شــبــح اســيــوط
الاسم اللي دبّ الرعب في أسيوط ومصر كلها في التسعينات. بسببه عاشت قرية في واحدة من أرعب القصص، خلت الأهالي ما يطلعوش من بيوتهم في نص الليل، لأن اللي كان بيطلع من بيته كان بيختفي، ومن بعدها بيظهر من جديد، لكنه بيظهر في مشهد مخيف ومميت.
مشهد بيتكرر كل ليلة، مشهد خلى كل أهل القرية يدركوا حاجة واحدة: إن كل ده بسبب شيء من الماضي رجع يطاردهم، وهو شبح أسيوط، اللي الشرطة عجزت إنها توصله، وشهدوا بعيونهم جرائمه المرعبة والصعبة، لحد ما في النهاية اكتشفوا حقيقته، اللي كانت سبب في واحدة من أرعب القصص في مصر، وهي القصة اللي هحكيها النهارده.
في شهر ديسمبر سنة 1998، ومن داخل إحدى قرى أسيوط، وعلى ضوء القمر الخافت، وفي وسط ليلة من الليالي، وسط مكان صوت أبو الحصين المرعب اللي بيهز أرجاء الغيطان، وبيتحرك وسط أغصانها بكل هدوء، يظهر شخص من أهل القرية قاعد في حاله وسط أرضه.
كان مولّع نار بسيطة قصاده، وقاعد يتدفى، ومشغل جنب منه على الراديو الست أم كلثوم. ووسط ما هو مندمج وقاعد سهران بالروقان، بيقطع صوت الست ليلتها على الراديو صوت شيء بيتحرك وسط الغيطان.
صوت خلى الشخص ده قلبه يتقبض، لأن دي كانت أصوات خطوات رجلين بتتحرك حواليه. خوفه خلاه يقوم من مكانه، ويبدأ يتحرك على ضوء عصاية ولعها من النار اللي قصاده، ويدخل بكل خوف وسط الغيطان.
صوت الخطوات لسه حواليه، ونبضات قلبه كانت بتعلى أكتر وأكتر، لأن الصوت كان بيقرب منه بالراحة.
وفي لحظة مرعبة، ظهر قصاده من وسط الغيطان حيوان "أبو الحصين" اللي هجم عليه مرة واحدة، فبيصرخ، وبيهش النار اللي في إيده، ويبعده عن أرضه. وبعدها قلبه هدي واطمّن ليلتها، وقرر يرجع يقعد قصاد النار تاني، لكن أول ما لف وشه علشان يرجع، شاف قدامه وسط الضلمة حاجة خلته يتشل من كتر الرعب، وصرخ بأعلى صوته، وجرى من مكانه بسرعة.
لكنه وهو بيجري وسط أغصان الغيطان كان سامع بصوت واضح خطوات سريعة بتقرب منه، خوفه خلاه يبص وراه، ودي كانت آخر حاجة يشوفها في حياته.
ومن بعدها سمعوا صوته في أرعب اللحظات، صريخ عالي جدًا لشخص بيصرخ بشكل مخيف، خلا أهل القرية يصحوا من عز نومهم، ويجروا على مصدر الصوت اللي كان جاي من الغيطان.
وصلوا هناك، وشافوا الشخص ده مربوط في جزع نخلة، ميت في مشهد مرعب ومميت.
وصلت الشرطة، والقرية كلها اتقلبت من الرعب. الفجر طلع، والناس لسه مصدومين، محدش فاهم حاجة، والشرطة مش لاقية تفسير، لأن الكل في حالة صدمة.
مرت الأيام، وبعد أسبوع، حصلت كارثة تانية.
في ليلة هادية، كل الناس في بيوتها، ما عدا شاب اسمه محمد عباده، عنده 26 سنة، راجع من السفر.
كان ماشي في شوارع القرية بالليل، شنطته في إيده، والدنيا ساكتة، مفيش نفس حواليه.
وفجأة حس إن في حد ماشي وراه.
بدأ يتلفت حواليه ومش شايف حد، بس إحساسه بالخطر كان بيزيد، فقرر يسرع علشان يوصل البيت، لكنه ما رجعش.
فضلوا أهله مستنيينه، ولما الصبح طلع، أبوه خرج يدور عليه، وفضل يلف في الشوارع لحد ما شاف حاجة بتولع، جري عليها، واكتشف إنها جثة ابنه محمد، مربوط في جذع نخلة بنفس الطريقة المرعبة!
المنظر كان بشع، والناس كلها خرجت على صراخ الأب، والشرطة رجعت تاني.
بس المرة دي الأهالي قالوا جملة واحدة: "شبح العسوي رجع ياخد بتاره."
القصة كلها رجعت لـ عزّت العسوي، واحد من أهل القرية، كان عنده أرض رفض يبيعها للعمدة حسان العياطي، اللي كان جبار ومتسلّط.
حسان حاول بكل الطرق ياخد الأرض، ولما فشل، أمر رجّالته يربطوا عزت في جزع نخلة وسط البلد، ومنعوا عنه الأكل والشرب، لحد ما مات قدام الناس، والكل سكت خوفًا من بطش العمدة.
مراته وعياله اتطردوا من البلد، والعمدة مات بعد سنين، لكن الذكرى فضلت، واللعنة رجعت تطاردهم.
اتكررت الجرائم بنفس الشكل، وكل الضحايا بيتعلقوا في جزع نخلة، والشرطة مش لاقية تفسير.
وفي كل مرة، الناس تقول نفس الكلمة: "ده شبح عزت العسوي."
لحد ما جه ظابط جديد اسمه الرائد محمد عبد ****، قرر يمسك القضية بنفسه.
قعد يراجع كل البلاغات، ولاحظ إن كل الجرائم بتحصل في يوم الجمعة بعد نص الليل.
فخطط كمين، وجهّز واحد من الظباط، اسمه عماد الألفي، عشان يكون طُعم لشبح أسيوط.
وفعلًا في ليلة هادية، ظهر "الشبح" وسط الشوارع، وبدأ يقرب من الظابط، لكن في اللحظة دي الشرطة خرجت من كل ناحية، ووقّعوه على الأرض، ووقتها اكتشفوا الحقيقة.
شبح أسيوط ما كانش شبح.
كان مصطفى عزت العسوي، ابن عزت اللي اتقتل زمان، اللي رجع بعد 15 سنة ياخد بتار أبوه.
اعترف بكل حاجة، وقال إنه كان شايف اللي حصل لأبوه وهو ***، وما قدرش ينساه، ولما كبر، رجع ينتقم من كل اللي سكتوا.
في سنة 2004، اتحكم على مصطفى بالإعدام، وساب وراه قصة مرعبة ما حدش نسيها…
قصة شبح أسيوط، واحدة من أرعب القصص اللي عرفها الصعيد كله.
