الجواز.... المشروع اللى بيعتبره كتير من شباب اليومين دول مشروع فاشل
هو احنا بنتجوز ليه اصلا ؟
وليه بيقولو ان الجواز نهاية الحب؟
كل دي اسئلة هنحاول سوا نجاوب عليها
الكون اللى احنا عايشين عليه دا وجودنا عليه كان هدفه هو التعمير والتعارف وحماية نسل البشر من الانقراض
الكون عموما ماشي بقانون القطبية زي قطبين الكهربا بالظبط موجب وسالب في طرفين لازم يكملو بعض وعشان كدا **** خلقنا ذكر وانثى عشان نكمل بعض وننتج نسل يعيش ويعمر الارض من بعدنا ومنعملش زي الديناصورات وننقرض
جواز البني ادمين بقا اللى بيخليه مختلف عن باقي الكائنات انه اسمه مودة ورحمة يعني وقت الاتفاق يكون في بين الزجين موده ووقت الخلاف يكون في رحمة محدش من الطرفين يأذي التانى
يبقا عندنا هدفين من الجواز هو الحفاظ على النسل والسبب التانى هو السعادة .. السعادة ان في حد بيشاركك حاجات بتحبها وبيقف جنبك وقت الازمات
اللى ناس كتير فهماه غلط ان الجواز علاقة بين اتنين بس الحقيقة هو ترس جوا مكنة المجتمع المسؤولة عن التعمير في الارض بمعنى انه علاقة بين اسرتين جمعهم نسب يبقا زي ما هتختار شريكة حياتك لازم تختار عيلتها والعيلة اللى تحب تكون مناسبها متفكرش في البنت بس وتقول لا عيلتها مليش علاقة بيهم هما احرار لا لان بشكل او بآخر الينت دي هتبقا متأثرة ب اخلاق وصفات اهلها لان دا المكان اللى اتربت فيه وشافت الدنيا من خلاله
بالرغم من ان الانسان مستقل الا ان احساسه بوجوده واهميته مرهون بوجود الاخر .. شخص يحسسه باهميته وانه حد مهم في الحياة ودي السعادة اللى بيحققها الجواز السليم للانسان ودا زي ما قولنا ما يعرف بقانون القطبية الحاجات بتتعرف بضدها يعني مكنتش هتعرف الحر لو مكانش فيه برد وهكذا
والراجل قطبيه هما البعد والقرب والست قطبينها هما الصعود والنزول او النفسية يعني تلاقيها مزقططة وطايرة من الفرحة ومرة تانية تلاقيها مش طايقة دبان وشها ومنكدة وبالمناسبة دي طبيعة في خلق اي ست مش حاجة مكتسبة يعني
لازم نفهم ان التغيرات المزاجية دي سنن الحياة والا كنا هنباق عاملين زي الروبوتات بوش واحد يعني جوزك لما يبعد مبقاش بيحبك زي الاول ولا بيخطط لمصيبة يعملها هو بس حايز ينعزل في كهف لوحدة فترة قصيرة يومين ويرجعلك تانى وعلى فكرة كل الرجالة كدا ومهمتك بس انك تسيبيه وحده مع نفسه مش تروحي تزني على ودنه عشان تعرفي ماله دي اكتر حاجة الراجل مبيكونش محتاجها في الوقت دا
انا عارفة انك كست طبيعتك المزاجية انك لما تزعلى بتحبى ان حد يسمعك بس الراجل ع النقيض لما بينعزل بيبقا عايز يفضل وحده ويرتب افكاره ويرجعلك تانى
ولا مراتك بقت نكدية ومش معنا انها متدايقة من بقالها كام يوم انك كزوج فشلت تسعدها لا هيا بتمر بفترة هبوط زي ماقولنا ومحتاجة انك بس تكون واقف جنبها وتسمعها الست صدقني فترة النكد دي مش محتاجة منك حلول ولا انك تديها حل مشاكلها هي بس مش محتاجة اكتر من انك تسمعها وتسكت خالص لحد ما تخلص كلامها ومعلش استحمل اي كلمتين يفلتوا منها عشان انت عارف مفعول الهرمونات بقا 😅 وبعد ما تخلص كلامها حسسها بالامان وقولها انا جنبك وهنعدي اى ازمة او مطب مع بعض زي ما عدينا اللى فات كله سوا
الخلاصة
الراجل محتاج انه يحس انه مصدر الامان وانه قادر يحميكي ووحياة الغالي ياشيخة بلاش دور الاسترونج اندبندنت وومان في الجواز بالذات امشي بيه في اي حاجة الا في الجواز لان الراجل دوره الاساسي في العلاقة انه مصدر الامان والحماية للست فلما تحطي راسك براسه كدا بتلغي دوره دا وساعتها في واحدة انصح منك هتحسسه بالشعور اللى هو محتاجه دا وهتخطفه منك وتيجي تزعلي في الاخر وتقولي الرجالة خاينة ( هما كدا كدا خاينين بس يعني عشان المصداقية وكدا 😂)
وانت مراتك محتاجة تحس ان هي الوحيدة في حياتك يعني لما يجيلك الفترة اللى محتاج فيها تروح تتقوقع على نفسك في كهفك قولها انا بس محتاج ابقا لوحدي يومين بس وراجعلك انتى .. انتى وبس اللى في حياتي ساعتها هي هتطمن وتسيبك تاخد مساحتك (ومحدش يقولى لا انتو جنس شكاك اسمع الكلام اللى بقولهولك وانت ساكت 😂)
ختاما عشان طولنا اوى
الجواز هو فعلا نهاية الحب بس بداية حب من نوع تاني يعني خطيبك اللى كنتى بتقعدى تتكلمى معاه بالساعات وهو مبسوط بده ميقدرش دلوقتي يقعد يسمعك بالساعات كل يوم عشان بقا عنده ضغوط تمنعه من كدا وخصوصا وهو في كهفه ميقدرش يحكيلك لان الرجالة مبيحبوش يحسوا بضعفهم خصوصا قدام شريكة حياتهم اللى مهمته اساسا يحيميها ويكون مصدر قوتها وجوزك لو حصل في يوم وحكالك عن ضعفه اديله القوة وقويه اوعى تعايريه بضعفه او تتريقى عليه لان صدقيني هتخسريه للابد
وحمراتك لما تكون مخنوقة ومتنكدة دا مش معناه ابدا انك فشلت في اسعادها او انك مش مهم في حياتها هي بس مش محتاجة اكتر من انك تضمها وتطمنها وتخليها تحكي
احنا بنتجوز عشان يكون لينا حياة في سعادة عشان معيش موده ورحمة وحب عشان يكون لينا امتداد عشان ننجح لازم نفهم اننا مختلفين ان احتياجاتنا مش واحدة
البيت ستر وسكينة وسند ووراء كل رجل عظيم امرأة حسسته بقوته فكان عظيم زي ما شافته ووراء كل ست سعيدة زوج حسسها بالامان واداها فرصه تشكي وتبكي وتفهم ان دا مش عيب فيه ولا امه فاشل في اسعادها فحست انها ملكت الدنيا
وبس دا كان كل حاجة للنهاردة دمتم بخير ونشوفكم في موضوع تاني سي يوو ❤
