************** الجزء الثانى ************
لغز الجزء السابق
على عينى بكت عينى
ما حط طير هنا...
الا لقى كلب وراءه ثائر راكض
فى اتجاه الجنوب
بزاوية مقدارها 180 درجة
على بعد 120 خطوة و60 سم
******************************************
سلطان الفتوة مع رجالته
سلطان...
عايزكم تتفرقو حوالين القسم
ايوة القسم اللى حصلت فيه السرقة
لازم تعرفو الحرامى ساب ايه المرة دى
اعرفو اللغز قبل ما ينشروه
صابر...
طب ما نستنى لحد ما ينشروه يا معلم
سلطان...
يا حلو لما بينشروه بيكون ناقص كلمة
او يلخبطو فيه
عشان يثبتو للناس ان الحرامى مسبش حاجة
وعشان يقولو احنا مش مقصرين
خايفين يبانو انهم عاجزين انهم يقبضو عليه
الحرامى ده بيمرجح فيه
مفيش مرة الا وبعبصهم
انا عايزكم تشمشمو وتعرفو اللغز كامل
تعرفوه زى ماهو مكتوب بالظبط
شخص...
طب احنا حنستفاد ايه يا معلم سلطان
سلطان....
انا شفت ف الحلم ايه
شفت ان اللغز ده بيكون عنوان
والعنوان الموجود ف اللغز
الحرامى بيخبى المسروقات اللى سرقها فيه
ولو ضربت معانا
وعرفنا نحل اللغز
ممكن نوقع على صيدة ثمينة
شخص تانى...
طب ولو لقيناها حنرجعها للحكومة
مش كدة يا معلم
سلطان..
حكومة مين يا حكومة
احنا بس نعرف
بعدها نتصرف ف المسروقات
ونبحبحها على نفسنا
موضوع الفتونة ده خلاص
الناس مبقاش معاها حاجة
مش لاقية تأكل نفسها
ومفيش معاهم حاجة ناخدها منهم
يلا اتوزعو
**********************************
عونى او الدكتور عونى فى الشغل
شايل على كتفه شكارة اسمنت وطالع الدور التالت
اول ما وصل الدور ونزل الشكارة
مبيض المحارة...
ايه يا اخ
احنا قلنا شكارة جبس مش اسمنت
نزل دى من تانى وهات شكارة جبس
عونى...
بص يا معلم
حتعمل لى فيها معلم ولا مش عارف ايه
انا اكدت عليك قبل ما انزل
قلت لك اسمنت
وانت قلت اه
فلو انت عايز جبس
تنزل تجيبه بنفسك
انا مش خدام اهلك
مبيض المحارة...
انا قلت لك تنزل تجيب شكارة جبس
يعنى تنزل تجيب شكارة جبس
عونى...
اعلى ما ف خيلك اركبه
ولما يجى المهندس حاخليه يحكم
انا مش شغال عندك
مبيض المحارة مسك الكريك وبيهدد عونى
لكن عونى مسك الكريك معاه
وده يشد وده يشد
بعد شوية
الحيطان اللى كان عملهم مبيض المحارة م الصبح
اتشرخو وكل المونة وقعت من الحيط
ووصل المقاول وحصل خناقتهم
ومبيض المحارة عايز يتهم عونى
لكن عشان المقاول خبير ف شغله
عرف ان الشغل مش صح
المقاول عارف عونى من فترة
وعارفه مش بيغلط مع حد وخلاص
المقاول يخصم من مبيض المحارة
كل المونة اللى باظت
ويخصمهم من اجره
ويديله اجره ويطرده كمان
عونى...
ليه طردته يا معلم
المقاول...
اللى يتبلى على حد من رجالتى ما اضمنوش
مش جايز بعد ما نستلم منه الشغل
كل المونة توقع ع الارض ونتحمل احنا الخسارة
وبعدين مبيض المحارة اللى بيعتمد ع الجبس ف شغله يبقى مش معلم
يبقى لسه بيتعلم
عونى...
انت برضو الخير والبركة
انت خبرتك تفوق خبرة اى حد
المقاول...
بص يا دكتور عونى
انا عايزك اليومين دول تمسك حسابات الشغل
عونى...
بس يا معلم انت عارف الظروف
هنا بنسترزق بسهراية
ولا شغل بالمتر ولا بالالف
لكن محاسب دى تبقى براتب ثابت وكدة
المقاول...
لا انا برضو حاطلع لك نسبة
حاديك شغل مقاولة من الباطن
وانت تاخد نسبتك وتوزع الباقى على العمال
انا ناوى ازود العمالة شوية
وحاخد موقع ف الغرب
ومش حينفع كل يوم اكون هنا وهناك
يعنى عايزك تمشى الشغل هنا ف غيابى
وابقى لو صادفتك مشكلة تتصل بيا
عونى...
