مكتملة واقعية رواية الجريمة الغامضة - أربعة عشر جزء 24/2/2024

[THE GHOAST LOVE]

الجزء الأول من رواية الجريمة الغامضة​

دقة الباب بحذر وخوف وكأنو بدق باب الموت!! وبعد النقرة التالتة سمع النبرة الحادة ديك لمن جسمو ارتعش وصاحب الصوت طلب منو يدخل وقبل ما يفتح خشمو المحقق علي الحاج كانت تقطبات جبينو ظاهرة ونهر خادمو وقال يا زفت ما قلت ليك لو ماتت امي ما تقطع لي نومتي!!؟
خادمو وهو منزل راسو اعتذر وقال ليهو جنابو مرتضى اصر علي اصحيك!! الحاج صلح قعدتو وقال ليهو منتظر برا!! الخادم مدا ليهو التلفون!! قبل ما ينطق بكلمة خطف السماعة من يدو وكالعادة بدا يشتم ويسئ للخادم!! وداك بدورو طلع من الغرفة بدون ما يجادل ولا يرد!؟
الحاج اخد نفس عميق وقال الووو!! المتصل بقى يضحك وقال ليهو ان شاء**** تموت عشان تريح الناس من شرك! الحاج ضحك بقهقه ومسح على صلعتو واتبادلو الشتائم اولا حتي سلمو على بعض!! الحاج قال ليهو اكيد ما اشتقت لي!! وريني متصل لشنو!؟؟ جنابو مرتضى قال ليهو من يومك كعب ولئيم بس اتعودنا عليك! لكن المره دي عندك حق!! الحاج ابتسم وقال ليهو احكي سامعك انا!! جنابو مرتضى حكي ليهو انو في وفاة حصلت في المنطقة الفلانية واخو المرحوم يشك انها بفعل فاعل لانه اخوه اعدائو كتار وكان مهدد بالقتل!! واتصل علي من روسيا قال اكلف اكبر محقق يشوف الموضوع دا وخطرت على بالي ي ود الح**ام!! الحاج إبتسم بخبث وقال ليهو انا في عطلة ما عايز اشتغل في الفترة دي شوف واحد غيري!! جنابو سكت مسافة وقال ليهو حيدبسك تمام!! الحاج ضحك وقال ليهو انا اتجاوزت مرحلة اني اشتغل عشان القروش!! الخير باسط والحمدلله ..جنابو ضحك وقال ليهو اصلك كوز عفن ونسفت البلد!! بس انا عارف انت بتحب شنو!؟ عندهم بلي زي البلي!! تستمتع اخر متعة!!
الحاج قام في نص السرير وابتسم بخبث وضرب على كرشتو المانعة ديك وقال ليهو كبرنا على الحاجات دي ياخ!!؟ بقيت شيخ انا!! جنابو ضحك وقال ليهو انت الثعلب ولا نسيت!!؟
الحاج شال نفس عميق وقال ليهو قلت لي مات وين وسبب الوفاة شنو!!؟ مرتضى ضحك وقال ليهو **** يقتلك صحي صحي ويريح الناس منك!! اتبادلو الدعابات وجنابو حكي ليهو مختصر المحضر..وقام يجهز نفسو عشان يسافر المنطقة المعنية!!
قبل م يدخل الحمام. كلم الخادم يجهز ليهو شنطتو ويخت ليهو ملابس تخليهو يبقي في الاربعين من عمرو الخادم ابتسم وقام يجهز الملابس …هو حكحك دقنو وصبغ الشعر ولبس كاب صغيير عشان يداري على الصلعة!! وطلع السواق جهز العربية بس ابا يمش بيها لانو مرتضى وراهو انو المنطقة ديك كعبة في الخريف وماف عربية بتمش الا بالبوابير!!؟ لكن وصلوه الميناء والباص اتحرك بيهم لحدي ما وصل اخر محطة ليهو…ومن هناك لقي عسكري مرسلو ليهو مرتضى وركبو في البابور واتحركو قرابة العشرة كيلو في الوحل والمجغ والحاج شمى الوضع وسب للقضية وللمرحوم ولمرتضي لحدي ما وصلو!! بداية قرية كدا بس البابور وقفهم برا الحلة والحاج ما ناقش حاجة وبعاين للعسكري! تلب من البابور وقال ليهو وصلنا ي سعادتك!! الحاج عاين حولينو. وشاف الطين والخدار واصوات الضفاضع!!وقال بإشمئزاز انا انزل هنا!! ضحك عليهو الركاب ودا الشي الزعلو اكتر.. بتاع البابور هاج فيهو وقال ليهم الزمن يا اخوانا السحابة شايلة وورانا اشغال!!
في النهاية نزل وكفكف بنطلونو وشال جزمتو والعسكري شايل ليهو شنطتو في راسو ووصل الحلة وهو بناهج بالرغم من انو المسافة ما طويلة بس الرجل بتتلكك في الطين وبعد صعوبة حتي بينتلها من الارض وصل عضلاتو ممزقة عديل وبيشتم وبسب في جنابو مرتضى والعسكري بيضحك لحدي ما وصلو بيت العزا ولقو الرجال رامين الفراش وكل الانظار اتجهت على الحاج!
نواصل بعدين..
يتبع …….

الجزء الثاني من رواية الجريمة الغامضة​

الحاج جدع الجزمة بزعل وعيونو زي الجمر والصداع عايز يشق راسو!! وما عندو اخلاق يتكلم مع زول ولو م خجل الفاتحة زاتو م كان عايز يشيلها!! الناس فضلوه وقالو جابو الطريق ولا يمكن يكون بيعرف المرحوم!! قعد ف كرسي ومدد رجولو وصقع رقبتو وبيقنت!! العسكري ابتسم وقال ليهم دا جنابو علي الحاج كلفو حسين يحقق ف وفاة المرحوم ويشوف سبب الوفاة شنو!!؟
كلهم بقو يتشاوفو وقالو قدر **** بدورلو تحقيق!! الحاج م اشتغل بيهم وقال ف سرو دي شنو المصيبة الورطت فيها نفسي دي!! وبالرغم من انو كان جيعان وتعبان بس كان قرفان من نفسو ومن الطين الكاسي جسمو وطلب منهم يودوه اقرب حمام عايز يتحمم!! فعلا ف راجل كدا نادي ليهو شاب واقف برا الصيوان وقال ليو جهز لجنابو الحمام!! الشاب اتحرك والحاج بعد تعب حتي قدر يقوم من الكرسي وجرجر رجلينو وتبع الشاب ووراهو العسكري شايل ليهو الشنطة لم وصلو وف اثناء م بطلع ف ملابسو من الشنطة اتصل مرتضى للعسكري بتاعو يطمئن على صاحبو ومن العسكري قال ايوا وصلنا سعادتك الحاج خطف منو التلفون وقال للعسكري سد اضنينك وبقي ينبز ف صاحبو نبز لا **** يرضى ولا الرسول يرضى خلي العسكري يخت يدو ف راسو ويقوم جاري وبيضحك.. بعد م محققنا انفشى في صاحبو اخد ليهو حمام والموية كانت باردة والحمام كلو طين ومجغ لقي ليهو جلابية معلقة شالها فرشها في ارضية الحمام وطلع فيها واستحمى..!
بعد طلع وغدوهم واكرموهم اخر كرم اخو المرحوم اسمو حسن قال ليهو انت بتعرف حسين من وين ولشنو هو قال يحققو في ميتة اخونا محمد!!؟ الحاج قال ليهو و**** السؤال دا تسألو لاخوك بس لو م كانت القضية ملابساتها غامضة ما كنت قبلتها ومن خلال سماعي للحادثة شكيت في اسباب الوفاة وانا هنا عشان اتأكد بس!! نطا واحد كدا قال ليهو بس نحنا دفنا المرحوم من امس! حتنبش الجثة!! الحاج ضحك وقال لا بس تقرير المشرحة بكون موجود!! في راجل كبييير كدا في العمر قال ليهو نحنا ما بنلعب بالموتي وما بنشرحهم! دفناهو ساكت وما اول زول يكتلو دبيب!! الحاج قال للعسكري صاح الكلام دا!! هز ليهو راسو بمعني نعم.. الحاج قال ليهو جيب لي صورة من المحضر..العسكري قال ليهو الوقت اتأخر الا الصباح ماف بابور بيجي اسسسه عشان يمشي القسم!! وغير كدا الجماعة ديل الكهرباء لسه ما جاتهم وضلام الخريف شييين وما بتقدر تشوف شي.. الحاج حمر ليهو وقال عشان لابس نظارة قايلني ما بشوف! العسكري ابتسم وقال العفو منك جنابو.. الحاج عاين للناس وقال للعسكري تعال!! لم قرب عليهو قال ليهو براحة كدا شنو شابكني جنابو جنابو من الصباح!!؟ دي قولها لمديرك الم**رص مرتضى !! العسكري ضحك وقال ليهو لو قلت ليك ي محقق ناسنا ديل م بعرفو يعني شنو محقق بس لو قلت جنابو معناها تابع للحكومة وبيتعاونو معاك!! الحاج قال اهاااا وهز راسو وقال ليهم معليش بودي اتونس معاكم بس مشوارنا كان طوييييل وبكرة حارسنا شغل كتييير اسمحو لي انوم!!
بالجد كانو ناس طيبين جابو ليهو احسن فرش وغطي وبطارية وملو ليهو ابريق جنبو وبالصراحة هو ما متعود الطيبة المفرطة دي وفي كل حاجة يعملوها ليهو بيتفاجأ بيهم اكتر..!! دقايق م تماها ونام.. ما صحي إلا مع **** الصبح!! قام وصلي معاهم واتبادلو اطراف الحديث وسألهم عن المرحوم وعن علاقاتو. ومعارفو وطباعو وم خلا حاجة م سأل عنها لحدي م الواطا صبحت وهم ف نفس السيرة.. وكل واحد بيمدح ف المرحوم براهو ف حاجات صدقها وف حاجات ظاهر انهم بالغو ف وصفها.. طلع يتمشي وسأل واحد مش امس جات مطرة!! وداك اكد ليهو انو اي جات!! استغرب وقال ليهو طيب لشنو الشوارع م فيها موية راكضة ولا مجغ!! الراجل ضحك وقال ليهو ارضنا كويسة بتمتص الموية سريع!! الحاج صر حواجبينو وقال ليهو طيب الشارع البرا دااااك النزلونا فيهو داك مستوردنو من اثيوبيا!! الراجل ضحك لمن كحة وقال ليهو داك طينتو كعبة بادوبا لايوقة جابها الخور وكمان مشي العربات برضو ليهو تأثير!! المهم الراجل وقف بيتكلم مع زول والحاج م انتظرو لاقاهو واحد كدا سواط ولسانو خفيف قال ليهو انت الضيف الجاي من الخرطوم عشان تشوف محمد مات كيف!! الحاج ابتسم وقال اي!!

الولد بعد اتلفت يمين وشمال حتى قال ليهو بركة المات بتاع مشاكل وعوين!! الحاج ابتسم وقال ليهو يعني يمكن تكون كتلتو انت!!؟ الولد نطط عويناتو وقال ي زول مالي ومال العفن!! انا ف حالي!! كديسة م بكتلها الا عارف اخبار الحلة دي جت عليها!! الحاج شال نفسو وقال بينو وبين نفسو كويس اني لقبتك حتسهل علي الامور! قال ليهو طيب بتعرف شنو عن محمد المرحوم! قال ليهو شفت الكلام القالوه ليك ف محل الفراش دا. نصو كضب!! الحاج ضحك وقال ليهو اهاا وريني انت!؟ الولد شنق طاقيتو وشال عصايتو ف نص ضهرو وبقي يحكي للحاج والحاج مرة يندهش ومره يضحك ومرة يصروشو والولد مندااااح ف السواطة.. ولفو الحلة كلها وكل ما الحاج يشوف ليهو مرة يتبسم ويتبعها بنظراتو وبقول بينو وبين نفسو مرتضى الوسخ طلع كلامو صحي! المهم عن. طريق عوض السواط الحاج اتضحت امامو الصورة ووسع دائرة الشكوك عندو!! ورجع بيت العزا بعد الفطور ولقي العسكري جاب ليهو صورة من المحضر ومعاها صور للمرحوم بعد الوفاة ولقي في التقرير انو سبب الوفاة عضة ثعبان في الرقبة وماف اي اثار اعتداء او مقاومة!! قرا الملف وشاف صور المرحوم وقال وين الثعبان عايز يشوفو!! وقرا في المحضر انو اخو المرحوم هو اول زول بشوف المرحوم وهو القتل الثعبان!! طلب يشوفو برضو!! واكتر شي لفت انتباهو انو المرحوم. وشوو كان متورم ولونو مخدر اكتر من عنقة لانو العضة كانت في الرقبة!! قالو جدعو الدبيب في شجرة الطنطب. وم عارفنو لو لسه موجود ولا اكلو حيوان ولا مصيبة زمان!!
وهو بنفسو مشي معاهم ع الشجرة وشافو معلق فوق في نص الشوك زي اللحمة العايزين يجففوها!؟ !! طلب من العسكري ينزلو وفعلاجرا ليهو قناية وسحبو وكلهم مستغربين من الحاج عايز بيهو شنو!! قال ليهم دي كوبرا مشش!! العسكري قال ليهو هنا بقلو ليهو الدبيب ابودرق.. الحاج قال ليهو وديهو لي هناك وسألهم اذا شالو عينة من الدم عشان يعرفو مقدار السم ونوعو!! بس العسكري نفي ليهو ناس الاقاليم ديل بيدفنو ساي وم بيعملو حاجات زي دي ولا بعرفوها!! اصلاماف زول قال شاكي في الموتة دي الا انت!! الحاج ابتسم قال ما انا انا مجرد محقق ومكلف من قبل حسين شقيق المرحوم!! المهم حنشوف مات كيف وهل قضاءوقدر ام بفعل فاعل!! وشال الثعبان في كيس ومشي بيهو قسم الادلة الجنائية ف الولاية ديك وما كان خايف إلا من طريق الرجعة لو جات مطرة!! بس مستحيييل يلعب ف شغلو مهما واجهتو مصاعب ووصل المقر باع الادلة وهنا كانت المفاجأة!! !
نواصل بعدين.
يتبع ……..




