لو الراجل بيعشق بعينه وقلبه ، فالبنت تعشق بأذنها و قلبها والاختلاف في الموضوع ده ، ان البنت ممكن تبني قصور عشان ترضي حبيبها ولكن غالبا بتكون رملية بتقع مع أول هبوب للرياح الحياتية ، وعشان كده موضوع النهاردة هيكون للبنات فالبنت تختلف عن الراجل في المشاكل العاطفية والتي لا تعد ولا تحصى ، ولكن في المشاركة دي سنلقي الضوء علي أبرز المشاكل اللي بتقع فيها البنت وللاسف بتكون الطرف المظلوم
🥰اول مشكلة من المشاكل عزيزي القارئ الجميل
المراهنة علي المستحيل: دايما البنت بتسلم قلبها ومشاعرها قبل ما تستكشف الطرف التاني بعقلها ، فبتقع أسيرة قلبها ومستقبلها ، عشان ترضي عواطفها للاسف الشديد بتحاول تتجنب معظم المشاكل من أملها في تحقيق أحلامها المثالية مهما كان الواقع حتي لو مش مبشر بالخير. فكام مرة بتسمع أن بنت وقعت في غرام راجل متزوج بيوهمها أنه هيطلق مراته عشان خاطر عيونها (ياسلااام علي الحب ياسلااام 🤧) وتستناه؟
او انها دايما بتستقبل اوسخ الإهانات الممكنة والخيانة مرة تلو الأخرى و المصيبة بتسكت لانه بيتأسف وبيوعدها أنه هيتغير وهي ! بتراهن ..؟
تصدق كل ما تسمع: من مميزات الراجل ، أنه بيقدر يربط الكلام بالفعل قبل ما يصدق اللي بيتقاله أو يكذبه . لكن احنا كبنات ، كلمة واحدة بتقدر تحط في عقولنا ألف اعتبار وقرار. بنصدق كل اللي بيتقالنا ، بنتعلق بالكلام ومش بنقدر نقرأ بين السطور وخصوصا لما يكون له علاقة بالحب ، بنكذب عيونا ، مش بنقبل اي نصيحة من اي شخص لغاية ما نقع في الفخ الأكبر حب كبير ومستقبل مرير
عارفه زهقت والموضوع طويل معلش استحمل اختك ♥️
تضحي بما لا يحمل التضحية: من الجانب الايجابي جدا أن البنت تضحي بالاستايل بتاعها وممكن بالفلوس عشان خاطر حبيبها ، ولكن مينفعش ابدا أنها تضحي بمبادئها و اللي اتربت عليه وأحلامها وكرامتها عشان خاطر اللي بتحبه ، عشان اللي بيحبها بجد هااا بجد هيحترمها وهيحترم أحلامها و هيقف جنبها لتحقيقها ويحافظ علي كرامتها، ودايما قبل ما البنت ترتبط بتحط قوانين وحدود ولكن بعد الارتباط بتنساها كلها
____________________________________
الموضوع ده مكتوب مخصوص عشان أوجه كامل شكري وامتناني لأختي العزيزه
@مجنونة مطرقعة
لترشيحي وفوزي أنا وأخي الغالي
@بيكهام الاسمرر
بلقب فضفضاوي مميز وكامل الشكر لطاقم الإدارة والمشرفين علي الدعم الذي أكن له كامل التقدير والشكر
_______________________________
تتفق ام تختلف مع الموضوع مع ذكر السبب ؟
اقتراحاتك وهل يوجد حل لهذه المشاكل العاطفية المنتشرة؟
بحبك♥️