طب ادينى فرصة لحد بكرة ارد عليك
واحسبها مع نفسى شوية
ولو لقيتها ماشية وجايبة همها حاكون محاسب
لو مش كدة يبقى خلينى فاعل
المقاول...
لالالا انا باوعدك انك حتكون مبسوط
ومش حابخل عليك
انا عارف مش حالاقى حد اثق فيه زيك
جربت قبلك كام واحد والحسابات متلخبطة
لكن انت متعلم وحتشتغل بدماغ
عونى...
برضو بكرة ارد عليك
المقاول...
خد ده حسابك القديم كله
ومن بكرة نشتغل على نضافة
عونى...
شكرا يا معلم
الجيب نضيف خلينا نوسخه شوية
*********************************
سلطان الفتوة مع رجالته
قدرو يعرفو اللغز بتاع الحرامى
مكتوب قدامهم ومش عارفين الحل
سلطان...
على عينى بكت عينى
ما حط طير هنا..........
الا لقى كلب وراءه ثائر راكض
فى اتجاه الجنوب
بزاوية مقدارها 180 درجة
على بعد 120 خطوة و60 سم
طب يعنى ايه
النص التانى ممكن يكون سهل
فاكرين فيلم الراعى والنساء
او فيلم رغبة متوحشة
مش فيه الكلام ده
واظن كان بيقول الخطوة هو قال طولها كام
وهنا زيها الخطوة طولها 60 سم
طب فين المكان
صابر...
المكان فى النص الاولانى اكيد يا معلم
سلطان...
على عينى بكت عينى
ما حط طير هنا..........
الا لقى كلب وراءه ثائر راكض
انا اعرف ما طار طير وارتفع الا كما طار وقع
صابر...
اه بس دى فيها طير وكلب
يقصد ايه بالكلام ده
سلطان...
مش ده الدكتور عونى اللى معدى
صابر...
ايوة هو تلاقيه راجع هلكان من الشغل
شغال ف الفاعل طوب ورملة واسمنت وكدة
سلطان...
انا عارف هو انت حتعرفنى
يا دكتور عونى
عونى....
ايوة يا ..ايه
نقول يا معلم ولا يا فتوة
ولا نقول ايه بالظبط
انا والحمد لـله مش مقصر ف حاجة
ومش عليا ديون فواتير ولا اى حاجة زى كدة
حتعوزنى ف ايه
سلطان...
تعالى يا راجل
هو يعنى مفيش شغل معانا الا الفتونة
اهو احنا ملقحين ع القهوة
نحفظ الامن واخر الشهر الحكومة تبأجنا مرتباتنا
عونى...
طب عايزين منى ايه يا معلمين
سلطان ...
تشرب معانا القهوة
وتقعد معانا شوية
معانا اللغز بتاع الحرامى
جايز تعرف له حل
عونى...
واذا عرفتو الحل حتعملو ايه
سلطان...
حنعمل عمايل
مش بيقولو اللغز فيه العنوان اللى بيخبى فيه الحاجة اللى ييسرقها
احنا لو عرفنا المكان
نسرقهم ونبيعهم ونتنغنغ شوية
ونبقشش ع الغلابة اللى هنا
عونى...
اوصل البيت الاول اتشطف واتغدى واجى
معلهش جسمى كله تراب واسمنت
سلطان...
حاستناك اوعى متجيش
******************************
عونى يوصل البيت
يطلع مرتبه لمراته نور
ونور تجيب الكراسة بتاعة المصاريف
عونى يدخل الحمام عشان يستحمى
نور تدخل له نص جردل ميه دافى
وترجع تشوف المرتب والمصاريف
بعد ما عونى يستحمى
ويخرج يقعد منتظر الاكل
نور...
المرتب المرة دى فايض عن المصاريف
يا ريت كل شهر يبقى كدة
عونى...
المقاول عايزنى ف شغل محاسبة وكدة
نور...
يعنى اخيرا حترتاح من الشيل والحط
وتشتغل شغل ورقة وقلم
عونى...
انا لسة مردتش عليه
عايز اعمل مقارنة بين المرتب
جايز مرتب المحاسب يكون اقل من شغلى ده
نور...
انت يا حبيبى تجرب شهر
ايوة تطلب من المقاول انك نجرب شهر
والشهر ده ترتاح شوية من شغل الفاعل
بعد الشهر اذا كان جايب همه تكمل
منفعش ترجع شغلك
بس انا عايزاك تبقى المحاسب
حتعرف ترستق نفسك
ولو جاك شغلانة مقاولة للعمال
المفروض تعمل لك نسبة فيها
وهنا شوية وهنا شوية
عونى...
ما هو المقاول قال كدة برضو
حانزل شوية وارجع
نور...
