عاشت طول عمرها تدي اﻷمل والطاقة الإيجابية لغيرها ..وكانت في عز وجعها بتخبي عن أقرب الناس ليها .. بس مكنتش واخده بالها من حاجة مهمه ،، يمكن صحيح بتدي النور لكل اللي يقرب منها لكن جواها منطفي ،، جواها بيخلص واحدة واحدة .. طاقتها بتقل مع كل دقيقة بتمر عليها ...
وفاجئة لما خلصت ملقتش حد حوليها . كل اللي كان متجمع حوليها راح يشوف النور في حتة تانية .. وبقت هي مصدر الكأبة والحزن والإنطفاء عندهم .. محدش فيهم افتكر لحظة وقفت جنبة .. وﻻ كلمة حلوة قالتها في عز وجعها عشان تخفف عنه ..
ببساطة دي حكاية أنا شخصيا كشاب شوفتها قدامي وشغلت تفكيري طول اليوم النهارده وقررت أكتب عنها كنموزج وراه سؤال :
أنا لو وقعت هﻻقي كام واحد حولية ؟!
كام واحد هيبقي مستعد يقومني من وقعتي ..واحد .. اتنين .. بالكتير تﻻتة .. رغم كل اللمة الكدابة اللي حولية دلوقت ؟!!
طب الناس القليلة اللي هتقف جنبي دي هتفضل لحد أمتى .. يوم .. أسبوع .. شهر .. وبعدها هيمشوا ؟!!
باختصار مش عيب تدور علي طريقة تشحن بيها طاقتك من تانى .. مش عيب يكون في بعض اﻷحيان عندك نوع من اﻷنانية وحب الذات وتفكر في نفسك وبس .. علي اﻷقل عشان تقدر تكمل وتدي زى ما اللي حوليك اتعودوا منك
