إنفصام الشخصية
( إسكيزوفرينيا )
و اه هيا بتطنق إسكيزوفرينيا مش شيزوفرينيا زي ماحنا فاهمين من الافلام
طب ايه هيا بقا الاسكيزوفرينيا دي ؟
لما اي حد بيقول قدامك لفظ انفصام الشخصية بيتبادر في ذهنك علطول انه شخص عايش بشخصيتين او اكتر وبيسلموا لبعض شيفتات يعني هو قدامك دلوقتي احمد الطيب المحترم الخلوق اللى ماشي جوا الحيط وبعد ساعة مثلا لا قلب واتحول بقا عصام الواد السرسجي اللى مقطع بطاقته وبيشرب اى حاجة بتتشرب صح ؟
معلش اعذرني بس انت مضحوك عليك دي دراما افلام ملهاش اي اساس من الصحة ولا ليها وجود اساساً
- يعني ايه يعني مفيش حد ممكن يعيش بشخصيتين
- لا .. الحالة الوحيدة الاقرب للعيش بشخصيتين دي هيا حالة نفسية بتتسمى الاضطراب ثنائي القطب او المعروفة باسم Bipolar وده بيكون حالة من الفرح المفرط وفي نفس الوقت اكتئاب شديد
معلش خرجنا برا السياق شوية بس الشيء بالشيء يذكر
- ايوة طب دلوقتي ايه هو الانفصام دا يعني عامل كيف
- بص مش عايزة احبطك بس مفيش حاجة اسمها انفصام الشخصية اساس الترجمة دي غلط بس هنمشيها كدا وخليني اعرفلك الانفصاف تعريف بسيط مخل بس عشان تفهمه بس .. مريض الفصام حرفيا ً وبدون اي مبالغة هو جسد من غير روح مفيش مشاعر ولا احاسيس مبيتأثرش بالبيئة اللى حواليه ومبيتفاعلش معاها بالعربي فقدان الاتصال بالواقع وبيبقا عايش جوا مخه هوا
طبعا التعريف دا مخل بالمعنى جدا ولو انت متعرفش ف الحالة المصابة بالفصام بتحتاج مش اقل من6 شهور متابعة تحت عين دكتور عشان بس يقدر بس يشخص ان الشخصية دي عندها انفصام
طب ايه هيا الاعراض الموجودة عند مرضى الفصام ؟
بص انت تقدر تقول ان اغلب المشاكل والامراض النفسية بتتجمع في مريض الفصام والاعراض بتاعت المرض دي نوعين
1- اعراض ايجابية : ودي اعراض بيحصل فيها زيادة او تشوية في وظايف المخ الطبيعية زي :
- الهلوسة : بيشوف ويسمع حاجات مش موجودة
- الاوهام : زي اوهام الاضطراب و اوهام العظمة ودي افكار جوا دماغه
- اضطرابات التفكير : مبيبقاش قادر يفكر او بيفكر ويتكلم بطريقة فيها خلل زي مثلا انه يكون بيرص كلمات ورا بعضيها ملهاش علاقة ببعضها ودي حالة اسمها word salad وواضح من اسمها معناها
- اضطرابات السلوك : زي السلوك العدواني او الغريب او حتى الغير منطقي
2- اعراض سلبية : دي اعراض بتحصل بسبب نقص او انعدام في وظايف المخ الطبيعية زي:
- التسطيح العاطفى او flat emotions م:دا بيكون عنده فيها انعدام في العواطف تعابير وشه ثابته مفيش فرح مفيش حزن وهكذا
- الانسحاب الاجتماعي : البعد عن الناس والعزلة
- فقدان الشغف او الدافع : بس بيكون بدرجة مرضية مش عادية زي عن اي حده عنده فقدان شغف لا دا بيكون معندوش شغف حتى يقوم يتحرك
- فقر الكلام : بيتكلم قليل جداا والاجابة على قد السؤال
- الإهمال الشخصي : بيهمل نفسه ونظافته وصحته ودا اهون عرض جنب كل اللى فاتوا
طب الفصام دا بقا سببه ايه وبيجي ازاى للواحد ؟
الحقيقة الصادمة ان اصلا سببه مش معروف لحد الان بس في بعض الارآء غير المثبته علمياً زي ايه زي العوامل الواثية والبيئية ، سوء المعاملة وهو صغير ، ادمان المخدرات والكحول
وي بس عارفة انى طولت عليكم بس يعني بيني وبينك حضرت النهاردة محاضرة في كلية التمريض ولقيت الدكتور بيتكلم عن الفصام دا فاتحمست ابحث فيه ودا اول موضوع احتمال كبير يكون بداية ساسلة هبدأها هسميها تصحيح مفاهيم نتناول فيها كل المفاهيم المغلوطة الدارجة في المجتمع سواء علمية او ثقافية او اجتماعية ونفصصها ونعرف الصح فعشان كدا عايزاك تقترح عليا معنوان المرة الجاية من السلسلة
وبس كدا اسفة بجد للإطالة بس بعد كدا لما تشوف موضيعي لو ملكش بال للقراءة متتدخلش وتقولى هقرأ كل دا لان اغلب مواضيعي كدا ذنبي انى بعرف تفاصيل التفاصيل عشان محدش يضحك عليك 🤷♀️😂