على فين حبيبى
عونى....
اللى اسمه سلطان عايزنى شوية
نور...
وحيعوز منك ايه الفتوة
معدش علينا ديون عشان يهددنا
ولا معانا حاجة ياخدها ولا يبتزنا بيها
عونى...
لا مش كدة
لما ارجع حاشرح لك
سلام دلوقتى
مش عايز حد فيهم يجى يخبط
.......................
سلطان..
اهلا يا دكتور
عايزك تفكر معانا كدة
عايزين نحل اللغز ده
انا والرجالة عرفنا نحل الجزء التانى للغز
اللى هو 120 خطوة و60 سم
يعنى حوالى 72 متر ونص
وجنوب يعنى جنوب مش صعبة دى
عونى يفضل باصص ف اللغز
وكل شوية ياخد شفطة شاى
بعد ربع ساعة ينط من مكانه
عرفته عرفته
حليت اللغز يا معلم
سلطان...
ايوة كدة انا قلت محش حيجيب الحل زى دكتور عونى
ايه الحل قول
عونى...
حلاوتى الاول
سلطان ...
لما نشوف هو مخبى ايه
عونى...
مليش فيه
لو مخبى ملايين مليش انا فيه حاجة
انا عايز حلاوتى قبل ما اقول لك حل اللغز
سلطان...
نشوف ايه اللى مخبيه ونبيع وتاخد حقك
عونى...
لا خالص مليش دعوة
هات حلاوتى وانا اقول لك الحل
سلطان...
حاديك 2000 جنيه
عونى...
انا عايز 5 الاف حتة واحدة
ولو كان الحرامى مخبى ملايين ده بتاعكم
انا لو قلت للحكومة حل اللغز حيروح عليكم
سلطان...
احنا تبع الحكومة
بس حكومة برة برة
ادى 5 الاف بس قول حل اللغز
عونى...
الحرامى حب يعمل عليهم فيلم
ويبين لهم ان اللغز صعب
عشان كدة حط لهم اغنية ام كلثوم
انا سمعت انه كل مرة يحط اغنية
والمرة دى حط اغنية على عينى بكت عينى
ودى مش تبع اللغز
لكن اللغز
ما حط طائر هنا
الا لقى كلب وراءه ثائر راكض
حناخد حرف من كل كلمة
م ح ط ه
ا ل ك و ث ر
يبقى محطة الكوثر
فيه مكان اسمه محطة الكوثر
هو فين المكان ده
سلطان...
بص يا دكتور عونى
انت اخدت حقك اهو
لو حد تانى عرف بحل اللغز
صدقنى لا انت ولا اهلك حيكون لكم وجود
عونى...
لالالا يا معلم
انا نسيت اللغز اصلا
هو انا اصلا معرفش فين المحطة دى
حط ف بطنك بطيخة صيفى
انا رايح انام
تصبحو على خير
**********************
رجع عونى البيت وهو بيترعش من كلام سلطان
نورحاولت تعرف حصل ايه
وتهدى فيه وتحضنه
وهو فى حالته دى
حضن نور حضن جامد
والحضن جر وراه كتير
..........................
.......................
**************************
سلطان ومعاه شوية من رجالته راحو المكان
سلطان...
عايزكم تتوزعو حوالين المكان
مش عايز حد يشوفنا بنعمل ايه
ابو قورة ...
احنا مع المعلم سلطان فتوة الفتوات
صابر...
روح انت يا معلم
سلطان ...
طب احنا مش عارفين منين نبدأ القياس
صابر ...
اكيد من اول المحطة
لكن صابر يشوف قدامه لوحة اعلانات
اللوحة عن عيادات لتشخيص العيون
وفى اللوحة عين بتنزل منها دمعة
صابر...
بص بص يا معلم
ميكونش الاعلان ده يقصد بيه الغنوة
على عينى بكت عينى
سلطان ...
تقصد ايه يعنى
صابر...
احنا نبدأ العد من اللوحة
سلطان ...
هاتو شريط القياس
وبدأو يقيسو ولحد ما وصلو 72 متر وشوية
لقيو ان الارض باين عليها انها محفورة
علاوى وابو قورة ابتدو يحفرو بايديهم
بعدها الكل بيحفر
اللى بايده واللى بحتة خشب
المهم محفروش ربع متر
وظهر شنطة بلاستيك
المعلم سلطان سحبها
واول ما فتحها
لقى فيها ملف وفيه ورق
سلطان...
اومال فين الدهب والالماظ اللى بيقولو عليه
فين الفلوس
احنا اخدنا مقلب ولا ايه
تليفونه يرن ....
سلطان هو وقت تليفونات
سلطان...
