من كام يوم اتعرفت على شاب لبناني دماغه شغاله.. في اخر مرحلة في الدكتوراه في ادارة الاعمال.. وبيشتغل جمب الدكتوراه في حاجات مختلفة.. بس سمعت منه اغرب واجمد قصة بيزنس..
الشاب ده عايش مع شباب في شقة..واحد من نيجيريا والتاني نمساوي .. قاعدين قعدة من قعدات القهاوي اللي بنقعد نفكر فيها نفتح مشروع وتعمل بيزنس.. القعدات اللي بنطلع بيها بأفكار عبقرية دي.. مزرعة فراخ.. بطاريات ارانب.. فرشة شاي.. عربية قهوة..
بس هما قالوا فكرة مجنونه اكتر 😅
قالك هنشتغل نيكولاوس 🤦♂️😂
اللي مش عارف ففيه يوم نيكولاوس اللي هوا النهارده بالمناسبة.. ٦ ديسمبر كل سنه.. نيكولاوس بييجي لبيوت الناس.. اهل ******* بيحضروا هدايا ويحطوها بره البيت في مكان متفقين فيه مع نيكولاوس.. وهوا ييجي ياخدهم ويخبط على الباب ويدخل معاه ورقه فيها الطفل عمل ايه كويس طول السنه.. وايه وحش.. وفي الاخر يقوله نصيحه انه يبقى شطور وبتاع.. ويديله الهدايا..
طبعاً الطفل بيبقى فاكر ان نيكولاوس عارف كل حاجه عنه.. وبيبقى معاه المساعد بتاعه (في العاده شاب داهن وشه اسود) على اساس انه اللي بيعاقب ******* الوحشه واللي مش بتسمع الكلام وكده..وبيستخدموه الأهل كنوع من التحذير للطفل لو بقى شقي ومتعب.. خد بالك نيكولاوس شايف كل حاجه 😅🤦♂️
بالمناسبة فيه مصادر بتقول ان نيكولاوس اصلا في الاساس تركي..
المهم الشباب دول جابوا لبس نيكولاوس والمساعد بتاعه.. وعملوا اعلان في دوايرهم.. والعيله بتختار.. لو عاوز نيكولاوس authentic بيجيلهم شاب بملامح عربية ودقن سودا وشعر اسود لامع.. لو عاوز traditional نيكولاوس بيبجي الشاب النمساوي 😂.. وفي الحالتين بيروح المساعد اللي هوا شاب افريقي اسود البشرة.. فمش محتاجين يلونوه اسود كمان 😅
وهوا بيحكيلي البيزنس مودل بتاعه معرفتش امسك نفسي من الضحك 😂.. بقوله طب وبتجيب همها.. عرفت منه انه بيبقى مشغول طول اليوم لدرجة بيرفض عروض عشان معندهومش وقت .. وانه بيطلع فلوس تكفيه يسافر في عطلة نهاية العام مع مراته (هيا صاحبته بصراحه بس بقول مراته عشان قيم المجتمع وكده)..
فياريت نضيف فكرة نيكولاوس دي للمشاريع اللي بتطلع في قعدات الشباب على القهاوي ونفكر خارج الصندوق شوية.. بطاريات الأرانب مبقتش تجيب همها يا جماعه