الجزء الثالث من رواية الجريمة الغامضة
ف اثناء ما هم راكبين الحاج كان بعاين لصور المرحوم وبيقرا في اقوال اخوه وبعض الحاضرين! ! وفتح الكيس الفيهو الثعبان واداهو نظرة متفحصة!! العسكري سألو في حاجة ي جنابو!!? الحاج عاين بشباك العربية وما ردا! بعداقل من دقيقة قال ليهو انت الثعبان بياخد كم يوم حتي يبدي يتحلل!!? العسكري ابتسم! اوكانت نظرة عيونو بتقول وانا البعرفني شنو!!? الحاج قال ليهوسؤال غبي مشش!! وقبل ما العسكري يرد عليهو وصلو.. الحاج دخل مقر الادلة الجنائية وقصد مباشرة قسم السموم!! واتضح انو تلاتة ارباع التيم العامل هناك بيعرف الثعلب الحاج وسمعو عن قصصو مع الجرائم وواحد من شدة م انبهر بوجودو جاهو ملهوف قال انا ما حصل مشيت لمسرح جريمة وإلا اصطحبت معاي افكارك!! واسلوبك المميز ف فك شفرات الجريمة!! الحاج مبسوط يوزع في الابتسامات ساااي!! لحدي ما طلعت النتيجة من المختبر، والحاج مشى مهرول عشان يستلمها!! وقال اها!! الضابط قال ليهو حتستمتع بالقضية دي!!؟ الحاج ابتسم وعرف رد رئيس القسم! انو محمد مات بفعل فاعل؟ الحاج قال ليهو يعني شكوكي في محلها! الضابط قال ليهو كما عهدناك يا استاذنا…وقرا التساؤلات ف عيون الحاج مات كيف!!؟ الضابط اخد نفس عميق! وقال السم النزعناه من الثعبان كان بسييط هو قاتل بس الاعراض اختلفت! من المفترض بمجرد دخول السم للجسم تحصل تشنجات وانفجار ف الاوعية الدموية اي خروج الدم سوا كان بالانف ا و الفم او الاذن! بس وبمجرد م شفنا الصورة استبعدنا انو دا بفعل الثعبان دا!! لانو م بغير لون الاطراف ولا بورم بالصورة دي…ولو كانت الجثة موجودة ولا بس عندنا عينة من الدم كان عرفنا نوع السم شنو!؟ الحاج شكرو وقال ليهو انا من شفت عيون الثعبان عرفت انو م اداء الجريمة اوبالاصح م هوالسبب الوفاة؟ !! واحد من الفريق فتح الكيس وعاين لعيون الثعبان وما لاحظ شي!! الحاج ابتسم وقال ليهو دي حاجة م عايزة ليها قراية عيون الثعبان إتقددو!! فمستحيل يكون هو العض محمد لانو ظاهر عليهو ميت ليهو اكتر من اسبوع!! والوفاة من تلاتة يوم بسس!! فراجع معلوماتك حتلقي. ماف مخلوق ع وجه الارض. عينو حتتقد بعد وفاتو مباشرة او بعد يومين من الوفاة!! اسبوع كحد ادني!! الضابط سلم على الحاج بإعجاب شديد وقال منك نتعلم استاذنا..رئيس القسم قال ليهو حتتعامل مع مجرم ذكي ودرس جريمتو وخطط ليها بإحترافية لكن برضو ما كان متوقع ولا عارف انك انت الحتمسك القضية!!الحاج ابتسم وقال ليهم ما تبالغو نحنا مكملين لبعض وانتو اهم مننا لانو لولاكم ما كان عرفنا انو مات بفعل فاعل! ناهيك عن اخذالبصمات والكلام المعقدداك!! الضابط دردش معاهو وبادر بالمساعدة وقال للحاج ممكن تاخد معاك مساعدين بس الحاج شكرو وقال اذا احتاج ليهم م حيتردد بطلب مساعدتهم…وودعوه ومسك كتف مساعدو و طلعو من الادلة الجنائية ورجعو على القرية وبفكر في القاتل الذكي دا منو!!؟ لم وصل لقاهم رفعو الفراش بس لسسسه الناس كتار وكانو مات اليوم!؟
اخوان المرحوم واهلو منتظرين الحاج يأكد ليهم انو مات موت **** والرسول بس فاجأهم بانو مات مقتول وانو قريييييب حيعرف المجرم منو! اتخلعو وما صدقو وقالو. ليهو لقينا الدبيب جنبو وعضتو في ف رقبتو وتقول مقتول!! انت جنيت يا جنابو؟؟! العسكري نهرهم وحذرهم من انهم يتجاوزو حدودهم مع الحاج وفعلااتراجعو بس لسسسه فايرين وهايجين وما مصدقين انو مات مقتول!! والخبر انتشر في القرية بسرعة البرق!! والحلة كلها اتكبت في بيت المرحوم!! العسكري استاذن الحاج انو يستدعي قوات امنية بس رفض وقال دا تصرف طبيعي ومتوقع!! ولدهم وود حلتهم فلازم تكون دي رده فعلهم بس كدا حيدعموني وحيزعزعو لي الجاني!! لانو ما كان متوقع انو الجريمة تتكشف!!
الحاج اتكلم مع عم المرحوم وقال ليهو دي جريمة قتل ولازم تتعاونو معاي عشان اقدر اكشف الجاني!! العم اكد ليهو انو حيحصل على كافة الدعم المطلوب واذا ولد اخوه مات مقتول لازم القاتل ينعرف ويتعاقب!!
الحاح شكرو!! وقال ليهوحنبدا طوالي عايز اخو المرحوم القتل الدبيب عايز اعيد استجوابو!! وامر العسكري انو يتصل لرئيسه مرتضي ويفتح بلاغ تحت المادة130جنائي..وقبل م يبدا استجوابو جابو ليهو الغدا واكرموه حتي مشو ينادو ليهو اخو المرحوم عشان يستجوبو!! وكان المتهم الاول في نظر الحاج لانو الثعبان كان ميت سلفآ وهو كذب ولا. إدعى انو قتلو بنفسو بعد هجم على المرحوم!!؟ المهم ف اقل من عشرة دقايق اخو المرحوم جا وكان خايف!! وبلجلج والقعاد غالبو!! الحاج قال ليهو اتفضل!! وطلب من العسكري يكب ليهو شاي!! عشان يركز كويس!! وبدا يستجوب ف خالد اخو المرحوم الإدعي انو قتل الدبييب!! واول كلمة قالها ليهو **** يصبركم ويجبر كسركم!! بس خالد كان متوتر وقال بخلعة اخوي ما مقتول انا شفت الدبيب!!
الحاج ختى كباية الشاي من يدو وقال ليهو شفتو ولا قتلتو!!؟
نواصل بعدين..
يتبع ………




الجزء الرابع من رواية الجريمة الغامضة
حالد قام على حيلو وبقى يعاين بخلعة مره للحاج ومره للعسكري!! الحاج قال ليهو اهدا يا خالد واحكي لي الحصل من اولو وانت عملت شنو بالضبط!؟ خالد دمعتو جااات جارية وقال اخوي اصغر واحد فينا رغم انو متهور ومشاكلو كتيرة مع الناس إلا ولا مره ما حصل رفع صوتو علي!؟ ودنقر بيبكي!! الحاج ربت على كتفو وقال ليهو شد حيلك! اخوك مات مقتول ولازم تساعدني عشان اعرف القاتل!! خالد هدا شوية وطلع من الغرفة غسل وشو…خلا الحاج ومساعدو بيتشاوفو!! لم جا راجع قال للحاج قبل يومين وانا نايم سمعت حركة وكلب عثمان جارنا كان بينبح شديد!! ومع الضلام داك زي الشفت لي زول ختم في الحوش!؟ قمت وولعت بطاريتي وكانت بتكنتك حجارها نازلات ما ولعت كويس وقلت دا منو وناديت محمد بس ما ردا علي!! سكت…الحاج قال ليهو كمل وبعداك حصل شنو!؟ خالد قال ليهو طقطقت بطاريتي ومشيت عليهو هو ما حصل رقد جوة البيت بيرقد في الحوش بس جات مطرة عشان كدي خشى على بيتو!! ناديتو محمد محمد!! م ردا انا قلت بكون دا هو الطلع دا!؟ بس السماء برق لمن كشف الواطا!! وشفت زول راقد لم دخلت وضويت بطاريتي شفتو راقد والدبيب راقد ليهو ف صدرو!! انا خشتني خوفة وحاة اسم **** لو ضربت صاقعة ما كان انهجمت قدر دا!! وانا من يومي بخاف الدبايب وما اكضب عليك كوركت ما قدرت اسيطر على روحي وجريت عليهو وخبطت الدبيب بالنعال!! الحاج ابتسم قال ليهو يعني قتلت الدبيب بجزمة ولا غيرو!! خالد قال ليهو لا بس اتخلعت وما عرفت اتصرف!! وهي النعال ضربت المرحوم ما هبشت الدابي!! ومع كواريكي ديك جو جارين الناس من الجامع!!؟ الحاج قال ليهو ايوااا بس وريني منو ومنو والقتل الثعبان منو!؟ خالد قال ما متزكر كويس بس لم كوركت قلت شينة في حقي يجو يقتلو لي الدبيب هم!! ونسوان الحلة بشيلن حالي!! فجبدت عصاية المرحوم وبقيت اضرب ضرب خوف وماني خابر كان ضربت الدبيب ولا طرف السرير إلا الدبيب وقع بدون حركة!! وجوو البقية تمو الباقي!! الحاج قال ليهو ما وريتني منو الجا!! خالد قال عثمان جارنا ومحمود جارنا تالت بيت مننا ونفرين من الحلة كانو ماشين على الجامع!! الحاج شال نفس عميق وقال للعسكري لشنو الكلام دا م اتزكر في المحضر!!؟العسكري هزا راسو وقال م عارف منو الاخد اقوالهم..خالد قال ليهو خلاص انتهينا!! الحاج مسح على صلعتو وعاين لخالد في عيونو وقال ليهو بعداك الحله جمهرت وقالو محمد اخوك كتلتو الدبيب وانت قتلت الدبيب!! خالد قال بالضبط دا الحصل وعثمان ومحمود هم الشجعوني وورو الناس اني قتلت الدبيب وقالو لم جو لقوني منتهي منو!!؟ الحاج قال ليهو موقفك بطولي ورغم خوفك من الثعابين جيت وحاولت تنقذ اخوك بس الحاجة القد تكون ما عارفها انو الثعبان كان ميت اصلا!! خالد اتخلع ونطط عيونو!! وقال الكلام دا كيف قلتو محمد **** يرحمو مات مقتول قلنا ماشي مصدقنك!؟ بس تقول الدبيب كان ميت من بدري دا كلام ما بخش العقل!! انت ما شفت جثمان اخوي بس انا بردتو بيديني ديل!! وخالد ما قدر يضبط اعصابو وجاش بالبكا وقال انا شفتو كيف ورم انا شفت عضة الدبيب ف رقبتو!! الحاج قال ليهو دا الشي الظاهر ليكم بس الما عارفنو انو ف زول لعب لعبة خبيثة وخطط لفعلتو دي!! خالد قال ليهو و**** ما يهدا لي بال إلا ينقبض الوسخ دا!! وكان منهار شديد!! الحاج مسكو من كتفو شديييد بس ما قال شي وطلع من عندو..العسكري قال ليهو انا شايف انو بريء وما اظن يقتل اخوة!! الحاج اخد نفس عميييق وقال وارد برضو بس لازم نخت احتمالية انو اختلق القصة دي كلها ويكون هو القاتل!! العسكري عاين للحاج بإستغراب..الحاج ابتسم وقال ليهو إتصل ع جنابو مرتضى لازم يجي!! العسكري قال ليهو تمام!! بس لو جا ممكن تشكرني ليهو عشان يديني إجازه عندي عرس اختي!! الحاج عاين ليهو بإستهتار كدا ولمن رفع حاجبو!! طوالي العسكري طلع وقال ف سرو دا شنو الانا قلتو دا الراجل اللئيم دا ما يمشي يغطس حجري..ماشي وهو.شارد البال لمن عتر!! الحاج طلع نظارتو لبسها وبقى يعاين للحيطة!! الناس بتلبس النظارة عشان تشوف كويس بس الحاج بيلبسها عشان يرابط خيوط الجريمة في رأسو والغريبة انو طريقتو بتنجح وبيبدا يحلل ويستنتج اسرع!! طلع ليهو دفتر صغييير من جيبو وكان كاتب في صفحة محمد!! رسم خط عمودي على الاسم وكتب خالد!! وشال نفس عميق وجا خاشي عليهو عم المرحوم قال ليهو اها وصلت لشنو يا جنابو!! الحاج قفل دفترو ورجعو جيبو وقال ليهو ياداب بدينا!! بما انها طلعت جريمة قتل لازم نعيد استجواب اي زول بتربطو علاقة بالمجني عليه!! العم قال ليهو اها ننادي ليك منو!! الحاج قام عدد حيلو وقال ليهو م اسسسه عايز اخد لي لفه في الحلة وبعداك جنابو مرتضي حيكون وصل! وبعداك حوريكم نعمل شنو!! وجا طالع!! بس وقف للحظة وإتلفت ع العم وقال ليهو على حد علمي انو المرحوم متزوج وين مرتو ووين كانت ليلة الجريمة!!؟ العم خبط عصايتو في الارض وقال ليهو دي قصة طويلة بس مرتو مختلفة معاه ولمن حصل بيناتهم طلاق بس رجعها قبل ما يموت ب يومين!! الحاج قال ليهو يعني يوم الحادثة كانت موجودة!!؟ العم قال ليهو لا ف بيت اهلها!! الحاج اومئ برأسو وطلع!! ماشي في الحلة وكل راجل يفضلو على البيت ف العايز يكرمو كضيف وفي بتاعين شمارات عايزين يعرفو صحي محمد مات مقتول والقتلو منو!! في اثناء ما هو ماشي شاف ليهو بت سمحة سماح!! لدرجة انو م قدر يشيل عينو عنها!! وهي عينها ما رفعتها وهو لحدي م لفت وهو إتلفت بعاين ليها!! عوض السواط شافو وقال ليهو جنابو البقت ف محمد بتبقى فيك!! الحاج احرج لانو عملها واضحة صلح طاقيتو وواصل طريقو!! عوض اتنفض وحصل الحاج..خلاهو خايف وبقول الليلة كان ضربني ف صلعتي دي ماف زول حيلومو انا الجابني شنو الحلة الكلها مزز دي!! عوض بنادي فيهو والحاج عامل فيها م سامع لانو ما ناقص مشاكل!! بس عوض فهمو وضحك وجرا عليهو وقال ليهو خبارك طرشت يا جنابو!! الحاج ابتسم إبتسامة مصطنعة عشان يتدارك الموقف..عوض قال ليهو اها عرفت القتل محمد منو!؟ الحاج قال ليهو لسسه بس انت شاكي في زول!! عوض قال ليهو انا ما خبرتك انو محمد مشاكلو كتيرة!! شوف الهددو منو بالقتل يمكن يكون واحد منهم!! وجا ماشي الحاج وقفو بس ابا يقيف وعمل فيها اطرش!! الحاج قال ليهو لشنو عايز تساعدني!؟ عوض إتلفت وقال ليهو عشان تحلها سريع وما تقعد تعاين للماشة والجاية!! الحاج بطنو لمن تكتكت وبلع ريقو!! وقبل ما يمش خطوتين!! كورك ليهو المقدم مرتضى !! إتلفت عليهو واتجهو على بعض والحاج كان مبتسم وجنابو مرتضى بيضحك وحضنو بعض شديد والحاج اتافه بالكلام مع صاحبو وجنابو يضربو ف ضهرو وبقول ليهو مستحيل تعقل!! والحاج بيضحك ورجعو مع بعض على بيت العزاء وكانو بيتكلمو عن الحادثة ومرتضى كان بزكر في الحاج يوم المطرة الجا فيهو من الخرطوم والحاج بيضحك وبيشتم لحدي م جا عم المرحوم ومعاه كم واحد جنابو عزاهم وفتح التحقيق مره تانية لانها تحولت لجريمة قتل وحدد اشخاص بأسمائهم انهم مشتبه فيهم واولهم خالد لانو اول من شاف المجني عليه كان معاه وفي تلاتة كانو متشاكلين مع محمد في قطعة ارض وواحد فيهم هددو انو يقتلو قبل يوم من الوفاة!! الهم مع كل استجواب الدائرة بتتسع وبيظهر طرف جديد في القضية!؟ مرتضي راسو جاط وبعد استجوابات دامت تلاتة يوم مرتضي سلم الحاج صورة من المحضر والنسخة الاصلية حيرفعها المحكمة!! بس بعد نتيجة التحقيق تخلص وامرهم كلهم يتعاونو مع الحاج ووراهم انو ممكن يعيد إستجواب اي واحد فيهم وفي اي وقت!! وودع صاحبو وقال ليهو **** يعينك!! قضية تشيب الرأس!! الحاج ابتسم! وجنابو مرتضى جا طالع!! الحاج قام بسرعة وتاوق بالباب وقال لمرتضى العسكري علي شاطر وهميم حافظ عليهو!! جنابو سب للحاج وعمل ليهو حركة نحنا ف غنى عنها بس خلت الحاج يضحك وداك دور عربيتو ومشى ..الحاج اخد نفس عمييق ورقد في السرير!! وبيقرا في اقول الاشخاص التم استجوابهم!! وطلب من العسكري ينادي فلان وفلان ام الاسمو احمد دا وديني بيتو لاني ما ارتحت لكلامو وظاهر انو مخبي شيء!!

