القصص المسموعة هتنزل امتي ؟
طيب يا جماعة للميعرفش ، انا من فترة قررت اني ابتدي انزل قصص مسموعة مش مكتوبة
وناس كتير عارفة كده وحابة الفكرة وزودوني كمان افكار جديدة علي افكاري وحابه اشكرهم جدا علي كده ميرسي بجد
طيب القصص المسموعة انا هنزلها امتي ؟
الفترة الفاتت انا اخدت حبة حلوين غايبة عن المنتدي بصورة كاملة حتي اني افتح واخش اشوف اي البيحصل معملتش كده انا بعد بوست الوشم تقريبا مفتحتش لأن بعد ما وشمت جسمي تعبني فمقدرتش افتح
لما بقيت احسن قولت افتح اشوف الدنيا هنا بس بعد كده لقيت اني لسه مشتغلتش علي القصص المسموعة فكنت حابة ان اول بوست ينزل بعد الوشوم هو يكون قصة مسموعة
طيب اي الحصل ؟
الحصل ان بدات اجرب اسجل صوتيات مش اسجل قصة بدأت اجرب اشوف الصوت يطلع ازاي ولو صوت عصبي او زعيق او غيره وازاي يكون في شخصيات علشان المستمع ميزهقش وكمان بدأت اشوف المؤثرات الصوتية وكام حاجه كده بحيث ان المستمع يكون فالقصة ، وكمان فضلت محافزة علي فكرة كأني بحكي حاجه للمستمع بطريق اني بكلم حد صاحبي والصوتيات والكلام ده كله تمام وكل حاجه اتظبطت لوحدها
يعني القصة اتعملت وهتنزل دلوقت صح ؟
للاسف لأ القصة لسه مش هتنزل دلوقت لان بعد ما عملت كل ده وظبط كل حاجه بدات اكتب قصة وبقيت حفظاها بحيث اني اتكلم بتلقائية مش حد بيقرا وتمام الدنيا ظبطت وسجلت ودخلت اصوات ومؤثرات والدنيا فل
بس لما جيت اسمعها بعد ما خلصت اتفاجئت بفشل ذريع فالقصة ، هي حلوة كقصة بس وحشة كمسموعة
انا وعدتكم بحاجه مختلفة وجديدة وحاجه اول مرة تتعمل وصعب حد يعمل زيها والناتج الانا طلعته مفهوش الكلام ده للأسف بل بالعكس حاجه سهلة اي حد يعرف يعمل زيها حاجه بدائية اوي هي الطلعت
فرجعت تاني من الاول سجلت وعملت صوتيات وسجلت القصة ودخلت مؤثرات تاني بس برضو مكنتش حلوة
وحتي الان انا جربت اعملها حوالي خمس او ست مرات كل مرة في تحسن بس مش الحاجه الفدماغي دايما بحس بحاجه ناقصة حاجه مش مظبوطة
وانا وعدتكم بحاجه قوية
يعني مفيش قصة ؟
لأ طبعا في قصص مش قصة بس الموضوع محتاج وقت انا نفسي مش عارفة قد اي الوقت دا
ولذلك انا مش هحط لنفسي ديد لاين انا هسيبها براحتها تظبط انهارده تظبط بكرة تظبط بعد شهر او اتنين بالنسبالي عادي ، المهم اني لما انزلها ليكم اكون راضية عن كل حاجه فيها واقول اني مقصرتش فاي شئ
بصو يا جماعة انا اقدر انزلكم القصة عادي جدا والانا سجلته تمام ومفيش مشكلة وهيعجبكم كمان ، بس انا وعدتكم بحاجه ولازم اوفي بيها فمعلش فالتأخير انا ممكن اكون ايوة بتاخر جامد عليكم عارفة و**** بس انتوا عارفيني انا لما بعمل حاجه بعملها الهي تتحفظ فالذاكرة بعمل الحاجه البتخليكم تقولوا لو حد نزل حاجه شبها بتقولوا نريم هي اول حد يعمل كده وعملتها اجمد
فمعلش الصبر حلو يا جدع
وده سبب غيابي الفترة الفاتت واحتمال يكون في غياب برضو الفترة الجاية معلش
بس انا حبيت اوضحلكم الدنيا ماشية ازاي
ولا انا كلامي غلط وانزلكم اي حاجه
