مساء الهنا والجمال على اخواتى وحبايبى انا هكلمكم عن تجربة شخصية حصلت معايا معلش المقدمة احتمال تكون طويلة بس استحملوها عشان اقدر اوصل ليكم الكلام صح واقدر اكون مفيد اكتر ليكم موضوعى عن الكسل عادة بجد سيئة جدا وبتؤثر علينا بشكل سلبى وخطر كبير جدا الموضوع حصل معايا بعد ما طلقت ورجعت خطبت والخطوبة اتفشكلت لأسباب انا لحد دلوقتى معرفهاش
الضربتين دول فقدت فيهم حاجات كتير اوى أولهم ولادى اللى مبقتش اعرف اشوفهم غير نفسيتى اللى بقت تحت الصفر وحالة اكتئاب فضلت فترة طويلة معايا خلتنى شخص كسول بطريقة وحشة اوى فقدت الشغف فى كل حاجة فى الحياة وفضلت سنين على كده لحد ما قررت فى يوم انى لازم ارجع تانى اقوى من الاول واحسن مش عشان خاطر حد غير نفسي هتكلم عن حاجات انا عملتها بشكل عملى غيرت كتير من حياتى والحاجات دى كانت كالاتى .
اول ما بدأت علاج من الكسل سالت نفسي سؤال مهم اوى ودى كانت بداية انى ارجع تانى السؤال ده هو
اولا-انا عايز ابقى نشيط ليه ؟
ده اول حاجة انا سالتها لنفسى بعد ما قعدت اقرأ نصائح كتير
الإجابة كانت بسيطة جدا وهى.
١-انا مش حابب اكون شخصية كسولة ولا تعتمد عليها
٢-انا هفضل كده قاعد وانا ورايا حاجات كتير عايز أنجزها فى حياتى
٣-هعيش حياتى ازاى وانا قاعد على السرير فين المتعة فى الحياة كده
٤- جسمى بدأ يبوظ وتخنت بسبب الكسل وبعدين طيب
دى كانت الأسباب بتاعى انت او انتى اكيد ليكو اسباب تانى لازم عشان تعالج الكسل ده أسأل نفسك السؤال ده واكتب الأهداف بتاعتك فى ورقة وحطها قدامك عشان تشوفها باستمرار هتبقى حافز ليك
ندخل بقى على تانى حاجة نعملها بعد ما نجاوب على السؤال ده ونحدد أهدافنا
ثانيا - اتكلم مع نفسك بشكل ايجابى
هتقولى ازاى يعنى هفهمك متستعجلش
بص يا غالى ويا غالية فى أول مرحلة دايما بعد ما نحدد الأهداف دى هنحس بشئ من الاحباط انا مش هقدر اعمل ده غلط كبير جدا لو قولت كده اعرف ان انت مش هتعمل حاجة لازم تتكلم مع نفسك بطريقة إيجابية اصحى من النوم واقول انا هقدر اعمل كده انا هقدر اعمل ده لازم تثبت الفكرة فى عقلك عشان تقدر تعملها وبلاش تستقل بنفسك ومن قدراتك قدر نفسك صح هتعرف تعمل اى حاجة انت عايزها دى خطوة مهمة جدا لازم تكون فيه إرادة عندك .
تمام كده تمام حلو اوى شوف بقى يا سيدى ويا ستى نعمل ايه تانى لا ده تالت مش تانى
ثالثا- ابدا بالافعال بقى
يعنى ايه يا عم محمد اللى انت بتقوله ده هقولك انت ليه مستعجل جيلك فى الكلام اهو .
يعنى يا باشا لازم تبدأ تشتغل على أهدافك وتسيبك من الاحلام الوهمية يعنى مثلا انت مش هتترقى فى شغلك من تشتغل كويس لازم تسعى فى شغلك عشان توصل للى انت عايزه مافيش حاجة هتجيلك كده من غير تعب هتجيب ورقة وقلم وتكتب اللى انت عايز تعمله وازاى هتعمله لو عندك مقابلات للعمل أو لو انت شغال حر وفيه وقت معين هتسلم فيه شغلك الخطوة دى هتساعدك جدا فى انك تنجز الاهداف دى .