علي طلع ينفذ اوامر الحاج وهو مبسوط لانو الحاج شكرو قدام جنابو مرتضى وبكدا حيقدر ياخد إجازة!! ربع ساعة ما تماها وجاهو العسكري ومعاهو كمال وضوالبيت العايز يحقق معاهم الحاج!! لم جو كان بصلي واتعمد يطول صلاتو عشان يذيد توترهم!! حتى بعداك فضى ليهم وسلم عليهم وسألهم عن اخبارهم..كمال قال ليهو انت شاكي فينا!! الحاج عاين ليهو مسافة وقال لشنو حاسي باني ممكن اكون شاكي فيك ولافيكم!؟ الضو قال ليهو مستحيل تكون ناديتنا ساي!! الحاج شال نفس سخن وقال ليهم شي طبيعي اشك فيكم وانتو اخر من اتشاكلتو مع المرحوم وهددتوه بالقتل!! كمال قال صاح بيناتنا مشاكل بس دي ما اول مره نتشاكل ولو كنا عايزين نقتلو كان قتلناهو زمان بس نحنا اهل واولاد حله واحدة..الحاج قال ليهم طيب إذا واثقين من نفسكم لشنو متضايقين ولامتوترين دا مجرد تحقيق!! ضوالبيت هدا كمال!؟ وقال للحاج عايز مننا شنو ي جنابو ونحنا كل البنعرفو قلناهو في المحضر للضابط!! الحاج ابتسم وقال حندردش بس مع بعض!! منو اخر واحد شاف فيكم المرحوم!! كمال قال انا!! الحاج قال ليهم ب إستغراب بس في المحضر قلتو الضو هو اخر واحد!!؟ ف انهجمو!!!
نواصل بعدين
يتبع ………




الجزء الخامس من رواية الجريمة الغامضة

كمال بقى يتمتم وبعاين لضوالبيت البدورو قال للحاج بنكون لخبطنا بس لانو انا مشيت شفتو وكمال جا بعداك ولاني خليتو معاه عشان كدا قال انو اخر واحد لاقاهاو!! الحاج عاين ليهم الإتنين وقال بس كدا فعلا كمال اخر واحد لاقى المرحوم!! كمال قام ع حيلو وقال ما اخر واحد!! طلعنا سوا الضو مشي بطريق وانا طوالي طلعت وراهو!!؟ الحاج إبتسم وقال ليهم ما تتوترو إسترخو!! وطلب من العسكري يجب ليهم شاي او قهوة!! الضو سكت بس كمال رفض قال ما عايز شيء؟! وزمنو ما بيسمح ليه يتأخر اكتر فلو ف سؤال يستحسن يسألو سريع..الحاج صر حواجبينو وحكة راسو ومسح على وشو واخد تنهيدة طوييييلة وقال ليهم طيب!! سبب مشكلتكم شنو!؟ الضو قال يا سعادتك الكلام دا مكتوب في المحضر يعني لو عدناهو الف مره م حيتغير لانو دي الحقيقة!! الحاج قال معليش بس حابي اسمعها منكم!! كمال إتأفف وقال ليهو محمد حتى وهو ميت مشاكلو ملاحقانا!! الضو مسكو من يدو وعاين ليهو شديييد بمعني اهدى!! وقال للحاج نحنا من عشرة سنة كنا مؤجرين ارض من والد المرحوم!؟ وقبل ما ابوه يموت اشتريناها منو!! وفضل مبلغ بسييط بس ما دفعناه وقبل سنتين محمد قلع مننا الارض ورجع لينا قروشنا وقال دي ارض ورثة وابوه ما شاور زول واصلا نحنا ما تمينا المبلغ!! ومن هنا كبرت القصة وكل يوم وكل اسبوع في خلاف بسبب الارض الاهل اتدخلو وحلو الموضوع رجعو لينا الارض بس ما كلها وفرضو علينا قروش اكتر كتعويض للمرحوم محمد بس قبل ما يموت مشى باع الارض لزول تاني ونحنا اتشاكلنا معاهو!!؟ الحاج قال الارض حقت منو بالضبط!! كمال قال حقتي انا واخوي احمد!! الحاج عاين لضوالبيت وقال ليهو بإستنكار كدا طيب انت الدخلك شنو!؟ قال ليهو انا راجل عمتهم وكنت شاهد على البيعة التمت بين الاخوان ووالد المرحوم!! الحاج هز راسو وقال اهااا..طيب لشنو هددتوه والهددو منو!! بقو يتشاوفو كمال والضو!! والحاج متابع..وقبل ما يعيد ليهم السؤال الضو قال احمد هو الهدد لانو محمد اتحداهو وقال ما برجع الارض ومستعد يموت ولا يقتل فيها زول!؟ ف احمد انفعل وقال ليهو انا البقتلك قبل ما تفكر تعمل ليك عمله…الحاج قال لحدي هنا حلو!! طيب لشنو مشيتو بيت المرحوم!! كمال قال ياخ سألونا السؤال دا مليون مره!! فقدنا احمد وقلنا يمكن يكون مشى يعمل مشكلة مع المرحوم بس…وسكت!! الحاج قال مالك سكت!!؟ بس شنو كمل!! كمال عاين للضو طوالي الضو قال ما لقيناهو مع المرحوم ف حاول يبدا معانا مشكلة جديدة وقال كنا حنتهجم عليهو بس حلينا الموضوع سريع وطلعنا منو!! وتاني ما شفناهو إلا مشيعنو على المقابر!! الحاج شال نفس وإتلفت يمين شمال وحاول يقوم يشرب بس كمال سبقو على الحافظة وجاب ليهو موية يشرب!! بعداك طلع ليهو سجارة وقال ليهم معليش ازعجتكم واخرت اشغالكم!! ممكن تتفضلو!! فعلا شكروه وطلعو…جا علي العسكري وقال للحاج ي سعادتك انا حاسي بأنهم بكذبو!! الحاج قال ليهو لا م بكذبو بس مخبين حاجة!! قبل ما السيجارة تخلص دعسها في الارض وشال الجكت بتاعو وطلع!! والعسكري م يغلط يقول ليهو ماشي وين!! إتلفت رمغو بنظرة لئيمة كلها شتائم بس مسك لسانو وما إتلفظ ليهو وطلع على الحلة ولقي رجال كدا في ديوان وفضلوه معاهم ما كان عندو نفس يقعد بس عارف هو جاي هنا لشنو!؟ قعد وضيفوه وكالعادة بتناقشو في الجريمة!!في واحد قال انا شاكي في اولاد سعيد..وقبل ما يتم كلامو في رجال كبار سكتوه وقالو عيب يتهم ساي وكلامو دا قد يسبب مشكلة كبيرة!! وبما انو الشرطة إتدخلت واشارو على الحاج وقالو وجنابو موجود اكيد المجرم حيتعرف!! الحاج قال ليهم إن شاء****..وفي واحد عاقل كدا غير السيرة عشان نيران الفتنة ما تشتعل..بعداك الحاج شكرهم، وقام منهم وقبل ما يتحرك خطوتين إتزكر انو ما بيعرف بيت احمد..وسألهم إذا ممكن واحد فيهم يوصف ليه بيت احمد ودسعيد..وقامو تلاتة في وقت واحد عشان يودوه بس الحاج شاف عوض الصواط جاي من هناك مشنق طاقيتو طوالي شكرهم وناداهو..داك ولا كضب جا جاري جري..وقال ليهو ارح وديني بيت احمد..عوض ابتسم وقال ليهو ياداب مشيت صاح في قضيتك!! الحاج كلام عوض إستفزاهو يعني انا شغال بعمرك في حل الجرائم تجي انت تنظر في شغلي!!؟ بس قطعها ف حنانو عشان يحصل ع معلومات من عوض!! والتاني دا الطريق كلو بيحكي ليهو عن احمد وانو شعيت واحمق وممكن يقتل ابوه عديل خلي محمد…الحاج قال ليهو عارف إذا احمد شاف محمد اخر مرة متين!! عوض قال زي الوقت دا وبعدين بالليل لقو محمد ميت!! الحاج قال ليهو متأكد!! عوض قال ليهو افوووو يعني فاكرني بكضب!! ولا بتخيل ساكت!! شوف عيني شفت احمد وكمال طالعين منو وكان كمال بدفر في اخوة! الحاج قال ليهو دقيقة دقيقة شفت كمال والضو ولا شفت كمال واحمد!!؟ قال ليهو وحاة غلاوة امي شفت كمال واحمد مارقين المغرب زي الوكت دا قلت ليك من بيت محمد..الحاج إبتسم وقال ليهو الظاهر حنحل القضية دي مع بعض!! عوض الصواط إنتبسط وشنق طاقيتو وقال ليهو ياهو البيت اخش معاك!! الحاج رفض وشكرو وقال ليهو بكرة من الصبح عايز اشوفك معاي في البيت!! دايرك ف مهمة!!؟ عوض ضحكتو للضرس ومن الفرحة يمكن ما ينوم للصباح…الحاج دقة البابوفتح ليهو ولد احمد الصغير وسألو عن ابوه قال ليهو نايم..الحاج قبل م يرجع قال ليهو قول ليهو المحقق الحاج جاك هنا!! الولد قال ليهو اقول ليهو منو!؟ الحاج شال نفس سخن وقال ليهو قول جنابو جنابو جاك هنا!! الولد خلا الحاج واقف وجر بكورك يابا يابا قوم جنابو الضيف جاك!! الحاج إبتسم وصلح شكة قميصو ونضف نظارتو وقال بين نفسو يلا تعال سريع!؟ وفعلا احمد طلع زهجان وعرق جبينو بارز من شدة الغضب!! وقال نحنا م حنخلص من سيرة الرحوم دا!! الحاج سند كوعو على الباب وقال للاسف ما حنرتاح كلنا إلا المجرم يتقبض!!

احمد شال نفسو وفضل الحاج علي البيت دخل وعينو ما رفعة من الارض خايف يشوف ليهو مزه وما يمسك نفسو ويقددو ليهو عيونو ديل!! دخلو الصالون!! وقعد وعم السكون وقبل ما يفتحو الموضوع جا ولدو شايل العصيير..احمد قال ليهو نورت بيتي المتواضع بس كان ترسل لي بجيك براي ما كان تتعب نفسك!! الحاج ابتسم وقال ليهو عادي اصلا هو حابي يتمشي ويعرف البلد وشكر ليهو منطقتهم!! وتاني عم الهدوء!! الحاج طلع نظارتو وقال ليهو لسوء حظك انو انت اخر شخص إتناقش مع الضحية وكمان هددتو بالقتل!! احمد ختى يدينو في راسو وكان مدنقر في الارض!! وبيسمع في كلام الحاج!! بعد مسافة حتى قال انا م قتلت!! الحاج قال ليهو ولا انا اتهمتك!؟ دا مجرد تحقيق او اعتبرها دردشة بما اننا في بيتك؟ احمد قال ليهو طيب المطلوب مني شنو!؟ الحاج صلح قعدتو وقال كل اقوالك السابقة معاي بس عندي شوية استفسارات…قصة الارض انا عارفها وتهديدك ليهو بالقتل انا عارفو!! احمد قال ليهو دا كان في لحظة غضب..الحاج قال عارف ومتفهم بس سؤالي مباشر اخر مرة لاقيت المرحوم متين ووين!!؟احمد قال ليهو قبل الحادثة بيوم!! الحاج صر حواجبينو وقال يعني يوم الحادثة ما شفتو نهائي!! احمد اكد كلامو الحاج سكت!! قال ليهو طيب كان معاك زول! قال ليهو لا جيت براي!! الحاج قال ليهو بس في المحضر قلت انك اتناقشت معاهو وكمال اخوك فصل بيناتكم واسه بتقول كنت براك!! ياتو رواية الصحيحة!! احمد سكت وقال انا اول جيت براي بعداك تاني كمال جا..الحاج كان بيسمع في روايتو المتناقضة بس ابا يقاطعو وكان بيمسح على شنبو وبعاين ليهو!! لم ما لقى تجاوب من احمد وما حب يضغط عليهو بالرغم من انو عارف في حلقة مفقودة ف قصتو دي بس قام وقال ليهو انا بعد كدا راجع السحاب شايل ويمكن المطرة تصب وتحجزني معاك عنا!! احمد قال ليهو حبابك طن كان قعدت دهر ياهو دارك..الحاج شكرو وطلع معاه على الباب وقال ليهو لو اتزكرت حاجة مهمة ولا حسيت بأنو في شيء انا لازم اعرفو عارف حتلقاني وين!!؟ احمد قال ليهو بكل تأكيد جنابو والحاج رجع البيت وشايف عوض منتظرو هناك بس عمل فيها ما شايفو وطوالي مشى البيت!! لقى العسكري مقلق ومن شافو جا جاري عليهو مشيت وين سعادتك..يلا الحاج بعدا مستحيل يمشيها لعلي!؟ وقال ليهو انا شافع!! ولا لازم اخد منك الاذن لو طالع!! داك طوالي إعتذر وطلع!! الحاج طلع دفترو وعمل تلاتة اسهم وكتب كمال واحمد وضوالبيت وسلفآ خالد اسمو مسجل!! في اخد نفس عمييييق وقفل الدفتر وختاهو في صدرو ورقد وبعاين للسقف..وخلاص رخم قرب ينوم سمع صوت بكا شديييد قومو مخلوع..بس اتزكر انو في بيت عزاء!! قام صلى العشاء واتعشى ونام وهو بفكر كيف يحل اللغز دا وعدو عدة خيوط وما عارف يبدا بأي واحد عشان يصل للفاعل وبدون ما يحس نام…وما صحتو إلا المطرة الجات نص الليل وطيرت النومة..قريب الصباح والحاج بين صاحي ونايم شاف عوض واقف في راسو!! لبس نظارتو عشان يتأكد لقاهو هو زاتو!! وقال ليهو بإستغراب خيرمالك!! عوض قال انت جنيت يا جنابو موو إنت قلت لي تعال بدري!! الحاج شتمو الف مره في سرو وقال بس الزمن بدري وقبل شوية صلينا الصبح..عوض ضحك وقال ما مشكلة اها دايرني فوق شنو!؟ الحاج شال نفسو بصعوبة وقال ليهو صاحب محمد اسمو… قبل ما يتم كلامو عوض قال ليهو مازن!! الحاج قال بس **** يفتح علييك عايزك تجيب لي خبرو وقالو بس جا ادى الفاتحة وطلع يشتغل في البوابير والاهم انو حصل خلاف بينو وبين المرحوم واتسبب في طلاق مره محمد!! يلا دايرك تجيب لي تفاصيل الموضوع ومن دربك دا تطلع الخﻷ تنادي لي مازن دا..عوض قال ليهو بس كدي!!الحاج صر حواجبو!! وقال بعد تخلص تاني بديك شغل…!!
عوض ضحك وقال ليهو الخبر كلو كابيهو في رويسي دا وصدقني مازن ما بيقتل محمد دا روحو عدييييل وما بيرضى فيهو شيتآ..الحاج زعل منو وقال ليهو طيب وريني القتل منو مادام عارف اي شيء!!
عوض ضحك ومشى الواطا صبحت وناس البيت جوهم ضيوف من بعيد وضبحو ليهم والحاج بالصدفة وهو ماري سمع النسوان بيتكلمو عن مروة مره المرحوم انها محبوسة وين وانها بعد اطلعت رجعوها وما كانت رضيانة بس اليوم الرجعت راجلها مات!! الكلام كان عادي بس الشيء اللفت إنتباه الحاج انو عم المرحوم قال ليهو رجعها بعد الطلاق بس ما جات البيت!؟ والنسوان قالو جات اليوم المات فيهو!! فالحاج احتار هل حيوسع دائرة الشكوك وحيفضل في متاهة ولا يبدأ بالمشتبه بيهم حتى يفتح ابواب جديييدة!! وف كل مره القضية ماشة تتعقد لحدي ما مازن جا وبدأت الحقيقة تتكشف للمحقق الحاج..!
نواصل بعدين..
يتبع ……..



