلو امريكا كانت عرفت فبردو كانت هتنفذ هجوم مضاد او ضربة استباقية ضد اليابان لوحدها ومكنتش هتضر تدخل الحرب العالمية التانية ضد دول المحور ككل و بالتالى المانيا هى الى كانت ممكن تنتصر...
معلومتين تقال بمعنى الكلمة معلومتين من الى بيغيرو خريطة الكوكب... الإنبهار الحقيقي بقى من لما تعرف انه جاب المعلومات من المصدر نفسه
زورجا كان مجند الجيش الالماني لحسابه بدون ما يعرفو... السفير الالماني فى اليابان مكنش يعرف انه جاسوس فكان بيديله المعلومات باعتباره انه صحبه... الملحق العسكرى مكنش يعرف انه جاسوس وكان بيديله المعلومات باعتبارع انه صحاب السفير
" من حق بوتين انه ينبهر بيه ويعتبره مثله الاعلى خصوصا ان بوتين نفسه قبل ما يكون رئيس لروسيا كان ضابط فى الكى جى بى المخابرات الروسية
القارئ : امال انقبض عليه ازاى لما هو جامد اوى كده
الكاتب : هقلك
ريخارد زورجا او " ريتشارد سورج " نطق اسمه بيختلف من بلد لبلد... كانه بيحترموه جداً فى اليابان.. الراجل دكتور جامعى وصحفى وصديق شخصى للسفير الالماني وهو نفسه فى تعامله مع الشعب الياباني كان شديد الاحترام فكذلك الشعب الياباني وخصوصا المسؤلين كانو بيحترموه جداً لدرجه انهم كانو بينادوه بلقب " الهير زورجا " او السيد زورجا ( هير فى الالمانية يعني السيد و فراو يعني السيدة) وبعد ايام من وصوله اليابان سنة 1933 اتعرف على صحفى يابانى اسمه " اريتومي " اى حكاية الصحفى الياباني ده
كان مهذب جداً وحاول بكل الطرق انه يتصاحب على زورجا لدرجة انه عرض عليه يسهله اى خدمة داخل المجتمع الياباني بحكم شغله وعلاقاته كصحفى... لاكن من بين مميزات زورجا انه كان بيمتلك الحادسة السادسة حس من اول لحظة ان اريتومى ده مزقوق عليه من المخابرات اليابانية عشان يراقبه صحيح زورجا بالنسبة لليابان مواطن المانى وصديق شخصى للسفير الالماني فى اليابان لاكن بردو الامر ميسلمش المنطقة مولعة و الحروب فى كل حته فميش مشكله لما نراقبه ونطمن انه مش مزقوق علينا لذالك زورجا عامله معامله كويسه جداً لاكن كان طول الوقت حريص جداً فى كل كلمه بيقلهاله وفى النهاية يطلع ظنه فى محله لان لما اطمنت اجهزة الامن لزورجا الصحفى الياباني الى كان اسمه اريتومى اختفى فجاءة....
بعد ما عدت فترة تسكين زورجا فى المجتمع الياباني وخلاص صدرتله الأوامر انه خلاص يبداء ياسس شبكة تجسس ونجح فى ده فى وقت قياسى وشبكة التجسس مكونة من
1:صحفى يابانى
2: فنان تشكيلى يابانى
3 : مواطن المانى متخصص فى تقنيات الأتصلات اللاسلكية
4: مواطن يغوزكلافى متخصص فى التصوير الصحفى
و الحقيقة لما تراجع شبكة التجسس تلقيها بسيطة جداً لاكن فعالة جداً جداً عدد عناصرها قليل لاكن فيها كل الى محتاجه اى جهاز مخابرات
صحفى يابانى.. يعني ابن البلد وعارف عنها كل حاجه وشغلته كصحفى معناها انه يقدر يجمع اكبر قدر ممكن من المعلومات الصحيحة من مصادرها
اما الفنان التشكيلي الياباني فبرضو ابن البلد ده غير ان شغله كفنان بتمكنه بالوصول لصفوة المجتمع الياباني و بالتالى هيجيب معلومات محدش غيره يقدر يوصلها
و المصور الصحفى علشان يجمع صور احترافيه لجميع المنشأت الى محتجين نجمع عنها معلومات... مش بس كده دى وظفته كمصور صحفى اصلا بتسهله اجراءات التصوير
واخيرا فنى الأتصلات اللاسلكية عشان التجسس و التواصل مع المخابرات السوفيتية
من الاخر شبكة تجسس لو كانت استمرت فى شغلها على الاراضي اليابانية وقت اطول كان ممكن الاتحاد السوفيتي يكون له اليد العلياء فى الحرب العالمية التانية.... و..
