NESWANGY

Refugee · 2025-10-13T19:52:35+00:00

هو في راجل بيتكسف؟ السؤال ده فضل معلق معايا 37 سنه....من احدي سلبيات النشأه....ان من صغري كنت كسوف...ومن منطلق اني (مذكر ) كان الموضوع ده شائك شويه في البيئه اللي طلعت فيها بصفه عامه وفي الاسره بصفه خاصه وبالاخص ( الأب )... ضيقه نفسيه مش بتنتهي...لانك طول الوقت بتحارب في حاجه جواك مش عارف تخلص منها...وليه اصلا...علشان تتماشي والسلوك العام مع البيئه وترضي رغبه العائل ( اللي بيصرف عليك يعني ).. 37 سنه بتحاول تتخلص من القصه ديه ومش عارف...وده كمان كان بيزود من احساس الفشل....ما انت كده كده مش زي الشباب العاديين وبتتكسف زي البنات....وحتي كمان لما حاولت فشلت....مستني تكون ايه بقي لما تبص في المرايه...؟ وبعد الفتره دي كلها قررت اواجه حاجات كتير من اللي كان المفروض اواجها من زماااااااان....لان كلنا عارفين ان المواجهه بدايه الحل... واذ تكون الصدمه...صدمه صدمه يعني مش كلام استرسال.. الكسوف هو مصطلح دارج بيعبر عن مصطلحين... الخجل والحياء.. الخجل ...ده صفه مش طبع...يعني من المكتسبات...يعني اللي هو مش موجود فينا لا بالوراثه ولا بجينات ولا باي حاجه ليها علاقه بالتكوين....ما الا انه صفه بتكون ناتجه عن تصرفات غير محموده....ايا كانت التصرفات فهو من باب الندم عليها بيتقال ان انا خجلان من نفسي علشان عملت كذا وكذا وكذا...وبالرغم انه ناتج عن تصرفات غير محموده لكن تقريبا فكره ان الواحد يخجل من تصرفاته ده في حد ذاته شيء مبشر...ابشر.. الحياء بقي...واللي هو كان صدمتي الازليه بعد العمر اللي راح في محاربته... طلع غريزه....وليس للانسان تصرف في محاربتها....والتقيله بقي ...انها صفه حميده.... دي كانت مقدمه بسيطه...لرساله حابب اوصلها لناس ...ممكن يكونو زي ما انا كنت ...بيحاربو حاجات داخليه جواهم...هم مش فاهمين ابعادها كويس...وسبب محاربتهم هو ارضااااء من بالامر كانو بالاصل جُهالا.... لما تلاقي نفسك في صراع داخلي ...علشان متضيعش وقت ومجهود نفسي مش هين....افهم نفسك الاول بكل مكوناتك....انسف المجهول من ادراكك...لانك لو عرفت تفهم كينونتك كويس....حتي لو فيها بعض السلبيات...هاتعرف تعالجها صح...وان كان وقت العلاج بيحتاج وقت طويل...بس علي الاقل لما تبقي ملم بحيثيات المشكله وابعادها...هاتعرف تتعامل مع تابعاتها بايجابيه وبتحسن من مره لمره لغايه لما توصل للقضاء علي السلبيات المعينه اللي في تكوين شخصيتك..ده ان وجد يعني.. اما لو كانت ايجابيات بس للاسف بسلوك مجتمعي غير واعي حسسك انك مش طبيعي ومختلف وفيك حاجه غلط...فانت هاتعرف تحافظ علي ثبات سلامك النفسي علشان انت مستوعب ذاتك كويس قوي ...وعارف ان مش مجرد اختلافك انك اقل من العادي...بالعكس ...ده ممكن الايجابيات اللي عندك من النوادر اللي مش بتظهر غير كل فين وفين ...علشان كده العاااادي مش عارف يستوعبك...ولانك مش شبه الغالب الاعظم ....طبعا اكيد بيطلعو العيب عندك... ابله ميرفت @Mervat M انا بعتذر لحضرتك لو في ردي علي حضرتك كان سخيف نوعا ما ... بس يمكن تستوعبي شويه ان فعلا الموضوع لا ارادي....والاهم من ده كله....ان كلامي لحضرتك مكنش في اي شبهه من التعالي او التكبر ..لاني حرفيا اقل من اني اكون كده... دمتم كما اتمني لكم دوما...بسلامه النفس وهدوء القلب.