الجزء السادس من رواية الجريمة الغامضة
محمد مات ليه خمسة ايام والحاج للأن ما قادر يوجة اصابع الإتهام لشخص معين!! وما عرف المرحوم إتناول السم كيف!؟ إذا ما كان الثعبان هو القتلو طيب وين السم؟ وكيف إتناولو!! وعايز بس رأس حيط لانو كل واحد محقق معاهو مخبي شيء!!؟ وصدع شديييد وطلب بندول!! لحدي ما جاهو عوض السواط ومعاه مازن صاحب المرحوم!! سلم وقعد عم المرحوم جاب ليهم غدا بس الحاج لانو مصدع وزهجان ابا ياكل وحتى مازن رفض؟
الحاج قال ليهو سمعت انو المرحوم كان صحبك شدييد **** يرحمو!! مازن قال ليهو ما صحبي!؟ الحاج صر حواجبينو!؟ وعاين ليه بإستغراب!!؟ مازن شال نفس عمييق وقال ليه دا اخوي وابوي وحاجة كدا ما بقدر اوصفها!! الحاج جرا كرسيهو وبقى مقاصد مازن!! الدموعو ملت عيونو وحاول يوقفها بس ما قدر،،الحاج قال ليه لشنو شلت الفاتحة ورجعت!؟ هو صحبك وتؤام روحك على قولك لشنو ما تقيف في وفاتو!! مازن إنهار وقال ما بقدر استحمل صعبة علي ي جنابو وللأن بشوفو قدامي!! الحاج قال ليه بس سمعت انكم إتشاكلتو ولدرجة انكم نهيتو صداقتكم!! مازن عاين للحاج شديييد وقال انت شاكي اني ممكن اعمل كدا في اخوي!؟ الحاج قام على حيلو وبقى يتمشى في الغرفة وشابك ايدينو ورا ضهرو وقال لمازن ابدا مجرد سؤال!؟ مازن قال ليهو كان سؤ تفاهم واتصالحنا!! والكلام دا ليهو اكتر من تلاتة شهور وامورنا كويسة لحدي ما مات!! الحاج قال ليهو عارف بس سبب المشكلة شنو!؟ مازن قال ليهو بإنفعال كدا الوراك بمشكلتنا بكون حكى ليك الحصل!؟ الحاج عاين ليهو بقعر عينو وشال نفس سخن وقال بس انا سألتك إنت!! يمكن تكون المعلومة العندي مغلوطة!! مازن شرب ليهو موية وقال انا كنت عايز لي بت جاره ناس محمد واصلا انا بقعد مع محمد اكتر من قعادي في بيتنا وبجي لمره محمد عشان تتوسط لي للبت واعرف اخبارها منها!! بس في زول عايز يفتن بيناتنا وقال لمحمد مازن بخونك مع اولادك!! وانا لم اتشاكلت مع محمد ما لاني زعلت من الكلام زعلت كيف يصدق حاجة زي دي!! ومرقت ليهو السكين عديل قربت اقتلو!! بس حلينا المشكلة دي في ايام ورجعنا طبيعين!! الحاج قال ليهو طيب اخر مره تشوف محمد متين! مازن قال يوم الحادثة الصباح..وبقى يبكي!! الحاج حاول يهديهو وسكت مسافة ما سألو عن شيء!! هو براهو اتكلم وقال اتونست معاه وقال لي اشرب معاي الشاي بس انا ابيت وقلت ليهو بابوري مدور طالع الخلا!! بس قلت ليهو بجي ببيت معاك!! الحاج قعد وركز دقنو بيدو وقال ليهو يعني انت جيتو يوم الحادثة المساء!! مازن قال اي بعد خلصت شغلي رجعت البيت استحميت وجيت ع محمد **** يرحمو بس كان ماف ولقيت اخوة خالد قال لي محمد دا طلع الحله وانو اولادو الليلة راجعين!! وانا بعد سمعت كلامو دا طوالي رجعت بيتنا وقلت تلراجل مرتو زعلانة منو بسبب موضوعنا داك واليوم اليراضيها وترجع البيت انا اكون قاعد!!؟ شينة في حقي!! تاني ما شفتو إلا سمعت الكواريك الصباح قالو مات!؟ الحاج عيونو إتسعت وكان مندهش من كلام مازن!! طلع من الصالون وخلا مازن قاعد شاف شافع برا قال ليهو نادي لي عم فاروق دا عم محمد!! العم جا مستعجل!! قال ﻷحاج اها عرفت حاجة القتل ولدي منو!؟ الحاج مسك العم من كتفو وقال اهدى لسسه ما عرفناه بس ماشين كويس!! العم شال نفسو وقال **** فى واكيد حق ولد اخوي ما بضيع!!
الحاج سألو عن مره المرحوم هل رجعت يوم الحادثة!؟ العم قال لا ما جات!! الحاج قال ليهو ولا قالت جاية!! العم قال ليهو ما سمعت كلام زي دا..الحاج هز راسو وقال ليهو طيب تشكر تعبتك معاي ومشى خلاهو واقف قبل ما عم فاروق يرد! دخل الصالون لقى مازن قاعد بسف الحاج شال منو الكيس ودردمها قدر الليمونة ورقد مازن قال ليهو اها تاني في شيء!! الحاج هز راسو بس قال ليهو خليك قريب يمكن نحتاجك!! مازن قال ليه انا ما مصدق انو محمد مقتول بس و**** لو عرفت انو صحي مقتول وعرفت القاتك وحاة امي اقتلو بسكيني دي!! وكان بأشر عليها في ضراعو!! الحاج لمن اتخلع من طولها وشكلها!! العسكري قال ليهو خلاص يا مازن لو احتجنا ليك حنطلبك…وجا طالع معاه الحاج قال للعسكري نادي لي معاك خالد..وبقى يفكر هل خالد خبى علي شيء ولا الحاصل شنو!؟ وسريع جا داخل متربش!؟ وقال نعم جنابو انت قلت عايزني!! الحاج تف سفتو وقال ليهو بدون مقدمات مرت محمد كانت موجودة يوم الحادثة!! خالد عاين للحاج بدهشة وقال ليهو جات ورجعت!! الحاج قال جات متين!؟ خالد قال ليهو نص الليل جابها اخوها غصب عنها!؟ واتناقشت مع محمد واخوها حاول يضربها بس محمد مسكو!! وفات خلاها اخدت ليها بكية بكيتين وفاتت!! الحاج قال ليهو يعني كانت مجبورة!! خالد قال الظاهر كدا!؟ الحاج وبسرعة قال ليهو وانتو كنتو عارفين انها جاية!! خالد سكت الحاج قال ليهو ما جاوبت!! خالد قال لالا ما كانو عارفين جات مفاجأة!! الحاج إبتسم وقال ليهو شكرآ ليك!! العسكري عايز يتكلم بس الحاج سكتو وقال لخالد إتفضل وياريت لو وريت ناس البيت يعملو لي جبنة!؟ خالد مشي يجيبها!! وعلي قال للحاج ي سعادتك بس مازن قال خالد وراهو انو مره محمد جاية!؟ وخالد بقول انها جات بدون ما تورت زول!؟ انا حاسي ي سعادتك انو خالد بكذب!! الحاج قال ليهو مصيرنا نعرف الحصل ما تستعجل!! ولع ليهو سيجارة وطلع…اليوم التاني جات مطرة غضب عديييل وماف طريقة زول يطلع كابة من الصبح لحدي الضهر بتنقط!!الحاج قال للعم فاروق والاخوان انا لازم اشوف مره خالد لانو في تساؤلات كتيرة ما حلاقي ليها جواب إلا عندها!؟ خالد قال ليهو بس المطرة كابة وغير كدا المرا محبوسة ماف راجل حيشوفها!! الناس وافقوه!!
الحاج قال ليهم انا بتصرف مع المطرة اما لزوجتو انا م عايزها في موضوع زواج!! خلاهم كلهم بعاينو ليهو وملامحهم ما بتطمئن بس الحاج لسانو زفر وسليط! وقال ليهم إذا شايفين انو شوفتي ليهاحرام خلوها ورا ستارة ولا حاجة وانا زاتي ما عايز اشوفها!! المهم في النهاية قدر يقنعهم وقالو حيكون معاه اخوها!! وحسن اخو المرحوم قال حيمشي يكلم اهلها اول!!
وفعلا وافقو الحاج إتلفح بملاية والمطره بتنقط صغااارة بس كان خايف يتزلق ولا يقع يتكسر!!
وصل البيت وبقول خلاص بعدا لازم اعرف المجرم ودالك*ب دا منو!؟ ودخل غرفة كدا متحمس!! وفعلا لقى فاصلين بستارة كدا واخوانها قاعدين!! عزاهم وعزاها وسمع صوتها لمن جسمو كششه من نعومة الصوت ورقتو وما فضل إلا يتاوق بالستارة عشان يشوف شكلها!! بس إتمالك نفسو وإستاذنهم طلع شرب ليهو سيجارة حتى جا داخل!! وقال ليها بعتذر ح اقلب عليك المواجع بس عايز اعرف اخر مرة شفتي المرحوم متين وقال ليك شنو!!؟
نواصل بعدين
يتبع …….




الجزء السابع من رواية الجريمة الغامضة
مره المرحوم شالت نفسها بصعوبة وختمتها ب اااه..الحاج بينو وبين نفسو قال اااحححي!! ومسح ع وشو وبقي يعاين للستارة…اخوها نهرها وقال اتكلمي جنابو م عندو زمن!! الحاج رمغو بنرتو الكلها شتائم ديك وقال ليهوعا ي ياخ انامقدر الحالة الهي فيها!! بقت تتنهف وقالت للحاج قبل الجريمة بكم بساعتين انا كنت ف بيتي!!؟ الحاج قال ليها كيف عرفتي الوقت المات فيهو!! شالت نفسها وقالت انا كنت هناك زي الساعة واحدة ونص صباحآ وبعد ساعتين وشوية كدا سمعنا الكواريك!! الحاج لبس نظارتو وقال ليها طيب احكي الحصل…بذات الصوت المعسول قالت طبعا كان ف خلاف سابق بيناتنا ولدرجة انو وقع طلاق!! اخوها قال ليها دا عارفو جنابو اتكلمي عن يوم جيتك!! الحاج قاطعو بإنفعال وقال لو سمحت م تدخل وخليني اشوف شغلي!! ويستحسن انكم تطلعو برا وممكن يفضل معاي العسكري ولاواحد بس فيكم!!؟ بقو كلهم يتشاوفو وبحمرو لاخوهم الاتكلم! ف واحد كبييير كدا قال ليهم ارح وخلا واحد بس ابا يطلع والحاج…عاين للستارة وقال كملي كملي!! شالت نفس عميق وقالت حاول كتييير انو يرضيني ويرجعني البيت بس انا برفض لانو اتهمني اتهام خطير وفكت ف البكا! الحاج خلاص ريقو نشف ولمن دقات قلبو اتسارعت والفضول حيقتلو لو م شاف المره دي!! اخوها قال ليها واصلي.. الحاج قرب يسب ليهو بس م اتكلم لانو عايز يحل اللغز دا سريع!! قالت بس ف النهاية اتصالحنا بس م رجعت بيتي! لحدي م يوم اخوي الطلع قبل شوية دا قال لي اطلع واجي م القاك ف البيت امشي بيت راجلك!! ولم رجع باليل لقاني قاعدة وانا اصلا متفقة مع محمد هو البيجي يسوقني عشان النسوان م يشيلن حالي ويقولو رجعت براها!! بس اخوي استعجل وقال بما اننا اتصالحنا ارجع بيتي…فلما لقاني قاعدة ساقني غصب ف نص الليل داك ومحمد زاتو اتفاجأ برجعتي!! بعد اخوي طلع مننا انا بكيت وقلت لمحمد انا م جاهزة لي تلاتة شهور لا اتحننت ولا عملت حاجات النسوان!! اتفهم وضعي ولانو بحب الجيها قال لي برجعك البيت وبجي بسوقك الصباح!!
بس انا ابيت وقلت ليهو بمشي براي!! ضحك وقال لي مره شعيتة زيك م شفتها!! وفكت ف البكا.. الحاج قال ليتا **** يصبرك!! يعني م طلع معاك!! قال ليهو البيت هدا قريب مننا بس شلت بطاريتو وطلعت وكان الشارع حركتو كتيييرة ورجعت بيتنا وتاني م شفتو الا لم ودعتو الصباح جنازة…وفكت ف النويح الحاج قال ليها معليش تعبتك معاي بس قلتي الشارع حركتو كتيرةف الزمن داك كان ف منو!! قالت ليهو خالد اخو راجلي واقف جنب الباب وعثمان جارنا كان سامعة صوتو وشايفة ضي البطارية حقتو قصاد الكمينة!! وقبل م اخش بيتنا شفت عوض برضو جنا كدا من حلتنا الحاج قال ليهاعوض بتاع الاخبار!! اخوها ضحك وقال ليهو ياهو زاتو عوض السواط!!

الحاج استغرب وطلع من عندها وهومحتار!! العسكري قال ليهو انا شاكي ف خالد!! م اظنها. بتقدر تقتل راجلها! الحاج قال ليهو يمكن يكون ساعدها اخوها!! العسكري اتخلع وقال ليهو يعني هي المجرمة!!؟ الحاج ضحك وقال ليهو دي افتراضات. ساي لسه م اتعرف بس قررررب!! وشال نفس عميييق…
علي قال ليهو سعادتك انا بعد كدا ماشيبكرة حنةاختي لو م جيت لغرض معينكنت حسوقك معاي …الحاج ضحك وقال ليهو بعني انا اتوسطت ليك عشان تمشي تخليني!! العسكري ضحك وقال ليهو بس اوعدك بعد تلاتة يوم ح اجيي! الحاج. قلع نظارتو ودخلها جيبو وقال ليهو بس بعد تلاتة ايام حكون حليت القضية! العسكري اندهش من ثقة الحاج بنفسو!! قال ليهو **** يساعدك وانا زاتي متشوق اعرف القتل منو!! الحاج ربت ع كتف العسكري ومشي وقال لشنو خالد رفض يخلي مازن ينوم مع صاحبو يوم الحادثة وكيف عرف انو مرة اخوه جاية!! وعوض السواط الجابو هنا شنو وفالتوقيت دا بالزات وهو ساكن ف اخر الحله !!
وف اثناء م هو بفكر شاف ليهو شوفة! نفس الحورية الشافها اليوم داك ماشة تتعصر ف الشارع وكأنها. خجلانة تخت رجلها ف الارض…وبدون م يشعر تبعها وم عارف يوقفها ولا يقول شنو!! لحدي م دخلت تالت بيت من ناس العزا واتزكر انو البيت دا اتزكر ف المحضر بس وين م متزكر!!
لم وصل البيت قال ليهم وينو خالد !! وقرر يواجهو ويوريهو انو كذب ف شي!! بس قالو ليهو ماف! فسأل عن تالت بيت منهم فعرف انو بيت محمود ساكن بس هو واختو متزوجة ومطلقة!! الحاج ف سرو قال منو ود الكلب الطلقها دا!! شرب ليهو كباية شاي وصورتها م فارقت مخيلتو!! واتزكر محمود دا كان حاضر وقت اكتشاف الجريمة وهو وعثمان قالو للناس خالد قتل الدبيب!! طوالي لفح جكتو وقال لقي ليهو حجة تدخلو بيت البت السمحة!! مشي ودقة الباب فتح ليهو محمود واستغرب من جية الحاج بس فضلو ع البيت! وداك بيتلفت عشان يلمح البت!! دخلو راكوبة كدا وقعد بيتونس معاه جات بكل ادب نادت اخوهاومدت ليهو الشاي م شاف إلا طرف يدها!! بعداك سألو عن المرحوم وعن اخر مرة شافو فيها وعن الثعبان بس محمود اكد ليهو انو لمن وصلو كان الدبيب ميت!! والحاج م عرف يقول تاني شنو!! بس لمح كارو مليانة حطب قال ليهو ماشاء**** داكلو قطعتو انت! محمود ابتسم واكد ليهو الحاج قال ليهو بس كيف قدرت تقطعو والغابة قالو اتملت موية!! محمود ابتسم وقال ليهو اسسه مش قلت ليك يوم الحادثة كنت ف الغابة!! بس الحطب دا قطعتو ف اليوم داك وبعد جيت الصباح وقبل م انزل الحمار سمعت كواريك خالد وجرينا ومن يومها الحطب ف مكانو! الحاج هز راسو وشفط كباية شايهو وجاهو شافع جاري قال ليهو خالد جا ي جنابو!!

وقام سريع طلع وقال ليهو شكرا ع الشاي ومحمود قال ليهو. عيدها تاني!! الحاج اتلفت ع المطبخ وقال بك تأكيد وطلع يواجه خالد ويعرفو كذب لشنو ومخبي شنو! ومن شافو صر حواجبينو. وقال ليهو..
نواصل بعدين..
يتبع ……..