نعم عايز ايه... ده وقته ده.. اتفضل
القارئ : هو ايه الى وقعه وازاى شبكة التجسس دى اتكشفت
الكاتب : لو كان صبر القاتل على المقتول كان مات لوحده
القارئ : ( ماسك خرزانة فى ايد وبيخبط بيها على الايد التانية) مسمعتش إجابة سؤالي
الكاتب : ( بلع ريقه) حاضر حاضر هكمل اوووف
زورجا بعد ما اسس الشبكة ونجحت فى البدايه نجاح مبهر ابتدت عناصرها تزيد خصوصا بين الصحفيين و الفنانين.. لدرجة ان مع بداية الغزو الالماني لبولندا زورجا قدر يوصل لمعلومة تقدر توصفها بانها من كلاسيكيات التجسس فى الحرب العالمية التانية...
المعلومة كانت بتقول ان " هتلر " اتصل باليابان يطلب منهم مشاركته فى غزو الاتحاد السوفيتي
القارئ : ما دى معلومة عادية اى العبقرى فيها يعني
الكاتب : انت صح... لاكن خدالتفاصيل الجاية دى
" هتلر " قال لليابان انه ناوى يهاجم الاتحاد السوفيتي من جهة " موسكو " و " ستالينجراد " وانه هيسيطر على مناطق زراعة القمح و هياسر مليون جندى روسي عشان يستخدمهم فى الزراعة و الصناعة... لاكن رد اليابان كان هو المهم فى كل الى فات
اليابان قالت ل " هتلر " انها موافقة على المشاركة فى غزو الاتحاد السوفيتي لاكن عندها شويه شروط
الشرط الاول انها مش هتشارك فى غزو الاتحاد السوفيتي غير لما تضمن ان "هتلر" احتل موسكو بالكامل
الشرط التاني ان الجيش الالماني يفضل يضرب فى القوات الروسية الموجودة في الشرق لحد ما الجيش الياباني يضمن ان عدد قواته بقى ثلاث اضعاف قوات الاتحاد السوفيتي برضو فى منطقة الشرق
الشرط التالت و الاخير ان تقوم حرب اهليه فى " سيبريا " عشان الجيش الياباني يضمن ان فيه حالة انقسام داخلى فى سيبريا و بالتالى يبقى سهل عليه يدخل يضربها
( والحقيقة انا مش عارف لما الجيش الالماني هيعمل كل ده الجيش الياباني هيعمل ايه هو انا هحارب لوحدى ولا ايه يا امبراطور)
القارئ : طيب المعلومة دى بقى ليه من كلاسيكيات التجسس فى الحرب العالمية التانية
الكاتب : لانها كانت سبب رئيسي فى ان ستالين ينقل قواته من سبيريا عشان تشارك فى تامين موسكو ( اخيرا صدق ان " هتلر " بيحاربه وبدا خلاص يستغل معلومات جواسيسه) وينقل قواته الموجودة في الشرق عشان برضو تشارك فى تامين موسكو
القارئ : نقل قواته للشرق ازاى اذا كان فى قوات يابانية موجوده فى الشرق ومتمركزة فى منشوريا ( منشوريا الى اليابان محتلاها فى الصين كلمتك عنها من شوية )
الكاتب : ما دى اهمية المعلومة خلاص الاتحاد السوفيتي انه رغم وجود قوات يابانية فى المنطقة دى الا انه اتاكد من معلومة زورجا ان اليابان مش هتدخل الحرب الا بوقوع موسكو و بالتالى لازم موسكو متوقعش موسكو لو وقعت الاتحاد السوفيتي كله هيقع موسكو مينفعش تقع...
