ازيك يا صديقي وكما وعدتك موضوع القايمة النهاردة اهو ... مش عايزين نطول في المقدمة لاننا هنطول اوى في موضوع النهاردة 😅
الموضوع دا موجه للأهالى اكتر من الشباب صحيح الاكتر هنا شباب بس من باب العلم بالشيء لاننا هنكبر ونبقا اهالى بعدين فنغرس القناعة دلوقتي اسهل
عزيزي الحج ابو العروسة عايزين نسألك انت لما بتكتب قايمة طويلة عريضة ومقدم بمبلغ محترم ومهر ٣ مليون جنيه ومؤخر بقد كدا انت بتعمل كدا ليه ؟
- عشان أمنلها مستقبلها واضمنلها حقها
- طيب ممكن ياحج تخطف رجلك لاقرب محامي وتسأله عن كام وحدة اتنازلت عن كل حاجة عشان جوزها يعتقها لوجه **** ويطلقها
اب تاني هيقول : انا بعمل كدا عشان هي مش اقل من بنت خالتها ( وده غالبا اب ماشي ورا مراته)
- اقعد كدا بقا يا حاج مع والدتك واسألها عن كام وحدة اتشحططت واتمسح بيها بلاط العماير مع انها كان خيالها اتقل شبكة واغلى مهر
اب تالت هيقول: لا انا بعمل كدا عشان احميها من براثن الذئب المفترس اللى اسمه جوزها وعشان يفكر الف مرة قبل ما يطلقها
- في مثل يا حجوج بيقول اللى بيقدر البلاء قبل وقوعه بيجيله او حاجة شبه كدا يعني
بمعنى انك لو خايف بنتك تتطلق يبقا هتطلق عارف ليه ؟
عشان ابسط مشكلة بنتك هتعملها بعد ما تتجوزه جوزها هيعدي عليه في مخه مشاهد كتير وهو عمال يدفع فيها كتيير فهيطلع غله كله فيها
عارف بقا على النقيض لو انت هونت عليه هيشيلهالك طول عمره ومش هيزعل بنتك عشان هو شاف انك عاملته زي ابنك فهو بدوره هيعاملك زي ابوه ويحترمها ويفوتلها دا طبعا لو انت مختار راجل لبنتك وراجل بجد
طب ليه ياحج لما روحت تخطب لابنك بعد ما مشيتو من عندهم قولتلوا انا مش مرتاح للناس دي اصلهم ماديين اوى وطالبين مهر مليون جنيه وقسيمة وووو وانت في نفس الوقت الشيك اللى مضيت عليه جوز بنتك بقيمة المؤخر متشال عندك في الدولاب
في كل مرة هتفكر تطلب طلبات تعجيزية لشاب متقدم لبنتك افتكر انك هيلف عليك الدور وتبقا انت اللى متقدم انت وابنك وفيه حد بيتشرط عليكم اصلها جامعية ودايرة ياحج
ليه المفروض اننا كشباب بنتعلم منكم الاصول والحاية نشوفك بتخربو جوازات عشان خاطر انكم عايزين تلاجة ١٨وقدم والعريس معندوش المقدرة
في واحد دلوقتي هيقولى : طب ماهو فيه جوازات بردو كانت على قد حالها وبقأل الامكانيات وباظت واتطلقوا بردو
- كويس بدأنا نتفق على نقطة اهو معنى كدا ان المبالغ الطائلة اللى ببتطلب مش هيا مقياس نجاح العلاقة الزوجية المقياس والاساس لنجاح اي جوازة هو الزوج والزوجة هما مؤهلين للزواج ولا لا وهل انت اخترت لبنتك راجل ولا لا
عشان خاطر النبي ياشيخ علم ابنك الجواز مش شهر عسل وبس وانتى يا حجة سيبي الفيسبوك شوية وعلمى بنتك ان الجواز مش شموع وخروجات وفسح ويضربوا بعض بالمخدات والريش يطير في كل حتة عشان مفيش حد عاقل بيحشي مخدة ريش 😂
وافتكر وافتكري ان بنتكوا لما تطلق هترجع تقعد جنبكوا وان الطلب عليها هيقل او هيبقا معدوم ودي حقيقة مرة لازم نتقبلها ان الواحدة المطلقة عمرها مهتكون محط انظار حد للجواز زي البنت حتى لو ارمل خمسيني بيبقا نفسه يتجوز بنت بنوت مش مطلقة ولا ارملة
وبس دا كان كل حاجة للنهاردة الموضوع اقصر من موضوع امبارح اهو ب 200 كلمة 😁
اقترح عليا حاجة نكتب عنها فيما يخص الزواج ونناقشها سوا
اقبل الانتقادات واستمع لكل الارآء وهفرض رأيي برضه لعدها عادى 😂 سلام 🤗