الجزء الثامن من رواية الجريمة الغامضة
ي خالد!! اتخلع من نبرة الحاج وجا عليهو وقال نعم جنابو!!؟ الحاج قال ليهو تعال وقبل م خالد يعرف عايزو ف شنو الحاج مشي!! طوالي خالد تبعو!! لم وصل الصالون لقي الحاج قاعد ف كرسي وماسك سيجارة بس لسسسه م ولعها!! واشر لخالد ع السرير بمعني اقعد!!؟ طوالي خالد قعد واتوتر من نظرات الحاج!! وقال خير جنابو ف شي!! الحاج ختى السجارة ف خشمو بالجنبة وقال ليهو انت كذبت علي!! حتوريني الحقيقة كاملة ولا اتصل ع جنابو مرتضي ويسوقك القسم ويحقق معاك هو!! وم بضمن ليك. الممكن يحصل معاك هناك!!؟ خالد قال ليهو يعني بتهددني ي جنابو!! الحاج قال ليهو ابدا بس بوريك الممكن يحصل!! خالد قال ليهو انا م كذبت ف شي وكل البعرفو قلتو!! الحاج قال ليهو بس م قلت انك منعت مازن يبيت لشنو!! وكيف عرفت انو مره المرحوم راجعة!! خالد قال ليهو ايواا دا السبب يعني المخليك تشك فيني!!؟ الحاج قال ليهو وقد يكون كل كلامك كذب وتلفيق بس لحدي الان دا الشي الوحيد الم عندو اجابة!؟ خالد طلب سجارة والحاح مدا ليهو العلبة شال ومرق كبريتو من جيبو وولعها بيشرب وبيكتم الدخان مسااااافة جواها حتي بينفخو!! الحاج. ساكت وبعاين ليهو لحدي م خلصها حتي قال ليهو انا كذبت ف الموضوع بس صدفت معاي!! الحاج نهرو وقال ليهو انت بتستغباني ولا بتقلل من شأني عشان اصدق انك كذبت وانها فعلا جات!! ولنفترض اني صدقتك ودا الحصل فعلا طيب لشنو تكذب!!
خالد بقي يدعك ف عيونو والحاج منفعل وخلاص بدا يتنرفز.. خالد قال ليهو حوريك بس الموضوع يفضل سر بيناتنا!! الحاح صر حواجبينو وياداب ولع سجارتو وقال ليهو احكي!! خالد قال ليهو اليوم المات فيهو اخوي كنت…وسكت! الحاج قال ليهو كنت شنو!! خالد شال نفسو بصعوبة وقال ليهو كنت مواعد لي مرا!! !
الحاج ابتسم وقال ف نفسو دي شنو السخافة دي!! خالد قال ليهو كانت مواعداني تجيني ف اليوم دا! بس لم مازن قال جاي وزعتو بحجة انو مرة محمد جاية.. الحاج قاطعو وقال ليهو وديك فعلا جات وعايزني اصدق الكلام الفارغ دا!! خالد قال ليهو انا عزابي زوجتي ماتت وتاني م اتزوجت وعايش مع محمد ف بيتنا الكبير دا!! ومرات كدا النفس بتأمر بالسوء!! الحاج قال ليهو والمرا جات! قال ليهو لا اول كان الزمن بدري وقالت حتجي قريب الساعة واحدة ولم جات لقت مرة محمد جايطة مع اخوها وراجلها فلبدت وم ظهرت!! والسحابة كانت شايلة خافت تجي مطرة وتزرها. معاي وم تقدر ترجع ف ليلها داك فرجعت ع اهلها وم شفتها!! بعداك محمد نام وانا نمت والباقي انت عارفو بس صاح انا كذبت قلت مرة محمد جاية وو**** م كنت عارفها بس صدفت معاي!!؟ الحاج طلع من الصالون وخلاهو قاعد! وقال ف نفسو قد يكون كلامو صاح بس برضو م مطمئن ليهو!! وهو بيتمشي ف طرف الحلة شاف عوض الصواط قال ليهو تعال!! وداك جا جاري جري.. قال ليهو انت شغال شنو ي عوض غير انك بتجمع اخبار الحله!! عوض ضحك وقال ليهو انا م ثابت ع شغل معين مره بتاع موية ومره حطاب ومره بطلع الخلا!! الحاج قال ليهو كويس بس يوم الحادثة الوداك بيت المرحوم شنو!! عوض ضحكتو اتجمدت ف خشمو ولمن وقف فجااأة!! وقال للحاج الشافني منو!؟ الحاج مسكو من كتفو وقال ليهو يعني فعلا مشيت!! عوض قال ليهو انا زي اب شبش.. الحاج قال ليهو العنكبوت!! عوض قال ليهو اااي بس كنت بتمشي جنب البيت وسمعت الشكلة ووقفت اتشمر!! الحاج قال ليهو م صدقتك!! عوض ابتسم وقال ليهو لو عندك دليل ضدي اتهمني ساكت!! الحاج جا ماشي عوض وقفو وقال ليهو بدل تضيع زمنك فوقي امش شوف القاتل منو!!؟ الحاج قال لعوض كان طلعت انت بكفتك اول حتى بسلمك للعدالة!! عوض ضحك وقال ليهو سممح نشوف!! الحاج رجع ع بيت العزا بيتبسم واستبعد فكرة انو عوض ممكن بقتل بس قال الولد دا عارف ليهو. معلومات…مرق ورقو وبقي يقرا ف اقوالهم ويطابقها مع بعض! فقال لازم يعرف الاخوان اولاد سعيد مخبين شنو وليه م ورهو انهم كانو يوم الحادثة ف بيت محمد وشنو الحصل بيناتهم”! وف اثناء م هو بفكر نادوه الغدا وجاهم محمود اخو البت السمحة جا ب غداهو واتونسو وقال للحاج انا م عارف الشي الحصل دا اتسبب فيهو منو بس متأكد من انو اولاد سعيد ليهم دخل وواحد فيهم قتل محمد وغالبا م يكون احمد!!؟ الحاج قال ليهو عرفت كيف!!؟ قال ليهو جو شاكلوه قبل م يموت بساعات وماف زول ليهو مصلحة غيرهم!! وقال لاخوان المرحوم ولا كلامي م صاااح!! الحاج قال هانت واذا هم ورا الحصل اكيييد ح اكشفهم وكمان لو زول تاني!! وكان بعاين لخالد برضو حنعرفو..الحاج سأل عن علي! عم فاروق قال مشى اختو عندها حنة!! حتي اتزكر محمود قال ليهو عايز شنو ي جنابو انا بساعدك!! الحاج استغرب بس قال كويس عشان يتقرب منو وبكدا حيقدر يشوف اختو كتييير!! قال ليهو ممكن تمشي معاي بيت كمال.!!
اول اتردد بس قال ليهو كويس وطلعو مع بعض وطول الطريق بيتكلم ليه عنهم وعن اخلاقهم وانو كمال احمق بس م مكار زي احمد وقال للحاج لو عاوز تحصل ع معلومات منو استفزو اول بعداك براهو بيتكلم بس ضو البيت قتيت وم بطلع الكلام بسهولة!! الحاج ضحك وقال ليهو ماشاء**** لقيتك خبير ف المواضيع دي!!؟ محمود ابتسم وقال ليهو انا زول سفري كتييير وشفت وسمعت كتييير عشان كداماف حاجة بتخفي علي!! الحاج قال ليهو كويس اصلا الحياة بتطلب كدا!! اهاا بتمشي الخرطوم كتييير. محمود ضحك وقال ليهو مره بس ولا مرتين بس بمشي مدني كتييير شوفة عينك انا حطاب مرات برحل حطب ومرات بعملو فحم وبمشي ببيعو هناك!! الحاج قال ليهو موفق يارب.. بس محمود قال ليهو طولت م سافرت لي اكتر من شهرين ف الحلة الغابة قطع الشجر بقي الا بتصديق وكلام كتييير عشان كدا شغلنا واقف…واتكلمو كتييير لحدي م وصلو وكان عايز يخش معاه بس الحاج رفض وقال ليهو عشان م يتحسس حابي اكون براي!! محمود اتفهم الوضع ومشي الحاج ع دقتو للباب جا كمال فتح”! الحاج سلم وكمال م قال ليهو اتفضل!! الحاج ابتسم وقال ليهو جيب لينا كرسين ف الشارع دا لاني عجزت وم بقدر اقيف وبقي يضحك!! حتي بعداك كمال دخلو البيت!! الحاج قال ليهو بدون مقدمات انا جيت اوريك انو الشرذة قد تجي تسوقك تحت اي لحظة لانو مشتبه فيك ف قتل محمد!! كمال دا لمن قام ع حيلو وجاط كيف الكلام دا وانا عملت شنو!! الحاج قال ليهو انتو كذبتو وبالاخص انت!! قلت اخر واحد شاف المرحوم ف اخوانك وتاني غيرت رايك وقلت شفتو انت والضو ! تاني قلت شفتو قبل يوم من الحادثة واخوك قال شفتوه انتو الاتنين يوم الحادثة!! وكلام كتييير متناقض عشان كدا الشكوك حولكم زادت!! كمال قال انا م عملت شي الحاق قال ليهو بس كذبت ووكذبك دا الحيجيب ليك مشاكل..كمال قال انا م قتلت ي جنابو ولا عارف منوالقتل بس بأكد ليك انو م اخوي!! الحاج قال ليهو اثبت لي!! كمال شال نفسو بصعوبة وقال فعلا احمد كان ناوي يقتل محمد بس نحنا اتكلمنا معاهو وقلنا ليهو عندك اولاد وحتي مشينا لعمنا عشان ينصحو وقال ليهو الشيطان م يغشك وكلام من دا وصدقني لم الخبر جا كنا بايتين مع عمنا ف اخر الحلة!! الحاج قال ليهو طيب مشيتو بيتو لشنو!! قال احمد مشي يتساكل معاه وكان جاهز انو يقتلو بس انا حصلتو وبعد تعب حتى قدرت امرقو من بيت محمد ومن هناك وطويل عبيت عمنا!! الحاج اتزكر انو دي نفس الرواية الحكاها ليهو عوض انو طلعو المغرب وكمال كان بدفر ف اخوه!! بس هل فعلا كانو مع عمهم للصباح ولا دي كذبة!!

وقال ليهو ف زول شافكم مع عمكم ولا كدا!! اكد ليهو بالاسم كمان فلان وفلان وفلان.. وساق الحاج ومسو ع بيت عمهم عشان يثبت انهم كانو مع عمهم ووصلو البيت وهناك حصل الشي الما كان متوقع!!
نواصل بعديييين
يتبع ………




الجزء التاسع من رواية الجريمة الغامضة
الوقت اتأخر والعشاء قرب يأذن والمطر بيهطل بدون مقدمات…بس الحاج كان مصر يكشف براثين الجريمة دي!! ومشى مع كمال ع بيت عمو ولم وصلو شاف الناس متجمعة وداخلين ومارقين!؟ عاين لكمال بإستغراب يعني دا شنو!! كمال قال للحاج دي مناسبة حقت بت!! الحاج اتزكر حنة اخت العسكري!! وقال ليهو وينو بيت عمك!! كمال اشر ليهو ع بيت جنب بيت المناسبة ومشو عليهو بس لقوه ماف وود عمو قال ليهو انت عارف ابوي زي الزمن دا بكون وين!! كمال ابتسم وقال للحاج إلا نجيهو بكرة حتى لو لقيناه م حتحصل منو ع شيء!!؟ الحاج شال نفس سخن وقال كيف يعني البيمنعو يحكي شنو!! كمال قال ليهو من مؤاخذة ي جنابو عمي سكييير!! الحاج عاين لكمال بدهشة وقال عمك!! كمال قال ليهو دا شي طبيعي ف حلتنا والجنوبين الساكنين ف غابة الحلة خربو الرجال بشدو العرقي وغيرو!! الحاج قال ليهو يعني عمك ف الغابة اسسه!! كمال ضحك وفال لا بس عندهم بيت كيف كدا هنا ف الحله بجيبو هناك تمشي معاي عليهو!! الحاج قال اعوذب**** خلي بنجي الصباح وجا ماشي!! وخلى كمال واقف بيتبسم بعد كم متر الحاج سمع الصوت المابيخفي عليهو جنابو جنابو!! إتلفت شاف عوض جاري عليهو!! إتأفف وقال ليهو محل م امشي بتطلع لي انت!؟ بتتبعني ولا شنو!؟عوض الصواط ضحك وقال ليهو انا ف اي حتة موجود!! الحاج قال ليهو بزهج كدا عايز شنو!! عوض لبس طاقيتو وقال ليهو ف فرق بين تمش تجمع معلومات وبين انك تسكر ولا مو كدي!!؟ الحاج ضحك وقال ليهو عايزني امشي خمارة!! عوض قال ليهو وانا قلت ليك امش اسكر!! كل الدايرهم بتلقاهم هناك وم تنسى انت بتكون واعي وهم سكرانين يمكن تدردقهم بالكلام!! الحاج قال ليهو هم منو!! انا عايز بس عم كمال!؟ عوض ابتسم وقال ليهو مخيييير! انا بدور اساعد م اكتر؟ ومشي خلا الحاج واقف متمحن!! وقال بينو وبين نفسو الولد دا عايز يصل لشنو!؟ وكمان انا العملتو ف الدنيا دي م شوية كان مشيت خمارة اقول لربي بعدين شنو!! وبقى يتبسم…ولع ليهو سجارة وشاف ليهو شاب كدا ماشي وقفو وسألو عن البيت البيشربو فيهو رجال الحله!! الولد ضحك وقال ليهو القضية غلبتك ي جنابو!! الحاج م ردا! الولد وصف ليهو وقال تمشي بالشارع دا طويييل رابع بيت ع يدك الشمال وفعلا مشي لقاهو نادي عديييل كشتينة وضمنى وشيشة وف مجموعة كدا بتشرب!؟ كل الانظار اتجهت عليهو والجماعة دلاك لبدو العرقي عشان جنابو م يشوفو بس ريحتو كانت مالية المكان!! قال سلام ردو ويأل عن عم اولاد سعيد!! ف راجل عجوز اكبر من الحاج قال ليهو مرحب بيك وكان بلغلغ ساي من شدة م سكران!! مشي عليهم وشاف اشكال مألوفة وكانو خجلانين منو!! وف واحد مطرطش كدا مدا للحاج كوزعرقي!! اداهو عين داك طوالي إتراجع عم ناس كمال قال ليهو خير مالك بدور مني شي!! الحاج قال جيت اسألك كم سؤال واغير جو شوية!! وجا ولد كدا جاب ليهو شيشة وقال ليهو تشرب شنو!! الحاج قال ليهو كباية جبنة في!! الولد ضحك وقال كويس!! ف اثناء م الحاج بيتكلم مع العم سمع صوت كم راجل جو داخلين وسلمو للقاعدين ونادو الولد الجاب للحاج الشيشة وقالو ليهو جيب لينا كيفنا!! وم كانو عارفين الحاج قاعد ولا جو حتى ع مجموعة العجائز المعاهم الحاج وكانو بيتونسو وبيضحكو!! والحاج بدورو كان بتكلم مع دلاك!! والعم السكران اكد ليهو انو اولاد اخوه كانو معاه وقال ليهو لو كانو باتو ف بيوتهم اليوم داك كان احمد الليلة ف السجن لانو ناوي يقتل المرحوم بس بركة الجات من زول تاني!! وبهضرب ساي بالكلام وف واحد كدا معاط وم سكت نهائي وبيحكي للحاج انا عملت وانا سويت وكنت اغنى زول ياخ الحاج اتوتر منو وقرب يقوم!! وقال ليهو انا شريك مع فلان وفلان وبنمشي مدني اها الشغل ف الحرطوم كيف!! وكان ودينا الفحم هناك بيتحارج سريع والكلام لم نرفز الحاج جدع خرطوش الشيشة وجا قايم!! وقبل م يطلع سامع واحد بيحكي لمجوعة تانية اي كتلوه شفتهم بعيني دي بس م عندي دليل!! شفتو لمن اخوها شترها بالمركوب كدي انا قلت خلاص بتموت!! الحاج قال يمكن يكون بتكلمو عن قصة تانية لانو م حصل سمع الكلام دا!! ومن عتب الباب رجل جوه والتانية برا!! طق لقط كلمة شينة ف حق خالد يقتل اخوه!! فجأة عيون قرنية الحاج إتسعت من واقع الصدمة!! ورجع بأقصى سرعتو وقال قلت شنو!!؟ الواطا ليل بس مولعين فوانبس والراجل ولا اتلفت ع الحاج بس من سمع الصوت اتخلع ورمى ورق الكتشينة من يدو!!واتجمد ف مكانو؟ الحاج جا قصاد وشو لقاه دا عثمان جار المرحوم ومن اوائل الناس الشافو محمد بعد وفاتو!! فذادت دهشة الحاج!! وقال ليهو انت!؟ يعني كنت موجود وقت الحادثة!! عثمان جاتة صقطة وجسمو كلو بقى ينهز!! الحاج طلع من البيت مسرع!! سمع صوت بقول عوووووك عوووك!! اتلفت لقاهو عوض وقال ليهو انا مو حدثتك انك بتلقى الدايرو!! وصحك…الحاج م ردا عليهو وواصل مشيهو! تبعو عثمان من ورا ولمن الحاج عايز يخش بيت العزا وكان بيسأل عن عم فاروق! عثمان وقفو وقال ليهو تعال عايزك!! الحاج قال ليهو وفر كلامك للقاضي م لي انا!! عثمان اتجرس وقال ليهو عليك **** اختاني المحاكم والكلام دا و**** اوريك البعرفو بس م تجيب لي مشاكل!! الحاج قال ليهو يمكن تكون القاتل! ولا شريكو؟ فالمشاكل لاحقاك لاحقاك..عثمان لمن سنونو بقت تطاقش من شدة الخوف وقال للحاج بس انت تعال اسمع كلامي وكان م صدقتني وديني المشنقة عديييل!!