وهنا المؤرخين بيوصفو الصغيرة و البسيطة دى بانها كانت السبب الرئيسي فى تغيير مجرى الحرب كلها وبعد ما كان " هتلر " بيمتلك عنصر المفائجة قدرت القوات السوفيتية تهزمه فى موسكو رغم ان القوات الالمانية كانت وصلت لحدود 30 كيلو بس من موسكو لدرجة ان القيادات الالمانية كانت قادرة تشوف البيوت بالعين المجردة خلاص موسكو هناك اهى ورغم ان الجيش الالماني كان بيهاحم موسكو ب 1700 دبابة و مليون جندى فى حين ان الجيش السوفيتي كان بيدافع ب الف دبابة بس الا ان الجيش السوفيتي بفضل المعلومة الى جاتله من زورجا قدر يجمع مليون و 250 الف جندى لحماية موسكو وقدر ينفذ هجوم مضاد ضد الجيش الالماني ويطرده برة حدود موسكو مرة تانية " هتلر" كان هيتجنن ( المعلومة اقوى من الجيوش معلومة واحده قدرت تهزم الجيش الالماني فى معركة موسكو معلومة واحده قدرت تهزم مليون جندى و 1700 دبابة التخابر يا جماعة عشان كده انا عملت السلسلة دى)
القارئ : طيب نيجى للسؤال المهم ازاى اتقبض على زورجا
الكاتب : فاكر لما قلتلك انه بدا يكبر شبكة التجسس ويضملها صحفيبن و فنانين كان من بينهم فنانة تقدر تقول انها حبيبة خبير الاتصالات اللاسلكية غلطت غلطة واحده
وهى انها كانت بتشيل الدولارات الى بتقبضها من التجسس فى شنطتها وتتباهئ بالدولارات قدام صحابها ( البنات يجماعة) فما كان من واحده صاحبتها بتغير منها الا انها بلغت عنها المخابرات اليابانية ( لو بتفكر تشتغل جاسوس اوعى تصاحب اوعى) تقوم المخابرات اليابانية تقبض عليها عشان تعف مصدر الدولارات فتعترف على حبيبها الى هو خبير الاتصالات اللاسلكية
وهنا كانت الغلطة الوحيدة الى غلطها زورجا فى تاريخه الاستخبراتى كله انه مهربش حتى بعد ما عرف ان الجاسوسة دى اتقبض عليها هى و خبير الاتصالات
القارئ : ليه مش هرب
الكاتب : لانه كان متاكده ان الرفيق ستالين مش هيتخلئ عنه وان الاتحاد السوفيتي هينقذه باى شكل وباى طريقة كان متاكد ان المعلومات الى قدمها للاتحاد السوفيتي وغيرت مجرى الحرب العالميةالتانيةكلها هتكون سبب ان الرفيق ستالين يتدخل ويرجعه فى عمليه لتبادل الاسرئ لاكن الى حصل كان مفاجأة
الرفيق ستالين لما بلغوه ان العميل زورجا اتقبض عليه وهيتعدم رد بجملة واحده
الاتحاد السوفيتي ميعرفش حد بالاسم ده
وتكون النتيجة ان المخابرات اليابانية تعدمه يوم 7 نوفمبر سنة 1944 ( انا الجزء الى فات اتلخبط وقلت 1947) بعد ما قدم لبلده الاتحاد السوفيتي الى الرفيق ستالين نفسه مقدرش يقدمه..
لاكن لان ر** اسمه العدل تدور الايام و السنين وبعد ما يتخيل الرفيق ستالين ان زورجا هيتنسى ويفضل هو بس رمز الاتحاد السوفيتي فى كتب التاريخ يجى الرئيس الروسي فلادمير بوتين فى حوار تلفزيونى قدام العالم كله ولما يسالوه مين هو مثلك الاعلى ميقلش ستالين لاكن يقول الجاسوس ريخارد زورجا وفى اقل من لحظة يعرف العالم كله مين هو ريخارد زورجا وازاى قدر يخدم شعبه
اوعى تكون فاكر ان فى حد يقدر يزيف التاريخ مهما تكون قوتك مهما يكون نفوءك خليك فاكر ان التاريخ مبيرحمش والى بتعمله النهارده الى هيحكيه الناس بكره...
كده يا شباب نكون خلصنا قصة زورجا المرة الجاية بقى هنكون مع قصة " عملية الفراشة " واسف على الاخطاء الاملاءية وياريت تكتبو رايكم بصراحة ❤
