جوزي مسافر بقاله 10 سنين، من تاني أسبوع جواز سافر وسابني، وكنت عايشة في بيت عيلة فلاحين.
كنت أقوم من الفجر، أشتغل وأخدم، ومارجعش شقتي غير على النوم.
استحملت كتير وخدمت أهله بكل رضا، وربنا كرّمني بولد وبنت.
جوزي ماكنش بينزل غير أسبوع واحد في السنة، وكان بيبعتلي الفلوس علشان أبني بيتنا،
وبالفعل بعت دهبي وميراثي، وحطيت كل القرشين اللي معايا معاه،
لحد ما **** وفقنا وعملنا بيت كبير في قرطين، 3 أدوار، وكنت بقول خلاص ده تعبنا وهيبقى لينا ولولادنا.
لكن في يوم، لاحظت إن حماتي بتكلمه بطريقة غريبة، كلها تلميحات وألغاز،
ولقيت كل العيلة بتتعامل كده علشان ما أفهمش،
لحد ما اكتشفت الحقيقة اللي كسرتني...
جوزي متجوز واحدة مصرية مغتربة معاه هناك،
وجاي مصر عايز يخليها تعيش في البيت اللي أنا بنتُه بعرقي وشقايا.
وقتها روحت بالتوكيل، ونقلت كل حاجة باسمي —
مش انتقام، بس علشان أحمي تعب عمري وتعب أولادي.
ماعدا شقته في بيت أهله، سبتها زي ما هي.
ولما واجهته، قالي بمنتهى القسوة:
"اضربي دماغك في الحيطة"
ولما عرف إني كتبت البيت باسمي، هددني بالطلاق!
قلتله عادي، أنا موافقة،
هاروح أعيش أنا وولادي في بيتنا،
وهو يخلي عروسته الجديدة تشيل شوية من قرَف أمه وأهله اللي أنا استحملت سنين.
دلوقتي الناس بتقول عليا ظالمة،
بس محدش فيهم حاسس بالنار اللي في قلبي،
ولا بالأنوثة اللي اندفنت جوايا،
ولا بالسنين اللي راحت وأنا بستناه يرجع يعوضني.
مش عايزة حد يهاجمني أو يقول عني أنانية،
أنا مش ظالمة... أنا بس ست اتكسرت واتولدت من جديد، علشان تحمي اللي فاضل منها.
ايه هي الحل في نظر الاعضاء