الحاج قال ليهو اخر فرصة ليك وانا م بقدر اساعدك لو كذبت علي!! عثمان مسكو من يدو وقال ارح بيتي!! عم فاروق جا طالع من جوه وقال للحاج خير قالو سألت عني!! عثمان قال ليهو بيرجع ليك ي عم فاروق وساق معاهو الحاج ع بيتو اصلا هم جيران! وخلا عم فاروق مستغرب من سلوك عثمان المضطرب!؟ الحاج بقول ف نفسو اولاد الكلب بيلعبو بي انا!! وفضلو ف صالونو والحاج قال ليهو بنهره اها اتكلم!! عثمان قال للحاج خالد ومروة هم الكتلو محمد!! الحاج قال ليهو شنو!!؟؟
نواصل بعدين..
يتبع ………




الجزء العاشر من رواية الجريمة الغامضة

عثمان وهو بيتلعثم قال للحاج و**** دا الشفتو!! الحاج قام ع حيلو وقال ليهو احكي لي الحصل وانت شفت شنو بالضبط لانو الحكاية دي حتوصل لحبل المشنقة!!
عثمان قال ليهو ف يوم الحادثة وقريب الساعة واحدة صباحآ شفت السحاب شايل والسماءبيبرق قلت خلاص المطرة اكيد حتجي!! الحاج قاطعو وقال ليهو دا دخلو شنو بموضوعنا!! عثمان شال نفسو وقال ليهو جاي ليك بالكلام…يلا طلعت اغطي كمينتي كويس عشان المطر م يخرب علي!! وانا شغال سامع جوطة برا وعرفت من الصوت دا مجتبي اخو مروة وسامعها بتطنطن وبتقول ف كلام براحة كدي عشان م تسمع الناس بس طاهر عليهم مختلفين!! انا طوالي طفيت بطاريتي وف الليل داك ماف زول بشوفني وجيت بتصنت عليهم…م سمعت الكلام كويس بس شايف مروه مرة المرحوم واخوها بيتكلمو مع المرحوم وخالد كان مشغول بعيييد بتلفونو!! بعداك اخوها كان بدور يضربها اظنها جالطتو ف الكلام إلا محمد اتدخل.. بعداك اخوها فات وهي قعدت بتبكي وم. عارف محمد قال ليها شنو إلا شالت بطاريتو وفاتت براها!! الحاج قال ليهو دا نفس الشي الكلنا عارفنو وهي صرحت بيهو طيب كيف قتلتو!! عثمان ولع ليهو سيجارة وقال تاني رجعت كانت شايلة حاجة ف يدها وخشت البيت.. انا دخلت جبت مشمعات من جوه لم رجعت شفتها واقفة وقفة م ياها مع خالد!! الحاج قال ليهو كيف يعني!! عثمان قال ليهو و**** انا م شفت وشوشهم كويس لانو الواطا. ضلام بس متأكد قبل اخش شفتها دي مروه!! الحاج قاطعو وقال ليه طيب كيف عرفت خالد!! عثمان قال ليهو خالد اقصر من محمد وسمين شوية وعرفتو!! وكان زي البجابد فيها وهي م كوركت! مشيت انادي مرتي عشان تشوف الشوفة دي وتكون شاهدة ع الكلام دا بس وكت جيت م لقيت زول ووقفت مسافة بعداك رجعت بيتي وبعد ساعتين خالد كورك قال الدبيب!! ! وانا طوالي عرفت هم القتلوه بس م عندي دليل!! وبقي يحلف للحاج. انو م كذب ودا الشي الحصل!! الحاج شال نفس عميق وقال ليهو قدامك للصباح إذا لقيتك بتكذب صدقني م حجيك بس حتكون الشرطة معاك!!
وطلع من بيت عثمان وبفكر هل عثمان بكذب!! ويمكن يكون هو القاتل!! بس يمكن يكون كلامو صااح ومروة وخالد متفقين!! بس يمكن يكون فهم الموضوع غلط ويكون. عشيقة خالد وافتكرها مروه!! بس ياترى مروه رجعت تاني لشنو!!؟ ولشنو لم سألتها م قالت لي انها رجعت تاني!! راسو كان حينفجر من التفكير!! وماف طريقة يمشي لمرة محمد لانو الوقت إتأخر!!! وم عرف يعمل شنو لحدي م جا. حسن وخالد ومعاهم تاني واحد وطول القعدة الحاج منتظر متين يمشو عشان يتكلم مع خالد وبدون م يحس بنفسو نااام.. قام نص الليل مخلوع ولقى كل الموجودين نايمين.. إتنرفز اكتر لانو الزمن محسوب عليهو وهو بنفسو اتعهد انو يكشف المجرم ف خلال تلاتة ايام وفضل يومين بس والشغلة ماشة تجوط اكتر!!
وفضل الليل كلو بفكر لحدي الصبح تاني م نام!! ةلعد الصلاة طوالي جنب بخالد وسألو عن الشي الحصل!! خالد اتخلع وقال ليهوعرفت كيف الشافني منو!! قال ليهو معقولة م لقيت غير مرة اخوك!!
خالد بدون م يشعر قال للحاج انت حيوان!! كيف تتهمني اتهام زي دا!! انا وريتك انو جايني واحدة وصاح جات بس بسبب جوطة محمد ومرتو زعلت وفاتت حاولت اوقفها بس ابت.. لكن وريني الشافني منو!! الحاج شال نفسو بصعوبة قال ليهو الزول الشافك افتكرها مروه…خالد انفعل وقال ليهو وريني منو!! الحاج قال ليهو عشان تحصل جريمة تانية!! وقام خلاه قاعد مقلق ومتوتر شديد!! الحاج قال دي شنو اللخبطة دي منو القتل!! مروه ولا خالد ولا عثمان ولا احمد ولاكمال ولا عوض ولا القتلو منو!! ! ومشى ع بيت ناس مروه وكانت الساعة ستة صباحآ بس كان مصر يعرف الجابها تاني شنو!! لم اخوانها شافوه استغربو وقالو ليهو عايز تتكلم معاها اسسه!! قال ليهم اي جنابومرتضي منتطر مني تقرير الساعة سبعة يعني لازم اتكلم معاها اسسسه!! بقو يتشاوفو وبعد خمس دقايق كدا فضلوه ع غرفة زي المره الفاتت كان فاصلين بيناتهم بستارة!! سلم عليها بس المره دي م اغراهو الصوت لانو كان متنرفز وعندو الف سؤال بدور ف راسو!! قال ليها انتي خبيتي علي شي قد يجعلك متهمة اولى اذا م حكيتيهو!! وقبل م يسألها بقت تبكي!! الحاج صر حواجبو وبقي يمسح ع شنبو!! وقال ليها مالك!!؟ منتطرها تقول ليهو انا القتلتو!!

بس اخدت تنهيدة طويييلة وقالت انا شفتو يوم الحادثة مرتين!! الحاج ابتسم وقال اها قولي!! وف سرو بقول اعترفي وخلصينا!! قالت انا بعد رجعت بيتنا شلت فتيل دواء بتاع كحة ووديتو لمحمد!! الحاج قال ليها شنو!! اديتيهو السم انتي!! بكت وقالت عشان كدا م وريتك المرة الفاتت عشان متأكدة انكم حتتهموني!! الحاج قال ليها اها قولي الحصل!؟ قالت و****. انا م قتلت راجلي لم مشيت البيت واخوي عايز يرجعني كان عندو التهاب ولمن صوتو مقروش ووريتو اني حجيب ليهو الدوا بس قال لي ح اقدمك واجيبو معاي وانا ابيت وقلت م بتجي بيتنا الا تسوقني وخطفت منو البطارية وخليتو بيضحك!!؟ وتاني رجعت تبكي!! الحاج قال ليها فالنفترض انو كلامك صاح! بس الدواء احتمال يكون مسموم!! بقت تتحلف انها م عارفة والدوا شرب منو اخوها وولد اخوها وم جاتهم حاجة!! الحاج قال ليها عشان تبرىي نفسك لازم تثبتي كلامك ولازم تشوف الدواء ونتأكد انو م مسموم!! بقت تتنهف وتتاأتي ف الكلام وقالت موافقة!؟ وورت الحاج انو الدواء م شالتو تاني وبكون ف بيتها هناك!! الحاج طلع من عندها وبقول الجريمة دي مالها غامضة كدا!! وكل م اقول قتل فلان يطهر لي فلان تاني!! بس بما انو الموضوع فيهو دوا وغيرو عرفنا المرحوم اتناول شنو بعدا بس فضل نفحص الدوا ونشوف منو صاحب المصلحة الاكبر ف موت محمد!!
مشي ع البيت وقلبوه قلب م لقو الفتل وم خلو زول م سألوه !! وكأنو الارض انشقت وبلعتو!! صاح البيت ناسو كتار والضيوف اكتر بس ماف زول بشيل ليهو دوا ساي!! والحاج قال القاتل ودالكلب بيلعب بينا كلنا!! وعشان تتم الناقصة اتصل مرتضي وقله ادبو ف الحاج وشنو م عامل فيها الثعلب المكار وماف زول بلحقك ف حل الجرائم!! مالك انخزلت!؟ ولا الكبر ليهو تأثير وبقي يضحك! والحاج اخلاقو ف نخرتو واحتراما لعم فاروق والجماعة المعاه م حب يتلفظ لصاحبو ف التلفون!! بس قال ليهو بس يومين ي مرتضي اذا م حليت القضية وسلمتك القاتل ف يدك حتكون دي اخر قضية لي وح اعترف قدامكم كلكم اني محقق فاشل!! مرتضي اول مره يحس بجدية الحاج وقال ليهو بهزر ياخ وقبل م يتم كلامو الحاج قفل الخط ف وشو!! وقام ع حيلو وخلا كل القاعدين بعاينو ليهو وسمعو كلامو!! وطلع عم فاروق قال ليهو ع وين ي جنابو الحاج شال نفس سخخخخن وقال ليهو شغلي يادااااب إبتدا!! !
نواصل بعدين..
يتبع …….

الجزء الحادي عشر من رواية الجريمة الغامضة

الحاج لاول مره ف حياتو المهنية م يعرف هو عايز شنو ولا الخطوة الجاية لازم تكون شنو!!؟ بس إتبع حدثو وماشي بدون وجهة معينة!! ف اثناء م هو بيتمشى شاف ليهو كارو مليانة حطب لمن الحمار م قادر يجرها!! الحاج قال للراجل دا شنو ي زول غرقت ف وحل انت!؟ داك ضحك وقال ليهو دا حال الغابة ف الخريف بس لو وقفنا بسبب الطين اولادنا نأكلهم من وين والغابة مصدر دخلنا!! الحاج قال ليهو **** يعينك بس رفقآ بالحيوان!! ومشي كمل طريقو! شافو عوض الصواط وقال ليهو جنابو جنابووو الحاج شال نفس سخخخن ووقف لمن عوض جا كان نضيييف والريحة تقول ي قدر والجلابية السمنية يخلوها ليهو!! الحاج قال ليهو مسافر ولا شنو!! عوض خرب استايل لبسو بضحكتو العبيطة ديك وقال ليهو لالا اخوي عاين وماشي معاهو الاسبتالية!! اها انت مالك مهموم كدي مو عرفت الكاتل صووح!! الحاج ابتسم وقال قربت اعرفو بس عايز اجمع ادلة كافية!! عوض شنق طاقتو ورمق الحاج بنظرة متفحصة غريبة!؟ وابتسم ودنقر! قال ليهو ي جنابو انا م عارف الكتل منو بس متأكد الموضوع القصة دي وراها مرا!! ومشي خلا الحاج متمحن!! ولع ليهو سيجارة وواصل مشيهو وهو بفكر وبحلل وبرابط ف الخيوط ف مخيلتو!! وهو راجع ع البيت شاف الراجل النضام الامس داك وقفو بس الحاج ابا يقيف وعمل فيها م سامع!! بس داك لايوق اخد ليهو جكة وحصل الحاج وقالو خبارك ي جنابو م وقفت ولا يكون سمعك ضعييف!! الحاج قال ليهو بكون؟ ماشي البيت!! الحاج قال اسسه بقول لي ماشي معاك!! طوالي قال ليهو لالا م ماشي!! وطوالي غير طريقو!! الراجل قال ليهو انا ماشي لشريكي ولو اتفقنا يمكن نمشي معاك الخرطوم تاني م ماشين مدني قبل اسبوعين السوق كان زي الزفت بس قالو الليلة الشغل واقف عدييل هناك!! الحاج وهو ماشي قال ليها اهااااا!! الراجل استغرب من رد الحاج وقال دا مالو كمان!! ومشى لشريكو الحاج لفى من البيت عشان م يتكلم مع الراجل الغياظ داك!! بس جيتو كانت لخيير وشاف السمحة ست الريد!! بتتكلم معاها واحدة وهي راسها من الواطا م رفعتو!! هو جاي عليهم وبقي يمشي براحة عشان يتفحصها بنظراتو ويشوف تفاصيل وشها!! والتانية المعاها زحت التوب من طرف شعر السمحة وقالت ليها يخسس عليك ي فاطمة!! لمن سمع الاسم لمن جسمو وكشة وقال طلع اسمها فطومة!! وعلي ابتسامتو جا ماري جنبها وعاينت ليهو بس طوالي نزلت عيونها وزحت ليهو شوية لانو خلا الشارع الواسع دا وقرب يطقشها!! ولمن دقات قلبو زادت وبقى يقول لنفسو ي شايب اعقل ياخ دي قدر بتك!! إلا تبارك **** زي الصيدة!! وكانت البيت بتسألها عن زيت للشعر تقريبآ بس الحاج لانو مركز معاها م سمع كلام البت بس سمع رد المريودة!! قالت ليها بدلع ممزوج بخجل وبالإضافة للهجه الحنينة ديك بري و**** م كذبت عليك داك انتهى طول بس اخوي **** يديهو العافية جابو لي من كم يوم من مدني!! ابتسم ومشي ولو كان بيدو كان رجع تاني عشان يشوفها بس فجأة اتزكر القضية وتحولت ابتسامتو لتكشيرة وتقطبات ف جبينو!!بعداك قرر يرجع البيت ولم قرب شاف نفس الراجل العارض داك بس معاه محمود اخو فاطمة السمحة سلمو عليهو والحاج قال ليهو دا شريكك!! وداك فتح ف الكلام الحاج قاطعو وقال لمحمود انا مصدع عايز بندول لو معاك!!

