لو هنتكلم على الزواج العرفي مش هيكفي صفحة واحدة ، ده احنا كمان هنلاقي له أسباب مختلفة
يعني مثلا
- في بعض المناطق الريفية وخصوصا في الصعيد ولحد وقتنا الحالي ، في أباء بيجوزوا بنتهم قبل السن القانوني بعقد عرفي ، عشان يخلص منها لأنها بنت ، ولو الزوج مات قبل ما يعقد شرعي البنت هي اللي بتشيل الليلة
- وفي اللي بتطلق من جوزها وترجع له بعقد عرفي ، عشان تاخد معاش أبوها مثلا ، ويبقى قرش زيادة داخل البيت
- وفي المطلقة اللي مش قادة تعيش محرومة من الجنس ، بدل تغلط وتمارس الجنس في الحرام بتتجوز عرفي وتشبع رغباتها في الحلال من وجهة نظرها
- وفي اللي اتضحك عليها باسم الحب وعيل تافه كتب ورقة عقد عرفي واتمتع بلحمها وبعد كدة يختفي ، أو يكون بيحبها فعلا ويفضلوا مع بعض لحد ما ينكشف أمرهم
- وفي اللي مالوش مزاج يأسس بيت وأسرة وعايز ينام كل شوية مع واحدة شكل ، وبدل ما يتجوز ويكون عليه التزامات ، كل ما يشوف واحدة تعجبه يتحوزها عرفي لحد ما يشبع منها وبعد كدة يطلقها ويشوف غيرها
وأكيد في حاجات تانية غير اللي ذكرتهم
وصعب جدا توجد حل لكل مشكلة منهم
