ربما لم يكن شيئًا ذات قيمة بالنسبة لك…
لكنه كان قلبي،
والقلب حين يهمل لا ينطفئ…
هو يتكور على نفسه ببطء،
زي جرح قرر يعيش من غير صوت،
ويكمل نزيفه في الطبقات اللي محدش عارف يوصلها.
في قلوب اتبنت من صبر قديم،
ومن خوف ما اتقالش،
ومن خيبات كانت تقيلة لدرجة
إن الزمن نفسه عدى من فوقها من غير ما يحس.
قلب زي دا…
مش مجرد نبض،
ده أرشيف صامت لكل حاجة حاولت تقوم
ووقعت ،
وكل مرة قامت فيها…
كانت بتقوم أقل بشويه من المرة اللي قبلها.
ما كانش لازم تفهم قيمته…
لكن كان يكفي إنك تعرف
إن في أرواح لو اتكسرت
ما بترجعش تشفي تاني .
بتكمل حياتها في صمت داكن،
وتتعلم تعيش من غير ما تستنى
حد يفهم شكل الخراب اللي جواها.
الغريب
إن اللي مش شايف الحاجة
عمره ما هيسمعها لما تتكسر …
لكن الكون بيسمع.
والليل بيسمع.
وفي آخر الليل،
الروح اللي اتركنت على جنب
هتعرف إنها فقدت جزء منها
مش بيرجع…
لأنه ما وقعش بره،
وقع جواها.
وفي لحظة هدوء قاسية جدًا،
تفهم إن المشكلة ما كانتش في الفقد،
ولا في اللي ضاع…
المشكلة إنك كنت بتدي حياة كاملة
لحد يشوفها كسطر إضافي
في صفحة مش فارقله يقراها لحد الآخر.💔