وهو م كان عندو شيء بس عايز يسكت الرادي داك!! بس محمود اصر ع الحاج يمشي معاهو البيت وانو اختو بتعمل جبنة بتشيل الف صداع!! الحاج ابتسم وقال ف سرو نظرة واحدة منها كفيلة تشفي اي مرض!! بس فجأة اتزكر انو الراجل ابو كلام كتيير معاه وطوالي شكرو وقال ليهو خليها مره تانية!! ومحمود م الح عليه وخلاهو يمش بس قال ليهو لازم تجي تشرب معاي الجبنة!! الحاج ابتسم وقال ليهو اكيييد!! ورجع البيت ونسى زاتو انو م فطر والضهر اذن عديل!! جابو ليهو الفطور وهو بفكر ف كلام عوض!؟ يقصد شنو بأنو وراها مره!! هل قتلتو مرا ولا بسبب مره محمد مات!! ولا يمكن عوض عايز يشوش ع القضية ومخبي عني شيء!!؟ وكترت التساؤلات…لحدي م جاه حسن ومدا ليهو التلفون قال ليهو اخوي حسين عايزك!! مسك التلفون وقال الو!! دا بتاع روسيا عايز يشوف الحصل شنو وهو قبل م الحاج يجي كان متاكد انو اخوه مقتول وبقى يبكي ويقول للحاج لازم يكشف الجاني وهو مستعد يدفع اضعاف اضعاف المبلغ وقبل م الحاج يرد عليهو الخط فصل!! الحاج بقى يقرا ف اقوالهم من الاول وبدقق ع كل كلمة وبقارن اقوال دا بالتاني!! وبيتزكر المواقف الحصلت وهم كانو مخبينها عنو ف المحضر!! ف استبعد كم واحد كمشتبه فيهم وركز ع تلاتة!! قفل اوراقو واخد ليهو تكية!! وقبل م ينوم جا خالد وكان بيتكلم ف التلفون!! الحاج عاين ليهو وقال المرا الجاتك يوم الحادثة منو!!؟ خالد لمن التلفون قرب يقع من يدو!؟ وقال ليهو ي جنابو انا اعترفت ليك بكل شيء بس سامحني انا م بقدر افضح بت الناس…الحاج قال ليهو بس انا م ماشي اشهر بيها بس يمكن يكون ليها دخل ف موتة محمد اخوك!! خالد قال ليهو مستحيييل لمياء تدخل ف القصة دي!! الحاج ابتسم وقال ليهو اسمها لمياء!! خالد قام ع حيلو وقال و**** ي جنابو البت دي لو ظهرت ف القضية دي حتقع رقبة ويندفن كم واحد!!؟ الحاج قال ليهو ليك امان **** سرك حيكون محفوظ!! بس لازم اعرف هي منو!!؟ وم تنسى يوم الحادثة كانت موجودة!! خالد قعد ف حافة السرير وعاين بعييييد وكان ظاهر عليهو الإستياء!! الحاج قال ليهو اها قول لمياء دي منو!؟ خالد اتنفس بصعوبة وختى يدينو ورا رقبتو وقال ليهو بت من حلتنا! ساكنة ورا…الحاج قال ليهو يعني بتربطها صله قرابة ب اولاد سعيد ولا مازن ولا منو بالضبط!! خالد قال ليهو انا وريتك انها م عندها علاقة بكل البيحصل دا ولا بتعرف اخوي ولا عندها مشكلة مع زول!! ياخ دي اخت الجنا المطرطش البجيك طوالي دا!!؟ الحاج من الخلعة لمن قام ع حيلو وقال ليهو لمياء طلعت اخت عوض البجيب الاخبار!!؟
نواصل بعدين
يتبع ……






الجزء الثاني عشر من رواية الجريمة الغامضة
خالد قال ليهو اي اخت عوض لزم!! بس مالك اتخلعت ي جنابو!! الحاج قال ليهو انت عارف انو عوض يوم الحادثة كان موجود!! خالد لمن قعد ف الواطا وقال للحاج شنو!! يعني شافها وهي معاي!! يعني عوض المطرطش قتل اخوي!؟ الحاج قال ليهو اهدا نحنا لسسه م متأكدين!! خالد شال نفسو وقام وكان هايج وقال للحاج يمينا ب**** م اخليهو وجاط شديد لدرجة تثير شكوك الحاج!! الحاج بقى يدعك ف جبينو وظاهر عليهو التعب!؟ قال لخالد بطل دراما واهدى وم تتهور خليني بتصرف ويمكن تجوطها ويكون ف زول بيلعب علينا كلنا!! فشنو خليني انا بتصرف!؟ وطلع من الصالون وبفكر هل اسأل عوض بس قد ينكر وقد يكون م عارف انو اختو كانت هناك واسبب مشكلة تاني!! بس كان مصر يعرف عوض كان بيعمل شنو هناك ومشى ليهو ف البيت وجات فتحت ليهو بت عشرينية حليتونة وقال ليها نادي لي عوض!! قالت ليهو ماف جا من المستشفى وطلع الحله لسسه م رجع!! قاليها قولي ليهو….وقبل م يتم كلامو قاطعتو وقالت بعرفك انت الضابط البحقق ف كتل محمد ودالجيلي!!؟ عاين ليها بطريقة غريبة وقال ليها انتي لمياء!!؟ اتخلعت ونططت عيونها وقففف قفلت الباب!! الحاج ابتسم وهو راجع شاف عوض!؟ قال ليهو جنابو بنفسو جاي علي!؟ الحاج قال ليهو تخيل بس!؟ عوض ضحك وقال ليهو اكيد الجابك موو هين ارح ع البيت!؟ الحاج رفض وقال ليهو انت ارح معاي عايز اسألك…ماشين مع بعض وساكتين لحدي م وصلو صالون ناس عم فاروق!! الحاج قال لعوض اقعد واشر ليهو ع الكرسي!! عوض حكى راسو وقعد…قال للحاج الظاهر الموضوع خطير!! الحاج قال ليهو يوم 28الشهر الجابك بيت المرحوم شنو!؟ عوض قال للحاج انا م بحفظ التواريخ قول لي يوم كدا!! الحاج عرف انو عوض بماطل!! طلع ليهو سجارة وقال ليهو يوم الحادثة ي عوض الجابك شنو!! قال ليهو حصل حادث متين ي جنابو!؟ الحاج إتنرفز وقرب يطفي السجارة ف عوض ولا يخنقو بس عوض ضحك وقال ليهو بهظر معاك ي جنابو معليش!! الحاج إنفعل اكتر وقال نحنا م بنلعب!؟ خليك جادي وإلا ح اضطر اسلمك للشرطة وهي تستجوبك بطريقتها!! عوض ابتسم وقال ليهو شكلك لسسسه م لقيت المجرم ي جنابو!! الحاج قال ليهو يمكن تكون انت!؟ عوض ضخك وقال ليهو انا اقتل!!؟ الحاج قال ليهو طيب الجابك شنو يوم ارتكاب الجريمة!! عوض قال ليهو ي جنابو القال ليك انا دخلت بيت المرحوم كضاب واعرف انو هو القاتل وبدور يطشش راسك..الحاج قال ليهو طيب وريني انت جيت ولا لا!!؟
عوض قلع طاقيتو من راسو وبقى بلعب بيها!! وكل تصرف منو بنرفز الحاج اكتر!! بعداك قال ليهو اي جيييت!! الحاج عاين ليهو بإستغراب والف سؤال خطرو ع بالو وقبل م يسأل عوض قال ليهو ي جنابو يوم محمد مات كنا بنتونس ف خلوه عم ناصر!! وبعداك السحابة شالت وكلنا فرينا كل واحد ع بيتو!! وانا ماشي ع بيتنا اتصلي واحد من الحله قال لي الحق اختك ماشة ف الليل دا ع بيوت اولاد الجيلي!! وقبل كدي خالد طلب اختي للعرس ونحنا رفضنا!!؟ وسكت الحاج قال ليهو كمل وبعداك حصل شنو!؟ قال ليهو الوقت داك شواطيني قامن وم عرفت منو المتصل وبيت اولاد الجيلي كان اقرب من بيتنا!! قلت بدل امش ابيت اشوفها هنا اول يمكن يكون المتصل كلامو صحي!! وجيت جري بس لم وصلت لقيت الشكلة مدورة بين محمد ومرتو واخوها وحتى عثمان جارهم شايفو بيتاوق!!؟ قعدت شوية كدي وشفتهم طلعو وانا رجعت بعداك لم وصلت البيت عشان اتأكد شفت اختي مع اخواتها نايمة ولﻷن م عرفت الاتصل منو قافل التلفون!! بس دا الحصل وصدقني لو كان لقيتها هناك كان قتلتها وقتلتهم كلهم!! الحاج قال ليهو دا كل الحصل!؟ م دسيت علي شيء!!؟ عوض قال ليهو لو لقيتني كضاب اشنقني!! الحاج خلاهو يمش وفضل يفكر دي مصيبة شنو دي!! ومين البكذب ومين الصادق!!؟ والجريمة دي حتتحل متين!! فضل للحاج يوم ونص وإلا حينفذ وعدو ويسلم القضية لمرتضى…وطلع الحله وهو اصلا م عارف ماشي ع وين لاقى مازن راجع من الخلا ومعاه كم راجل طوالي بطل البابور وجا ناحية الحاج وقال ليهو اها ي جنابو ماف جديييد ف القضية الحاج قال ليهو ف واحد فيكم ودكلب بس و**** م اخليهو!! مازن قال ليهو بإستنكار كدا واحد مننا!! يعني انت لسسسه شاكي فيني!!؟

الحاج قلع نظارتو ومسك كتف مازن وقال ليهو اصابع الاتهام موجه للجميييع لحدي م نقبض الجاني!! مازن شال نفس عميييق وقال ليهو بما اني واثق من اني م عملت شيء م خايف ولا ح اتضايق من اتهامك بس بتمنى الشغلة دي تنحل سريع وصاحبي يرتاح ف تربتو!! وقال للحاج استاذنك بابوري واقف!! طوالي جا ماشي الحاج قال ليهو ممكن اسألك سؤال!!؟ مازن صر حواجبينو وقال للحاج إتفضل!؟ الحاج قال ليهو هل المرحوم كان عندو علاقات غرامية خارج إطار الزوجية!؟وكان قلت بتحب ليك واحدة منو!؟ والبسببها حصل ليك خلاف مع المرحوم!! مازن كلم الحاج بكل العايزو!!؟ وخلى الحاج مندهش وملامحو م بتتفسر!!
ومشي!! الحاج ضحك وضرب يد ف التانية ولبس نظارتو ورجع البيت!! مشي استحم وقال ليهم انا جيعان ممكن تختو لي وجبة نص!!؟ عم فاروق ضحك ومشي جاب كانون مليان جمر!! الحاج إستغرب انا جيعان تجيب لي نار!! اقرمشها ولا كيف!؟ العم بقى يضحك وقبل م يرد جا داخل حسن وشايل لحمة نضيييفة وسمحة ورماها ف الجمر ورسل واحد من اولادو قال ليهو جيب شطة وملح وليمون من البيت!! الحاج اندهش وقال ليهم ضبحتو لي!!؟ عم فاروق قال ليهو تستاهل اكتر من الضبيحة جنابو!! بالجد الحاج امبسط منهم وقال ليهم كان جيت طالب قربكم م بتدوني مرا!! عم فاروق ضحك وقال ليهو مالو والراجل كمان عندو كبر ولا عمر محدد للزواج!! إلا مرتك وين!؟ وبترضي!! الحاج قال ليهم اتوفت من زمان وكبرت الاولاد وزوجتهم وقاعد عزابي ف بيتي!! عم فاروق قال ليهو **** يرحمها!! بس كان كدي مبروك من اسسه واعزل ليك مره!! الحاج ضحك ومسح كرشتو ومن الشبع م قادر يتنفس!! وقال لعم فاروق بس خلي القضية دي تنحل وبنتناقش ف موضوع المرا!! وانا خلاص ح انشق من الشبع خلوني اتمدد شوية وفعلا اخد ليهو رقدة صغيييرة كدا وقام نشيط ومبسوط!! بس م اتهنا بأكلتو دي وجاهو وجع بطن يمكن لانو كتر ف الشطة وكل دقيقتين جاري الحمام…وشمى الوضع وقال نهائي الزمن م مناسب لوجع البطن وكل ثانية بتمر محسوبة عليهو!! بس كان شبه مطمئن لانو شاكك ف زول بس عايز دليل واحد بس إضافي عشان يقفل القضية دي…اتصل ع مرتضى ونبزو كوييييس وانفشي فيهو عن كلامو الفات!! وقال ليهو منتظرك بعد بكرة ولازم يكون معاك كلباش!! وقبل م مرتضي يسألو القتل منو الحاج قفل الخط وبقى يضحك!!؟
نواصل بعدين.
يتبع …




الجزء الثالث عشر من رواية الجريمة الغامضة


الحاج راقد ف سريرو وبكلم نفسو!! معقولة ي الحاج يكون استنتاجك صاااح!! وطول الوقت دا القاتل بيلعب بينا!!؟ بس انا كيف ح اقدر اواجهو بدون دليل دامغ!! وكيف ح احصل ع الدليل دا؟ بعداك ناااام والنسمة كانت بااااردة ولمن بقى يشخر!! بس بطنو م خلتو يستمتع بالنومة ووجعتو وقام جري ع الحمام!! بالع نص شريط بتاع فلاجين من مابطنو وجعتو بس النافع ****…وللحظة كدا وهو مارق من الحمام لمن دايخ ونفسو خامي قال م يكون الجماعة ديل سمموني!! وتاني استبعد الحكاية وابتسم ورجع الديوان والمطرة تنقط ساااي وهو كملها ف راسو للصباح ف مشي الحمام؛الصباح طلع عليهو وهو عيونو واقعة من التعب والسهر!! وعم فاروق جاب ليهو حلبة قال ليهو سفها!! والحاج سألهم إذا عندهم قشر رمان!! بس قالو م عندهم؛الحاج شرب الشاي وكان بفكر كيف يثبت انو فلان هو القتل !؟ وطلع قال ماشي ع بيت ناس مروة عايز يستفسر عن حاجات بتخص المرحوم!! وع طلعتو من الصالون! بطنو وجعتو سب ليها ومشى مهرول ع الحمام ومن ختى رجلو جات غاطسة لمن كورك!! عم فاروق واولادو جو جارين!! وبقو يضحكو والحاج اتحرج لانو كورك بس دا حمام م معاهو لعب!!؟ عم فاروف قال ليهو م تخاف ي جنابو دائمآ الحته دي بتغطس بس م بتقع بيك مبنية كويس!!؟ الحاج نطط عيونو وقال ليهو ي فاروق انا كنت داير اقع ف الحمام وتقول لي عادي..ولد عم فاروق قال ليهو اخوي بناها والجنبة دي م ردمها كويس ومرات بتغطس ساي لكن م بتقع شوف اسسسه رجلك غطست ف شيء!؟ ولا تراب!!؟ قدر م اقنعوه ابا يخشها ووجع بطنو زاتو راح!! قال ليهم الحمام من فوق كاشف والشمس بتزوب صلعتي قلنا ماشي فضل ليهو اقل من متر ويتملي قلنا م مشكلة بس يغطس بي!؟ و**** م اخشو ان جنيتو!! وجا طالع مخليهم بيضحكو وقال اظنهم عايزين يقتلوني!! وقال لازم يمش لمرة محمد عشان يتخارج من البلد دي!؟ وع طلعتو لاقاه محمود قال ليهو مالك ي جنابو متضايق كدا!! الحاج قال ليهو ماف شي بس متحسس شوية!! محمود قال ليهو سلامتك ياخ اتفضل ع البيت!! الحاج شكرو وقال ليهو مستعجل خليها لبعدين!! ولا اداهو فرصة يرد وطوالي مشى!! وكان بيت ناس مروة م بعيد بعد بيتين بس!! دخل وسلم عليهم وقال معليش كترت جياتي بس خلاص دي اخر مره!! اخوها الكبير قال ليهو ولا يهمك ي جنابو ونحنا زاتنا عايزين نعرف منو القتل!؟ الحاج شال نفسو وقال ليهم قريييب إن شاء ****!! وقال ليهم اها ف طريقة اتكلم مع اختكم!! الكان معاها يوم الحادثة جاط فيهم ومالكم انتو وكل مره خاشي راجل غريب نسيتو انها محبوسة!!؟ اخوه الكبير قرب يضربو لانو رفع صوتو ف وش جنابو بس الحاج اتدخل وقال ليهم العنو الشيطان وخلاص ممكن اجي ف وقت تاني!! الاخو الكبير قال للحاج م بتمش وحمر لداك طوالي طلع!! لم رسل اخوه الصغير يكلم مروة قالو ليهو بتستحمى!!؟ الحاج ابتسم وقال ليهو شفت!! **** م رايد لي اشوفها اسسسه بس م مشكلة حجيها بعدين!!؟ مع انو اخوها الكبير اصر عليهو يقعد يشرب معاهم الشاي بس الحاج شكرو وقال ليه شربت من شوية وإستأذنو وطلع!! وع طلعتو شاف فاطمة السمحة داخلة بيتهم ابتسم وقال كدي اشوف وشها يمكن تتسهل علي ياااخ…ورفع بنطلونو لفوق وملس شعراتو بالجنبات والصلعة تلمع ومشى دقة الباب وبيتبسم منتظرها تفتح ليه!! بس فتح ليهو اخوها والحاج سب ليهو ف سرو حتى دخل!! وقال ليهو شكرا لانك جيت وفضلو ع الصالون..جاب ليهو عصير الحاج قال ليهو م بقدر اشرب بطني ممشياني وغير كدا الجو بارد بس ممكن اشرب الجبنة العزمتني ليها ديك!! محمود ابتسم وقال ليهو تكرم عيونك جنابو ومشي كلم اختو تسويها وجا بيتونس معاه ويضحكو ساي وداك قال ليهو عندنا قشر رمان بس خلي اختي تدقو ليك وبعداك اديك تسفو بعد الجبنة.. والحاج كان مراقب ف اختو ويشوفها مره تشيل موية من البرميل ومره تطلع تغسل البن والحاج بعاين ليها بإعجاب… شوية كدا وجات جابت الجبنة وابت تدخل بس الحاج عينو م شالها منها!! شربو الجبنة واول مرة يستمتع بالشكل دا وكأنو م حصل شرب جبنة قبل المرة وكل رشفة احلا من التانية!! وبالرغم من انو الواطا صباح والجو بارد بس الحاج العرق بقي يتقطر من جبهتو!! ومحمود بيضحك وبقول ليهو انت مكوفر ي جنابو دي كوفارة ع قول يمة **** يرحمها!! الحاج ضحك لمن اتشرق وفجأة بطنو وجعتو!! وقال ليهو حمامكم ب وين!؟ وطوالي داك وصفو ليهو وجري ع الحمام بس كان متردد وبقى يكشف ف الحمام وبقبض ف رجلينو عشان م يقع بيهو!!؟ ومن جا قايم ملامحو اتغيرت وكأنو اتزكر ليهو شيء…وطلع مسرع محمود قال ليهو ع وين جنابو قال ليهو جاي جاي!! وقبل م يصل الباب فاطمة قالت ليهو هاك الرمان!!؟ كان مستعجل بس مستحيل يفوت فرصة انو يقرب منها ولا يشيل حاجة من يدها!! وقرب عليها ومدا يدو!! هي تتبسم ختت ليهو فنجان فيهو بدرة الرمان ف يدو وجات ماشة الحاج بعاين ليها لمن هبكت ع وشها وقربت تقع..قال ليها ياساتر!! سحرتك انا وطل من عندهم!!!؟