نخش بقى على حاجة مهمة جدا
رابعا- افتكر نقطة قوتك والميزه اللى عندك
كلنا عارفين اننا عندنا نقط ضعف ونقط قوة بس الشاطر اللى يعرفها كويس عشان كده لازم تقعد مع نفسك وتشوف نقط القوة اللى عندك ايه وتعرف تستغلها وتوظفها ازاى ممكن تشوف أنها حاجات بسيطة بس دى بتميزك جدا عن غيرك متستهرش باى حاجة مهما كانت بسيطة .
حاجة تانية برده مهمة فى الموضوع ده
خامسا -متتكسفش انك تطلب مساعدة
انا كنت بفكر ان طلبى للمساعدة انى انسان فاشل وضعيف لكن بعد وقت لما فكرت فيها دى حاجة طبيعية جدا بينا وبين بعضنا زى ما بنقول بالبلد كده الناس لبعضها كل واحد فينا زى ما قولت ليه ميزة بتميزه مش عيب اننا نستغل الكلام ده فى أن احنا نساعد بعضنا .
كده انت ماشى صح وحلو بس فيه نقطة صغيرة مطلوبة اللى هى
سادسا- تقسيم الوقت بتاعك
انا مش هقولك على طول تبقى شغال لأن مش هينفع لازم برده وقت ان يبقى فيه مرح وخروج كنوع من التغير عشان تعرف تكمل الأهداف بتاعتك وتفصل وتعيد النشاط ليك من تانى فى مشوارك لان لو أجبرت نفسك على الشغل طول الوقت هتفقد تركيزك وهتبقى مشتت .
هانت قربنا نخلص معلش استحملنى التجربة دى انا عملتها وحابب انك تستفيد بأكبر قدر ممكن منها .
سابعا - أنجزت حاجة كافأ نفسك
انت دلوقتى اشتغلت اسبوع واطحنت فيه شغل كافأ نفسك فى يوم الإجازة بتاعك قضيه زى ما انت عايز عايز تنام نام عايز تقعد تتفرجلك على فيلم تمام حبيت تخرج أخرج ده اليوم بتاعك يا بطل اعمل فيه اللى انت عايزه .
فاضل ايه تانى ياعم فاضل ٣ حاجات تعملهم نبقى احنا كده بقينا ميت فل وعشرة
ثامنا -تقبل لحظات الكسل
انت بتقول ايه ياعم محمد هقولك انت ليه مستعجل ياعم 😂 😂 😂.
بص يا معلم اعتبر نفسك من المحتمل انك تحصل ليك انتكاسة ولحظات يأس وتقول لنفسك انا مش هقدر اكمل الشطارة هنا بلاش تستسلم للكلام ده وقول لنفسك أن ده مجرد احساس وهيمر اوعى تستلم وتضيع اللى انت عملته ده .
تاسعا -راقب نفسك
ساعات بنعمل حاجات تخلينا نصاب بالكسل زى انك متنمش كويس متلعبش رياضة حتى ولو كانت المشى تاكل اكلات دسمة وتقيلة كل ده يخليك تصاب بالكسل عشان كده لازم تراقب نفسك .
اخر حاجة خلاص معلش كله عشانك انت صدقنى
عاشرا -الصبر
ودى اهم خطوة لازم تعملها انك تصبر وبلاش يأس عشان الرحلة دى طويلة انت بتتغير فيها نفسيا وافكار وطبيعة حياة وكل ده لا عقلك ولا جسمك هيتقبل الفكرة دى بسرعة هتحتاج شوية وقت عشان تتحول من شخص كسول لشخص نشيط .
كده احنا خلصنا يا شباب اتمنى يكون الموضوع مفيد ليكم دى كانت تجربتى فى علاج الكسل اتمنى تفيدكم ولكم منى جزيل الشكر والامتنان.
