خلاص يا حب قفلنا المزاد
ولا عدش فارق مين بخسنا أو اللي زاد
وإن عشت وحدي
أنا قد التحدي
هقدر وأعدي
منا قلبي عندي
أغلى ما عندي
و هيبقى وعدي
أخلي نبضي
لا يفرق معاه قرب وبعاد
*************
هقابلك يا حبي عادي
وقلبى هسيبه فاضي
براه هشيلك وهنسى ماضي
كان فيه سهادي
وليالي أدماني شوكك وكنت راضي
لكن النهاردة شهادة ميلاد
*************
هشوفك هوا
مهو إنت هوى
ومن غير ما أسلم
هكمل طريقي ومرادي
والقلب اللي ياما ارتوى
خلاص شبع واتعلم
من كتر ما منك اتألم
وجرحك في جدرانه علِّم
دلوقتي خلاص نوى
هيعيش بعدك وحيد
وبقى عنده شئ أكيد
لو شافك هيبص بعيد
مش بيقولوا القلب وما يريد؟
وأهو نسيانك يا سيدي
بقى شيء إرادي
هنسِّي الهوى عنوان بريدي
وهقفل ببان قلبي ووريدي
ولا يوم هقولك خد بإيدي
وهعيش حياتي على الحياد ✊