بسف ف الرمان وطعمو بقى ليهو مر شديد وقرب يتوع!!؟ وكان مستعجل عايز يشوف مروة ولمن قلبو بدق بس قال اول يغشي ديوان ناس عم فاروق ويشرب ليهو موية ويشيل المفكرة بتاعتو وخطوطين بس ووصل الصالون بس كانت المفاجأة شاف خالد بفتش سريع سريع ف شنطة الحاج!!؟ الحاج اندهش وقال ليهو بتفتش ف شنو ي خالد!!؟
نواصل بعدين
يتبع ……..






الجزء الرابع عشر من رواية الجريمة الغامضة
خالد اتهجم لمن شهق وفكا الدفتر من يدو!! الحاج صر عيونو وعقد حاجبينو وركز يدو ع الباب…وقال ليهو مالگ مخلوع عايز شنو من اغراضي! خالد عضي شفتو التحت من شدة م احرج وقال للحاج بتمني م تفهمني غلط!! بس الفضول حيقتلني وقلت يمكن القي عندك دليل ولا حاجة اعرف من خلالها منو القتل!!؟ الحاج عاين ليهو بإ حتقار واضح وقال ليهو طيب كان ممكن تسألني!!؟ ولا كنت عايز تتطمس دليل إن لقيت!!؟ خالد نطط عيونو وختى يدينو ف راسو وطلع من الصالون…الحاج شال نفس سخخخخن وقعد شويية ف كرسي وشرب ليهو موية وقال دا عايز يعمل شنو!! وكان قاصد خالد!؟ واتزكر هو عايز يعمل شنو!! قام سريع. رفع دفترو من الارض وطلع ع بيت ناس مروة…ومن دخل اخوانها فضلوه شوية كدا حتي نادوه ع البرندة القاعدة فيها مروة…دخل وسلم وقعد! وقال لاخوها الجا معاه وقال ليهو ممكن تخلينا برانا!! اخوها قال ليهو عايز تختلي بيها ي جنابو!!؟ الحاج شال نفسو وقال ليهو دا استجواب عادي يعني ممكن تجي قوه امنية وسوقها القسم او المحكمة ودا كلو مشروع حتى وان كانت محبوسة!! ف كدا احسن لاختكم وانا م باخد اكتر من خمس دقايق وكمان سؤالي خاص بيها وزوجها فما من الزوق انك تسمعو!!؟ المهم بعد طنطنة وملاوكة كلام اخوها رضى يطلع!! حتى الحاج قدر يشيل نفسو!! واول كان جايها بأسىئلة كتييرة بس ولسبب ما !! اتراجع واختصر اسئلتو ف سؤالين الاول ودا كان واقف ليهو ف حلقو نوع الدواء ولا اسمو كان شنو!!؟ وتاني سؤال قال هل حسيتي ف يوم انو المرحوم بخونك ولا سمعتي انو عندو علاقة بواحدة تانية!! 2 واهم شي م قلتو منو القال لمحمد مرتك بتخونك مع صاحبك!!؟ وقبل م ترد قال ليها ركزي كويس وم تستعجلي واخدي وقتك بس لازم تجاوبي!!؟ مروة اخدت نفس عمييييق وقال ليهو يعني انت لسسسه م عرفت القتل منو!!؟ قال ليها الإجابة ع سؤالك بتعتمد ع اجابتك ع اسئلتي!! اتنفست بصعوبة وقالت ليهو نوع الدواء بتاع كحة وإلتهاب اما اسمو شنو م بعرفو بس بعرف شكلو!! الحاج قال ليها حلو يلا اوصفيهو قالت فتيل بني محروق من البلاستك م قزاز والكتابة مطبوعة ف ورقة صفراء كاسية الفتيل من برا!! وتقريبا راسمين فيهو فرع نعناع ولا ريحان م بعرف!!؟ الحاج ابتسم وبقي يلعب بشنبو وقال ليها كملي وقالت اما علاقات وكلام فاضي كان قبل الزواج مكسر الدنيا ومجبرها!! بس بعد اتزوجنا إلتزم وم شكيت فيهو ولا لحظة ولا ف زول جاب لي خبر انو بخوني وم بتصلني إلا اخبار مشاكلو!!؟ وسكت!! الحاج قال ليها واخر سؤال!! قالت ليهو و**** م عارفة بعد المشكلة دي حصلت انا مشيت بيت اهلي وابيت اتفاهم معاه تاني!!؟ الحاج قاطعها وقال ليها معقولة صالحتيهو بدون م تعرفي منو القال فيك الاشاعة دي!! بكت وقالت ليهو ابا يوريني بس قال لي زول قريب مننا وساكن جنبنا وانا شكيت ف عم عثمان لانو سارح بينا طوالي ويتبعنا!! بس قلت بعد ارجع بيتي بدردقو بالكلام واعرف دا منو الداير يخرب بيتي دا!!؟
الحاج قال ليها شكرا ليك وقام ع حيلو!! قالت ليهو عرفت القاتل ابتسم وقال ليها اااي عرفتو”! بدهشة كدا قالت منو!! !؟ ابتسم وقال ليها حتعرفيهو الصباح!؟ وطلع من عندها!! اخوها الغياظ داك قال ليهو اها قضية قاسم سليماني دي لسسه م. خلصت تحقيق فيها!!؟ الحاج ابتسم وم حبى يتناقش معاه واستأذن منهم. وطلع! خلاهم جايطين ف اخوهم الاتواقح مع الحاج…بس الحاج كان مرتاح لانو شغلة شبه انتهي وحيخلص ف صباح اليوم التاني لم يسلم مرتضي المجرم!! رجع البيت ولقى خالد كلم حسن بالشي الحسل وحسن بقى يتأسف نيابتآ عن اخوة وانو م صاح يهبش حاجاتك بس من شدة ريدتولاخوة م قدر يتحكم ف نفسو!! الحاج ابتسم وقال ليهو حصل خير اصلا شغلي انتهي والمجرم بكرة يتستلمو الشرطة!! خالد اتخلع وقال ليهو م تكون غلطت وافتكرتني انا المجرم عشان هبشت حاجاتك!!؟ الحاج ضحك وقال ليهو اهدى ي خالد طالما انت برئ لشنو خايف!!؟ وطلع يشم هوا نضيف وخلا الاخوان بيتهامسو!! والخبر ف ظرف عشرة دقايق انتشر ف البلد وكل ناس الحلة اتكبو ف بيت المرحوم عايزين يشوفو القاتل دا منو!!؟ الحاج اتخلع خاف يطقطقو الجماعة يدل ولا كمان يوريهم القتل منو وتحصل مجزرة!! فحاول يهديهم وقال انو م عرف القاتل بس. شاكي ف زول وانو بكرة حيسلم الملف لجنابو مرتضي وحيواصل التحقيق هو!! حتى الناس هدو شوية وفرقوهم! وكل شوية خالد يجي يقول للحاج صحي م عرفت القاتل ولا قلت كدا ساي عشان تسكت الناس!!؟ الحاج انفعل وقال ليهو ياخ م تكرهنا اضبط اعصابك ياخ ولو انت القتلت قول ساي بدل كل شوية تشككنا فيك اكتر!! خالد بلع ريقو وطلع.. الحاج مستني متين الواطا تصبح عشان يضع حد للقضية دي ويرتاح! والصباح كانو اتأخر ساعتين تلاتة وم جا بعد طول. انتظار وكلهم ومقلقين منو القتل حيطلع منو فينا وكل واحد استجوبوه بتزكز افادتو القدمها وبقول يمكن يكون مشتبهين فيني والليل بقي ليهم طوييييييييل!! واخيرآ الواطا صبحت والكل مترقب!! بس م لقو الحاج!! ملابسو وحاجاتو. قاعدة بس م لقوه وماف زول عارف الحاج مشى وين!!

وكترت الاقاويل والاستنتاجات.. بس حسن اكد لناس الحله انو الحاج لحدي بعد الصبح كان قاعد واتصل لجنابو مرتضي وقال ليهو منتظرنك!! بعداك انا طلعت خليتو ف الديوان!! الحاج كان ف بيت ناس فاطمة السمحة كان بيتكلم معاها وهي بتبكي!!؟
وم قادرة تسيطر ع نفسها!! وفجأة جا خاشي محمود وقال ليهو انت هنا والناس قالبة الدنيا عليك!! الحاج ابتسم وقال ليهو انا الثعلب م بنخاف علي!! محمود انفعل وقال ليهو عايز شنو من اختي!! وقال ليها لشنو بتبكي!!؟ الحاج قال ليها ممكن تخليني مع اخوك!!؟ قامت منهارة ولمن م قادرة تمش وكل م عينها تقع ف عين اخوها تزيد ف البكاء!!؟ الحاج شال نفس عميييق وقبل م يتكلم محمود قالليهو فهمني ف شنو!!؟ الحاج عاين ليهو جوه عيونو وقال ليهو قتلتو لشنو ي محمود!! !؟
يلا محمود ملامحو بقت م بتتفسر والصدمة باينة عليهو ولدرجة انو رجولو م شالتو وقعد ف السرير وقال للحاج قلت شنو!!؟ الحاج شال نفس سخخخن وقال ليهو سؤالي واضح!!؟ محمود قال ليهو لشنو تشك فيني عملت شنو انا!! اصلا اسمي م اتزكر ف قضيتك!! الحاج قال ليهو عشان كدا اخدت اسبوعين عشان اكشفك!! كان مصر انو م عمل شيء!! الحاج قال ليهو كذبت وقلت م مشيت مدني من شهرين واتضح انك قبل اسبوعين كنت فيها وغالبا م تكون اشتريت السم!! محمود قال ليهو وحتى ولو مشيت دا دليل ع اني قتلت!!؟ الحاج ابتسم وقال ليهو قلت انك ف يوم الحادثة كنت ف الغابة بتقطع حطب وم جيت الا مع كواريك خالد!! فعلا مشيت وقد يكون عندك شاهد ع كدا بس جيت بدري قبل م المطرة تكب يعني قبل الجريمة.. وشوف. الكارو بتاعتك!! م فيها ولا اثر للطين وم تنسي انو قبل الجريمة جات مطرة شديدة وع حسب كلامك الحطب من يومها ف محلو وقاعد ف مظلة يعني حاجبة الامطار من انها تغسل اللساتك!! محمود قال ليهو ودا دليك!! الحاج ضحك وقال ليهو لم خالد اكتشف الجريمة انت الاقنعتو انو هو القتل الثعبان عشان تقنع الكل انو محمد مات بسبب الدبيب وعشان م تعمل فيها قتلتو انت واسمك يظهر كمشتبه فيه!! محمود ملامحو بدت تتغير وثقتو ف نفسو بدت تتهز!! وم كدا وبس لم شفت مره محمد جابت الدوا كبيت ليهو السم ف الدواء وبعد اتأكدت انو شرب منو شالت الفتيل وجبت الثعبان وطعنت محمد بالانياب عشان يظهر للكل انو مات بسبب الدبيب!! وجيت جدعت الفتيل ف الحمام!! ولسوء حظك انا امس لم دخلت متخوف من حمامات حلتكم لمحت الفتيل لانو الحمام شبه مليان!! وقلت يمكن تكون صدفة وسألت زوجة المرحوم ووصفت لي نوع الدوا!! واذا قسم الادلة الجنائية جو ممكن يثبتو انو فيهو سم!! يعني انت القتلت ي محمود بس دوافعك شنو!!
محمود وشو رجف وعيونو حمرت وم عرف يعمل شنو ولا يقول شنو غير انو يعترف بجريمتو!!
وقال اااي قتلتو!! الحاج ابتسم قال ليهو انا عارف بس عايز الدوافع!! محمود ولع ليهو سجارة وبقت يدو ترجف وقال للحاج اذكى منك م لاقاني!! الحاج ابتسم و قال ليهو م جرم بدهائك واحيالك برضو م لاقاني!! محمود قال ليهو قتلتو لسببين!! الحاج بستمع وهو مركز وصاري عيونو وقال ليهو كمل…محمود قال السبب الاول اني كنت عايز مروة مره محمد وعملت مشكلة بيناتهم عشان يطلقها واعرسها انا!! الحاج فتح خشمو وقال ليهو انت القلت لمحمد مرتك بتخونك مع صاحبك!!؟ محمود سكت بس نظراتو كانت بتأكد كلام الحاج!! ولم سألو عن السبب التاني قال ليهو كنت شاكي انو محمد عامل علاقة مع اختي لانها كل شوية ماشة بيتو والشك اكلني بس بعد مات حتي عرفت انو كان عايزها مازن م محمد بس فالحالتين كنت ح اقتلو لم عرفت انو رجع مرتو بعد م طلقها وم ظنيت تاني حيفرقهم شي إلا موت محمد!! الحاج قال ليهو تفتل رقبة عشان مره!! ومتزوجة كمان!! بس انت الخسرت كل شي ومروة م حتكون ليك.. وف اثناء م بيتكلمو جات دورية الشرطة وع رأسها المقدم مرتضى…الحاح قال ليهو يلا سلم نفسك وإلا حتموت ع يد اهلك اذا عرفوانك القاتل!! محمود بقى يخبط بيدو ع جبينو والحاج. طلع عليهم برا وكلهم اتفاجأو لشوفتو ومرتضي حضنو وقال ليهو براحة ف اضانو وينو زولنا!! الحاج ضحك واشر ليهو ع بيت ناس محمود وبعد تعب حتي قدرو يرفعوه ف العربية لانو اهلو هاجو شديد واي واحد بيخبت فيهو براهو! والحاج ودعهم وشكرهم ع حسن ضيافتهم وقال لخالد اعمل حسابك وامش عرسها بالحلال عوض بوافق!! وضحكو وجا ماشي ع العربية..وعوض قال ليهو جنابو لم الحاج إتلفت عوض حياهو وهو بيبتسم!! الحاج ضحك وقال ليهو طلعت وراها مرا!! ضحكو الاتنين والحاج ركب مع مرتضي وغادرو الحلة ووراهم محمود مكلبش ف بكسي الدورية…

النهاية ……………..

اضغط لقراءة المزيد...

 

[BASM17 اسطورة القصص]

تمت أضافة الأجزاء

 

[THE GHOAST LOVE]

تمت أضافة الأجزاء

تسلم ع سرعة الاستجابة

 

[الصقر_الجارح]

قصه جامده​

 

[THE GHOAST LOVE]

قصه جامده​

تسلم يا صقر