ايوة مين
.... صوت نسائى
بص يا ريس
مش احنا نسرق ونتعب وانت جاى تاكلها بالجاهز
انا صورتك انت وصابر وابو قورة
ومعاكم علاوى كمان
اسمع كويس حاقول لك ايه
الملف ده تعمل بيه ايه
تتصل برقم صاحب الفيلا اللى اتسرق منه
تطلب منه مليون جنيه مقابل الورق
ومن غير ما تبين له نفسك
حتاخد الفلوس
انت ليك الربع
اما باقى الفلوس دول حقى
وانا اقول لك تسبهم لى فين
سلطان...
وانت تاخدى الباقى ليه يعنى
احنا معانا الملف
حاروح لصاحبه ونطلب منه حلاوته
وانت تضربى راسك ف الحيط
........ الصوت النسائى
انا دلوقتى قدام بيتك
مراتك لابسة قميص نوم شفتشى
مستنية المعلم يرجع
ممكن المعلم يرجع يلاقى القميص لوحده
مش عايزة احذرك من تانى
تعمل اللى اقول لك عليه من غير فصال
تقفل السكة ف وشه
سلطان يتصل بمراته...
انت فين ولابسة ايه
مراته...
انا ف البلكونة لابسة القميص اللى بتحبه
مستنية رجوع سيد الرجال
سلطان...
طب ادخلى جوة دلوقتى
انا جاى كمان شوية
سلطان ورجالته يركبهم الرعب
ومش عارفين حيعملو ايه
******************************
فى محل كبير للمنتجات الغذائية
احد الاشخاص يسلم حصيلة البيع لاسبوع مضى
شخص...
دول يا افندم حوالى 4 مليون و655 الف و250 جنيه
ممكن حضرتك توقع لى هنا ع الاستلام
......
طب ما تخليهم ف الخزنة
شخص...
معنديش اوامر بكدة
الاوامر اللى عندى اسلم كل يوم جمعة
ومن يوم السبت يبدأ شغل جديد
........
طب حط الفلوس هنا
يا عساكر
عسكرى...
اؤمر يا باشا
.....
مش عايز حد منكم يخرج من هنا
العربية المصفحة بتيجى الصبح
حتلف على المحلات وتلم الايرادات
اوعى حد عينه تغمض
*****************************
العربية المصفحة تيجى الصبح
وتستلم الفلوس من كل المحلات الخاصة بخط سير العربية ودى اخر عملية استلام
الوقت الساعة سبعة وربع
الشوارع فاضية تقريبا
وفجأة
قنابل دخان تنزل حوالين العربية
سواق العربية
كان عايز ينزل ويقفل باب العربية اللى ورا
امن العربية كان كله بيكح ومش شايف حاجة
السواق والامن عرفو يقفلو باب العربية
ولبسو اقنعة الغاز
وبلغو الشرطة
بعد نص ساعة توصل الشرطة
امن وعساكر السوبر ماركت كلهم محاوطين العربية
عربية الشرطة ينزل منها ظابط كبير
الظابط...
الظاهر ملحقوش يسرقو م العربية حاجة
امن العربية...
لا ما اظنش يا باشا
احنا قفلنا بيبانها ف لحظة
الظابط ...
افتحو الباب خلينا نشوف
الامن يفتح العربية
الكل يتفاجئ لما يلاقو العربية فاضية
امن العربية...
طب ازاى
ده الموضوع مكملش نص دقيقة
ازاى يقدرو يسحبو كل اكياس الفلوس
دول 23 كيس وف كل كيس مليون جنيه
مستحيل انا مش مصدق
الظابط...
هو هو نفس الحرامى
سرقكم وساب لكم رسالة
ادخل يا عسكرى هات المظروف ده
العسكرى يدخل ويناول الظابط المظروف
الظابط يفتح المظروف ويقرا....
انى اتنفس تحت الماء... انى اغرق اغرق
انا اللى سبقت الكلب المسعور ونهشته
من الشمال
بعد ما تعدى صلاح سالم
وقبل ما تعدى السكة الحديد بتاعة حلوان
وقبل الاوستراد بـ 65 متر
الظابط....
كلب مسعور
لغز ايه ده كمان
احنا عرفنا نحل الالغاز اللى قبل كدة
عسكرى من السوبر ماركت...
الحقنى يا افندم
كل اللحمة والفراخ اللى ف التلاجة اتسرقت
*************************
يا ترى ايه حل اللغز
ومين يعرف يفكر
شغلو دماغك وساعدو الظابط عشان يحل اللغز
...................
انى اتنفس تحت الماء... انى اغرق اغرق
انا اللى سبقت الكلب المسعور ونهشته
من الشمال
بعد ما تعدى صلاح سالم
وقبل ما تعدى السكة الحديد بتاعة حلوان
وقبل الاوستراد بـ 65 متر
************************
.............
